Luke 8 - Sa Ugud Apudyus

Da Nibuḻubuḻune Bubai Ḵan Jesus

¹ Unipun, nanggaḵay aḵ Jesus atta siyudad ḵan ili, iwwaḻagawagna Ambaḻu we Damag mipanggob si ampangatan Apudyus. Nibuḻun da nasawaḻan aḵ duwae disipuluna ḵan siya.

² Inninggaw os da nibuḻune udume bubai ye ḵinaan Jesus da saḵitda ya pinaḻyawna da aḻan ḵan dida. Nidoga'ḵ Mary ye maawagan aḵ Magdalene we napaḻyaw da pitu we aḻan ḵan siya.

³ Joanna we asawan Chuza we angupisinaon Gobernor Herod, Susanna ya da adu we bubai ye innatodda da ḵuḵuwada ta mabadangan da Jesus.

Sa Pani Atte Nawwagawag Atta Bukoḻ

⁴ Pune sadi, ummoy da amoamode tagu ḵan Jesus we naḻpu'tta nansabasabali ye ili. Pun ḵanana ḵan didae nangipani,

⁵ “Inninggaw tagu we ummoy nawwagawag si buḵoḻ. Iwwagawagna ḵad, naottag udum atte daḻan woḵ ginusgusdan da tagu dida ya tinuḵtuḵan da sissiwit.

⁶ Da udume buḵoḻe niwagawag, naottagda'tte bibbisil. Taḵon ay nu tummubuda, naḻ-uyda woḵ naḻanguda te ammamaga luta.

⁷ Da udum ḵad ose buḵoḻ, naottagda si laslasi woḵ taḵon ay nu tummubuda, nidisan tummubu da lasi woḵ pinsoḻda da muḻa ta adida dumaḵoḻ.

⁸ Da udum ḵade buḵoḻ naottagda'tte alluta. Tummubuda woḵ namungada, da udum namungada'ḵ singgagasut.” Ginangput ḵad Jesus inug-uggud annae pani, ḵanana'tta tagu, “Diḵayu we andodongngoḻ, sosomḵonyu da dingngoḻyu.”

Sa Panggob Da Pani

⁹ Da disipuluna ḵad ḵanandae nan-imus, “Ngai pion ni sadi ye pani ḵanan?”

¹⁰ Ḵanan Jesus, “Diḵayu ḵad, nipaigammu da banage adipun nipaigammu si awe mipanggob atte ampangatan Apudyus. Yaḵon da udume tagu ipaniḵe antuttudu ḵan dida ta taḵon ay nu iillanda da banage ḵooḵ, adidapun maḵaimatun ya taḵon ay nu dodongngonda da banage ibagaḵ, adidapun maawatan.

Sa Pion Ni Pani Atte Nawwagawag Si Bukoḻ Ḵanan

¹¹ “Annaya pion ni pani ḵanan. Sa buḵoḻ, siya Ugud Apudyus.

¹² Da naottag atte daḻan, mipanida'tta tagu we dongngonda Ugud Apudyus. Pun umoy aḵ Satan ya ḵinaanna da Ugud Apudyus atta somsomoḵda ta adidapun amati ḵan matagu.

¹³ Da naottag atte bibbisil, isuda da tagu we dingngoḻda ḵad Ugud Apudyus, allaylayaddae nangawat. Yaḵon adipun lummamut atta somsomoḵda. Amatida'ḵ sin-aḵitan, ḵad nu dumatong ampaḵaḻaman, iwaḻangda pammatida ḵan Apudyus.

¹⁴ Da naottag atte laslasi, isuda da tagu we dongngonda Ugud Apudyus. Yaḵon gapu'tta binimbinsawda'tta ḵinabaḵnang ya laylayad si annae biyag, adidapun tungaguwon ugude dingngoḻda ḵad adipun maobos da ḵoḵoḵḵonda.

¹⁵ Da naottag ḵad atte alluta, isuda da tagu we andongoḻ si Ugud Apudyus, pinagatupandae namati ḵan ampoḻḵapoḻḵas da somsomoḵda, anusanda inggana'ḵ angwada'tta adu we ambaḻu we banage mas-oman Apudyus we isun ni muḻae adu ambubungana.”

Sa Pani Mipanggob Si Silaw

¹⁶ Ḵanan Jesus we nangipani, “Naippun tagu'ḵ tonggana silaw ya laḵḵobana'tte aḵḵubaw baḵon nu itaḻuna'tte dugun ni ḵama. Daḵampun aḵ ḵaḵnat, iggana si sasap-aḻan ni silaw ta mailan da lumnoḵ.

