Luke 6 - Sa Ugud Apudyus

Sa Umillongan Da Judyu

¹ Sin-aḻgawan ḵade sa umillongan, nangoy da Jesus ya da disipuluna si pappayawe namuḻ-an si de wheat we isun ni pagoy woḵ ḵummuḻtung da disipuluna'ḵ ḵinutimanda.

² Inninggaw da udume Pharisee ye innilada ḵingwada. Ḵananda ḵan Jesus, “Ngaipada ḵoon ḵaḵnat? Lisalisonda lintog taḵu we Judyu te an-anida si umillongan.”

³ Pun ḵanan Jesus ḵan dida, “Ḵasapuḻan oḵyane iḵagasmoḵyu binasayu mipanggob atte ḵingwan Ari David ya da buḻunna'tte nauḻatanda.

⁴ Nillumnoḵ si boḻoy Apudyus woḵ innaḻana tinapaye nidatun ḵan Apudyus we adimpun ni lintog iyunude ḵanonda. Abus da papadi'ḵ miyunud aḵ angan si sadi ye tinapay. Yaḵon ḵinanna woḵ innattana bos da buḻunna.”

⁵ Pun ḵanan Jesus we nangiyanungus, “Saḵone Abeng Di Tagu, anna ḵaḻabbongaḵ atta maḵwa si umillongan.”

Sa Tagu We Naangḵet Imana

⁶ Sin-aḻgawan ḵad si umillongan, nillumnoḵ aḵ Jesus si sinagoga ta antuttudu. Unipun, inninggaw tagu we naangḵet dawinane imana.

⁷ Inninggaw os da udume mimistulun ni lintog ya da Pharisee ye angitotollong ḵan siya ta ilanda nu ḵaanona saḵit atte umillongan te pionda pabasuḻon aḵ Jesus.

⁸ Yaḵon inigammun Jesus somsomoḵda, pun ḵanana si naangḵet, “Tumaḵdogḵa ta umaliḵa si sinagungni.” Pun tummaḵdog woḵ ummoy.

⁹ Pune sadi ḵanan Jesus ḵan dida, “Imusoḵ ud ḵan diḵayu. Ngai iyunud ni lintog taḵu si umillongan? Sa ḵoon taḵu ambaḻu baḵon nu sa ḵoon taḵu lawweng? Sa taguwon taḵu da tagu baḵon nu sa dadailon taḵu dida?”

¹⁰ Nallangḻanga ḵad ḵan dida, ḵanana si naangḵet, “Uyadom imam.” Inuyadna ḵad, nipaḻ-og.

¹¹ Yaḵon da mimistulun ni lintog ya da Pharisee amod de sangada ḵan Jesus woḵ nan-uugudda nu ngai ḵoonda ḵan siya.

Sa Namiliyan Jesus Atta Nasawaḻan Aḵ Duwae Apostol

¹² Unipun, nanagada'ḵ Jesus atte beleg ta umoyna ilabḻabi ye alluwaḻu ḵan Apudyus.

¹³ Nabigat ḵad, inayagana da disipuluna woḵ pinilina da nasawaḻan aḵ duwae nginadanana'ḵ apostol.

¹⁴ Annaya da ngadan da pinilina. Aḵ Simon we nginadanan Jesus aḵ Peter, aḵ Andrew we sunudna ya da James ḵan John. Nidoga da Philip ḵan Bartholomew,

¹⁵ da Matthew ḵan Thomas ya aḵ James we abeng Alphaeus. Ḵad nidoga bos aḵ Simon we nginadananda'ḵ Angitaḵdog si ilina,

¹⁶ aḵ Judas we abeng James ya aḵ Judas Iscariot we asi angituyuḵ ḵan Jesus.

Sa Nangaanan Jesus Atta Saḵit

¹⁷ Pune sadi, nan-osog da Jesus atte tanap. Inninggaw os da disipuluna. Inninggaw os da amoamode tagu we naḻpu'd Jerusalem ya da udume ili'tte probinsiya'd Judea. Naḻpu bos da udum atta ili si taḻantag ni baybaye adani'd Tyre ya ad Sidon.

