Luke 4 - Sa Ugud Apudyus

Sa Namadasan Satan Nanulisugan Ḵan Jesus

¹ Nabonyagan ḵad aḵ Jesus, ummoyone naḻpu'tte tawwang Jordan. Pun inniinggaw ḵabooḻan ni Ispiritu Santu ḵan siya woḵ impuyutna'tte bumbummaaw.

² Sa inninggawana ḵad aḵ opatpuḻu we aḻgaw sidi, pinadas Satan sinulisug. Sa sadi ye timpu, naippun nanganan Jesus inggana'ḵ nauḻauḻat.

³ Ḵanan Satan ḵan Jesus, “Nu siḵa Abeng Apudyus, bilinom annae batu ta ambalin aḵ tinapay.”

⁴ Ḵanan Jesus, “Nigili si Ugud Apudyus, ‘Daḵampun aḵ abus maḵan aḵ iḵatagun ni tagu.’ ”

⁵ Pun inḵasin Satan intallay aḵ Jesus si antaḵnataḵnange beleg woḵ impailana ḵan siya si sinḵispayan da losane ampangatan atte lubung,

⁶ woḵ ḵanana, “Siḵa angittaḵ atte ḵaḻabbongane angipangat ḵan dida ta anḵuwam da losane binaḵnangda. Te saḵon naattanda, ḵad ittoḵ si ngaimane pioḵ angittan.

⁷ Nu andayawḵa ḵan saḵon, anḵuwam da losan.”

⁸ Ḵanan Jesus, “Adiḵpun te ḵanan ni nigili ye Ugud Apudyus, “ ‘Sa Apu we Apudyusnu, siya abus aḵ dayawom ḵan anserbiyam.’ ”

⁹ Pune sadi, intallay Satan aḵ Jesus ad Jerusalem woḵ pinataḵdogna'tte ḵataḵnangan ni templo. Ḵanana bos, “Nu siḵa Abeng Apudyus, an-ottagḵa

¹⁰ te sa nigili'tte Ugud Apudyus, “ ‘Bilinona da anghelna'tte mipanggob ḵan siḵa ta guwaḻdaanda siḵa.’

¹¹ Ḵad ‘atta imada tapayaonda siḵa, ta adi da suḵim mitupaḵ atte batu.’ ”

¹² Ḵanan os Jesus ḵan siya, “Adiḵpun te ḵanana bos si Ugud Apudyus, ‘Adim padason aḵ Apu we Apudyusnu we ipailana ḵan siḵa ayyuwanna.’ ”

¹³ Pun ginangput ḵad Satan ḵingwa da nankalakalasi ye sulisug, tinenana'ḵ Jesus inggana si umali ye aḻgawe awad wayanae anulisug ḵasin ḵan siya.

Sa Nangisaḻdan Jesus We Nantuttudu

¹⁴ Pune sadi, nipauli'ḵ Jesus si probinsiya'd Galilee, iinggaw ḵabooḻan ni Ispiritu Santu ḵan siya. Nandinongoḻ ugud mipanggob ḵan siya'tta losane nampaliḵwose ili.

¹⁵ Pun nantuttudu'tta sinagoga woḵ intaḻayag da losane tagu.

Sa Nangidiyanan Da INazareth Ḵan Jesus

¹⁶ Aḵ Jesus ḵad, ummoy ad Nazareth we dummaḵoḻana. Dummatong ḵad umillongan da Judyu, ummoy atte sinagoga te siya ugalina. Pun tummaḵdog ta siya amasa si nigili ye Ugud Apudyus.

¹⁷ Naitod ḵan siya da inggilin Profeta Isaiah. Binuḵyagna ḵad, indasana sanae nigili woḵ ḵananae namasa'tta tagu,

¹⁸ “Sa Ispiritu Santu anna ḵan saḵon, te dinutuḵanaḵ aḵ angiwaḻagawag atte Ambaḻu we Damag atta ḵapus ya atta baḻud Satan ta mapuḵayanda, ya diyatoḵ atan da naḵuḻap. Imbuunaḵ os ta puḵayaḵ da ampaḵapaḵaḻam

¹⁹ ḵad iwaḻagawagḵu we dumatong timpu we angipail-an Apudyus atte ḵadaguna'tta tagu.”

²⁰ Ginangput ḵad Jesus binasa, niluḵubna woḵ impaulina'tte tagu we ḵambiyange nangitod ḵan siya woḵ tummuḵdu ta antuttudu. Nausisoḵ pagay atan da losane tagu si sinagoga ḵan siya.

²¹ Ḵanana ḵan dida, “Sinsadi ye aḻgaw, nituttuwa sanae Ugud Apudyus atte nandodongngoḻanyu.”

²² Losan da tagu nan-ugud aḵ ambaḻu mipanggob ḵan Jesus te nataagda'tte allin-awae nan-uugudna. Inninggaw os da sin-aayutimtime ḵananda, “Daḵampun ḵamman aḵ siya abeng Joseph?”