¹⁷ Isuna sadi ye impaniḵ te da losane mitataḻu baḵon nu da daampun maigammu sinsadi, mipaigammu si umali ye aḻgaw.

¹⁸ “Gapu'tte sadi, sisinnoogonyu da annae ibagaḵ. Te sa anuttuwa si dingngoḻna, amo madog-an an-aawatna. Yaḵon sa tagu we adinapun ḵoon dingngoḻna, taḵon ay aḵite ḵananae awad ḵan siya, maḵaan.”

Sa Inan Jesus Ya Da Sunudna

¹⁹ Pune sadi, dummatong inan Jesus ya da sunudna sidi yaḵon adidapun maḵaadani ḵan siya te amod da tagu we nampaliḵwos.

²⁰ Pun ḵanan ni osae nangibaga ḵan Jesus, “Andi'ḵ inam ya da susunudnu'tte lasine pionda maḵaugud ḵan siḵa.”

²¹ Yaḵon ḵanan Jesus, “Da mibelang aḵ inaḵ ya sunudḵu, da andongoḻ ḵan anuttuwa si Ugud Apudyus.”

Sa Bibbid Ya Da Tupiyaḵ

²² Sin-aḻgawan ḵad, summaḵay da Jesus ya da disipuluna'tte bangka woḵ ḵanan Jesus ḵan dida, “Intaḵu dumoḻmang.” Pun nallibbatda.

²³ Naaḵatda ḵad, nasuyop aḵ Jesus. Panos ḵade sadi, annat ampigsae bibbid woḵ natupitupiyaḵan bangka inggana'ḵ annae milisobda.

²⁴ Pun binangonda'ḵ Jesus woḵ ḵananda, “Anaḵay! Apu, annae milisob taḵu!” Tummaḵdog aḵ Jesus woḵ binilinna ampigsae bibbid ya da tupiyaḵ. Pun gumminoḵda woḵ ippun um-umsiyong.

²⁵ Ḵanana'tta disipulu, “Naippun ḵamman os ay pammatiyu?” Naḵimtanda woḵ nataagda. Ḵananda, “Atopay! Ngai nin ay anna? Taḵon ay bibbid ya da tupiyaḵ bilinona dida ya tumuttuwada ḵan siya!”

Sa Naaḻanan

²⁶ Pinagatupan da Jesus we dummoḻmang inggana'ḵ dummatongda'tte saḵubna'd Gerasa si domang ni probinsiya'd Galilee.

²⁷ Lummogsadda ḵad atte bangka, inabot ni laḻaḵi ye naaḻanane iGerasenes aḵ Jesus. Nabayage amboboddang ya iinggaw atte lilibbonan.

^28-29 Ampaḵapaḵaḻamon da aḻan ya taḵon ay nu naguwaḻdaan ḵan naḵawadan da imana ya da suḵina, gosatona. Pinaawid os da aḻan atte bumbummaaw. Pun innilana ḵad aḵ Jesus, napapḵaaw woḵ nanalluḵu ḵan siya. Ḵananae nangidangsoḻ, “Anii! Ngaipaḵa umali ḵan saḵon? Siḵa'ḵ Jesus we Abeng ni Ḵangatuwane Apudyus. Ḵadaguwanaḵ ḵappos ta adim saḵon dusaon!” Te innilan ḵad Jesus, binilinna da aḻan ta lumawada.

³⁰ Pun ḵanan Jesus we nan-imus ḵan siya, “Ngai ngadannu?” Ḵanana, “Nilibu,” te amoamod da aḻan si annae tagu.

³¹ Ḵingwan ḵad da aḻan, nandagdaguda ḵan Jesus ta adina dida ibuun si abute ippun patinggan ni ḵaadaḻomnae madusaanda.

³² Yaḵon iyyunudna ta lumnoḵda'tta amode boḻoḵ we nansubsubuḵ atte igid ni tagudtud. Ḵanan Jesus, “On, inḵayu!”

³³ Pun lummawada'tte tagu woḵ nillumnoḵda'tta boḻoḵ. Nangwa ḵad da boḻoḵ, sintotoddaḵdae nan-osog woḵ lummayugda'tte etpang pun naaminda naanud atte baybay.

³⁴ Innilan ḵad da nanangḵon atta boḻoḵ da naḵwa, ummawidda woḵ ummoyda imbaga'tta tagu si siyudad ya da ili.