¹⁸ Ummoyda ta dongngonda tuttudun Jesus ya ḵaanona da saḵitda. Ḵad da naaḻanane tagu, ummoyda bos woḵ pinaḻyawna da aḻan ḵan dida.

¹⁹ Pun pinadas da losane tagu tindoḵ aḵ Jesus te anna ḵabooḻan Apudyus ḵan siya ta da losane anna da saḵitda maḵaan.

Da Pian Ya Da Ḵaddagu We Tagu

²⁰ Pun nansagung aḵ Jesus atta disipuluna woḵ ḵanana, “Pian da tagu we antaḻgod ḵan Apudyus atta ngaiman te midogada si ampangatana.

²¹ Pian ḵayu we mauuḻat sinsadi, te mamassug ḵayu. Pian ḵayu we umibiibil sinsadi, te lumayad ḵayu.

²² Pian ḵayu nu sasangngaan diḵayu'tta tagu, ya nu laḵsigonda diḵayu, potogonda diḵayu, ya am-amsewonda diḵayu gapu'tte pammatiyu ḵan saḵone Abeng Di Tagu.

²³ Anggangganas ḵayu ya ampaypaytuḵ ḵayu'tte layadyu te sosomḵonyu we daḵoḻ gungunayu'd langit. Te da sadi ye ḵingwada iissuna da ḵingwan da danaḵḵoḻda'tta profeta si awe.

²⁴ Yaḵon ḵaddagu ḵayu we baḵnang, te abus sinsadi'ḵ allaylaydanyu.

²⁵ Ḵaddagu ḵayu we mamassug sinsadi, te mauuḻat ḵayu, ya ḵaddagu ḵayu we sin-eemes sinsadi, te andomdom ḵayu ya umibiibil ḵayu.

²⁶ Ḵaddagu ḵayu bos nu itaḻayag diḵayu'tta losane tagu, te iissuna bos ḵingwan da danaḵḵoḻda'tta sinan profeta.”

Sa Ayat Atta Ḵabusuḻ

²⁷ Pinagatupan Jesus woḵ ḵanana, “Yaḵon ibagaḵ ḵan diḵayu we andongoḻ. Pagatupanyu ayaton da ḵabusuḻyu ya pagatupanyu ḵoon da ambaḻu'tta tagu we anasanga ḵan diḵayu.

²⁸ Pagatupanyu ḵodawon ḵan Apudyus ta bindisyunana da dam-on angaḻawag ḵan diḵayu. Ḵad pagatupanyu bos iluwaḻuwan da dam-on angam-ames ḵan diḵayu.

²⁹ Nu betnagonda apingnu, itayam os biiḵ, ḵad nu aḻanda jaketnu, ittom os ḵamusitam.

³⁰ Sa ḵoom os, angitodḵa'tta losane anḵodaw ya nu awad angaḻa'tta ḵuḵuwam, adim pauliyon.

³¹ Pun ḵoonyu'tta udum da pionyu we ḵoonda ḵan diḵayu.

³² “Nu ayatonyu we abus da tagu we angayat ḵan diḵayu, gungunaan ḵad ain Apudyus diḵayu? Naid te taḵon ay da ḵabasbassuḻan, ayatonda bos da angayat ḵan dida!

³³ Ḵad nu ḵoonyu we abus da ambaḻu'tta angwa'ḵ ambaḻu ḵan diḵayu, magungunaan ḵayu ḵad ain? Naid te taḵon ay da ḵabasbassuḻan, ḵoonda bos ḵaḵna!

³⁴ Ḵad nu abus aḵ pagawatanyu da tagu we angipauli'tta gawatonda ḵan diḵayu, magungunaan ḵayu ḵamman? Taḵon ay da ḵabasbassuḻan, anggaggawatda te namnamaondae pauliyonda.

³⁵ Yaḵon ayatonyu da ḵabusuḻyu ya ḵoonyu da ambaḻu ḵan dida, ḵad pagawatanyu dida taḵon ay nu adiyupun namnamaone ipaulida. Nu ḵoonyu ḵaḵna, daḵoḻ gungunayu ya miyiyap ḵayu'tta abeng ni Ḵangatuwane Apudyus. Te aḵ Apudyus, an-anggom atta lawweng ya da adipun antawili.

³⁶ Pun patilayun ḵayu oḵyan ḵumadagu we isun Apudyus we Amayu we patilayun ḵumadagu.”

Sa Mipanggob Atta Anḵuwis Atta Udum

³⁷ “Adiyu ḵuwison ḵan pabasuḻon da asintataguyu ta adin os Apudyus ḵuwison ḵan pabasuḻon diḵayu. Sa ḵoonyu, pakawanonyu dida ta pakawanon os Apudyus diḵayu.

³⁸ Ḵad mamaḵ-atod ḵayu woḵ mamaḵ-atod os aḵ Apudyus ḵan diḵayu te sa ḵaadun ni ittonyu, isuna bos ḵaadun ni itton Apudyus. Sa inon Apudyus we angitod, isunan iḵisuna ya pitpitona ḵad dinog-ana ta lumangbis.”

³⁹ Pun impanin Jesus woḵ ḵanana, “Lamog ḵamman ni naḵuḻap ipuyut asinḵuḻapna? Nu ḵoonda ḵaḵna, aaddi ye maottagdae duwa'tte abut.

⁴⁰ Naippun os uswila'ḵ nangatu nu sa mistuluna yaḵon nu gangputona uswilana, isuna mistuluna.”

⁴¹ “Ngaipam ay siya itotollong buḻaw si atan ni asintatagum ya adimpun maila setap si atam!

⁴² Ngaipam ḵamman ḵanan atte asintatagume, ‘Ḵaanoḵ ud buḻaw si atam,’ ya adimpun ilan setap si atam? Ḵapappailaḵa! Umuna oḵyane ḵaanom setap si atam ta pumataḵ ilam ya lamognu ḵaanon buḻaw si atan ni sunudnu.”

Sa Ḵayu Ya Sa Bungana

⁴³ Ḵanan os Jesus we nangipani, “Naippun ambaḻu'ḵ ḵayu'ḵ lawweng ibungana ya naippun os lawweng aḵ ḵayu'ḵ ambaḻu ibungana.

⁴⁴ Te sa bungan ni sin-ossaossae ḵayu angipaila si kalasina. Te daḵampun aḵ mabuḻasan de fig atte uwoy ya daḵampun os aḵ mabuḻasan da de grape atte laslasi.

⁴⁵ Isuna ditaḵu, sa ambaḻu we tagu, ambaḻu da ugudona te siya mapopompon atte somsomoḵna. Ḵad sa lawwenge tagu, lawweng os ugudona te siya mapopompon atte somsomoḵna. Te sa mapopompon atta somsomoḵyu, siya bos ugudonyu.”

Da Duwae Antaḵad Aḵ Boḻoy

⁴⁶ “Ngaipayu ḵamman ngannon saḵon ‘Apu, Apu,’ ya adiyupun tuttuwaon da ibagaḵ?

⁴⁷ Sa umali ḵan saḵon ya ḵoona da dingngoḻna, annaya mipaniyana.

⁴⁸ Isuna tagu we nantaḵad aḵ boḻoy. Ḵummaub aḵ adaḻom atte luta inggana'ḵ indasana batu woḵ insaadna boḻoyna. Lummitap ḵad, tinupaḵan ni danum boḻoyna, adipun paat nagitot te nagagaaman nisaadana.

⁴⁹ Yaḵon sa andongoḻ ya adinapun igunay, isuna tagu we nantaḵad aḵ boḻoyna ya adinapun insaad si labaw ni batu. Pun tinoddaḵ ḵad ni danum boḻoyna, ḵawagase niwaḵas.”