³⁵ Pun ummoy da tagu innila naḵwa. Dummatongda ḵad ḵan Jesus, indasanda sadi ye tagu we napaḻyawan da aḻan. Tutuḵdu si sinagung Jesus ya nansilup ḵan nanggodong somsomoḵna. Pun naḵimtanda.

³⁶ Ḵad imbagan os da nangila mipanggob si namaḻyawan Jesus atta aḻan.

³⁷ Ḵad da losane naḻpu si saḵubna'd Gerasa, nandagdaguda ḵan Jesus ta tenana ilida te naḵimtanda. Pun nambangka da Jesus ya da disipulunae naḵasaganae umoyon.

³⁸ Pun summaḵay ḵad aḵ Jesus atte bangka, ummoy nandagdagu sadi ye tagu we napaḻyawan da aḻan ta mibuḻun ḵan dida. Yaḵon pinaoyon Jesus we ḵanana,

³⁹ “Mipauliḵa'tte boḻoynu ya ibagam ḵadagu we ḵingwan Apudyus ḵan siḵa.” Pun ḵesan woḵ ummoyna iwwaḻagawag atte ilida ḵingwan Jesus ḵan siya.

Sa Bubai Ya Sa Abeng Jairus

⁴⁰ Nipauli ḵad da Jesus atte domang, allaylayad da tagu sidi ye namadatong ḵan siya te inuuwwayda.

⁴¹ Unipun, annat aḵ Jairus we osa'tta pangat si sinagoga. Ummoy nanalluḵu ḵan Jesus woḵ nandagdagu ta umoy oḵyan si boḻoyda,

⁴² te sa abus aḵ abengdae bubai ye nasawaḻan aḵ duwa tawonna, mamattoy. Anna ḵade umoyda, naaligummu da tagu ḵan siya.

⁴³ Sa amoamodan os da tagu, inninggaw bubai ye dumaḻadaḻa'tte nasawaḻan aḵ duwae tawon. Taḵon ay nu naaminan atta nampaagasana, naippun naḵaagas ḵan siya.

⁴⁴ Nangwa ḵad, ummadani si odogan Jesus woḵ tokkona gayadan ni silupna. Pune sadi, naḵaginoḵ daḻana.

⁴⁵ Ḵanan Jesus, “Ngai nandoḵ ḵan saḵon?” Losanda ḵanane namuḵlit, “Daḵanaḵpun.” Ḵanan Peter, “Apu, atomagay da tagu we ansusulig ḵan siḵa!”

⁴⁶ Ḵanan Jesus, “Naid! Inninggaw pagay nandoḵ ḵan saḵon te giniḵnaḵ ḵabooḻaḵe lummawa.”

⁴⁷ Inigammun ḵad ni bubai ye adipun mitaḻu ḵingwana, ummadani ye amilpilpil woḵ nanalluḵu'tte sinagung Jesus. Pun imbagana gapun ni nandoḵana ya sa naḵaanan ni saḵitna.

⁴⁸ Ḵanan Jesus ḵan siya, “Abengḵu, gapu'tte pammatim ḵan saḵon, bummaḻuḵa. Inḵan lumin-awa somsomoḵnu.”

⁴⁹ Sa nangibag-ana'tte bubai, anna osae nadanatong we naḻpu si boḻoy da Jairus. Pun ḵanana ḵan siya, “Adim ogon taḵtaḵon aḵ Mistulu te natoy abengnu.”

⁵⁰ Nangwa ḵad aḵ Jesus si dingngoḻna imbagana, ḵanana ḵan Jairus, “Adiḵa maḵimut. Abus amatiḵa woḵ matagu abengnu.”

⁵¹ Dummatongda ḵad si boḻoy da Jairus, adimpun Jesus iyyunude awad lumnoḵ, abus da Peter, John ya aḵ James ya da ama ḵan inan ni babaḻasang.

⁵² Nandomdom ḵan ummibil da losane tagu sidi yaḵon ḵanan Jesus ḵan dida, “Guminoḵ ḵayu te sa annae babaḻasang, daḵampun aḵ natoy. Masusuyop.”

⁵³ Pun inem-emesda'ḵ Jesus te iniiggammudae natoy.

⁵⁴ Yaḵon innonnan Jesus iman ni babaḻasang woḵ ḵanana, “Abeng, bumangonḵa!”

⁵⁵ Pun nipauli ḵalidodwan ni babaḻasang, natanaḵdog woḵ ḵanan Jesus, “Ittanyu'ḵ ḵanona.”

⁵⁶ Pun nataag da ama ḵan inana yaḵon ḵanan Jesus we namilin ḵan dida, “Naippun pay angibag-anyu'tta naḵwa.”