²³ Ḵanan Jesus ḵan dida, “Iniiggammuḵe ibagayu ḵan saḵon ḵaḵnae uuggudone ḵananyu, ‘An-aagas, agasam yane umuna long-agnu.’ Sa pionyu ḵanan, ‘Ḵoom sina'tte ilim da dingngoḻni ye ḵingwam ad Capernaum!’ ”

²⁴ Pinagatupan os Jesus woḵ ḵanana, “Ibagaḵ ḵan diḵayu ḵatuttuwaan, naippun profeta aḵ mapatgan si mismu we ilina.”

²⁵ Ḵanana bos, “Ibagaḵ ḵan diḵayu ḵatuttuwaan, sosomḵonyu naḵwa si timpun Profeta Elijah. Naippun ummudanana'tte tuḻun tawon ya gogwa woḵ amod de nan-iinggin ni luta. Sa sadi ye timpu, taḵon ay nu adu da nabaḻu sina'd Israel,

²⁶ naippun osa ḵan dida'ḵ nibuunan Profeta Elijah ta badangana yaḵon siya nibuunana baḻu we daḵampun aḵ iyIsrael we naḻpu'd Zarephath atte adani si ili'd Sidon.

²⁷ “Isun os ni timpun Profeta Elisha. Taḵon ay nu adu da tagu we naleprosy sina'd Israel, naippun ossaan aḵ naḵaan saḵitna. Abus aḵ Naaman we iSyria.”

²⁸ Pun dingngoḻ ḵad da losane tagu si sinagoga da imbagana, amod de sangada.

²⁹ Pun summiḵadda woḵ binutbutda illawa'ḵ Jesus atte lasin ni ilida woḵ intallayda'tte igid ni tagudtude ummiliyanda ta umoyda ottagon atte angit.

³⁰ Yaḵon nangoy aḵ Jesus atte gaggawan da tagu woḵ ummoyon.

Sa Namaḻyawan Jesus Atte Aḻan

³¹ Pune sadi, ummoy aḵ Jesus si siyudad ad Capernaum atte probinsiya'd Galilee. Sa aḻgaw ḵade umillongan, ummoy si sinagoga woḵ nantuttudu.

³² Pun nataagda'tte inonae nantuttudu te nan-ugude anna ḵaḻabbongana.

³³ Pune sadi, inninggaw atte sinagoga laḻaḵi ye naaḻanan woḵ ḵananae nambogbogga,

³⁴ “Anii! Jesus we iNazareth, ngaipaḵa umali ḵan diḵani? Ummaliḵa ḵamman ta dadailom diḵani? Igammuḵe siḵa Nasantuwane imbuun Apudyus.”

³⁵ Yaḵon ḵanan Jesus we namilin atte aḻan, “Guminoḵḵa! Ḵumassadḵa ḵan siya!” Pun pinittuwaḵ ni aḻan si sinagung da tagu woḵ ḵummassad atte laḻaḵi ye ippun naḵwa'ḵ lawweng ḵan siya.

³⁶ Sana nataagan da tagu woḵ ḵananda, “Atopay! Ngai nangaḻ-ana'tta ugudona? Annat ḵan siya ḵaḻabbongan ḵan ḵabooḻane amaḻyaw atta aḻane ḵanana, ‘Ḵumassad ḵayu,’ woḵ lummawada.”

³⁷ Pun nandinongoḻ ugud mipanggob ḵan siya'tta nampaliḵwose ili.

Sa Nangaanan Jesus Atta Amode Saḵit

³⁸ Pune sadi, lummawa ḵad aḵ Jesus we naḻpu'tte sinagoga, ummoy si boḻoy da Simon. Inninggaw ḵatugangan Simon we bubai ye amoamod atungna. Pun nandagdaguda ḵan Jesus ta badangana.

³⁹ Ummadani'ḵ Jesus si nasaḵit woḵ binilinnae maḵaan atungna. Pun naḵaan atungna. Pun daguse bummangon woḵ illusnuwana da Jesus.

⁴⁰ Mummasdom ḵad, inniyoy da tagu ḵan siya da losane nasaḵit atta ngaimane kalasin di saḵit. Impatay ḵad Jesus imana'tte sin-ossaossa, naḵaan da saḵitda.

⁴¹ Pinaḻyawna bos da aḻan atta adu we naaḻanan. Lummawada ḵad, ḵanandae simbobogga, “Siḵa Abeng Apudyus!” Sinang-an Jesus dida woḵ adinapun dida iyyunude an-uguugud te iniiggammudae siya Kristu.

Sa Nangiwaḻagawagan Jesus Atte Ambaḻu We Damag

⁴² Wiḵwiḵis ḵad, tinenan Jesus dida ta umoy si bumbummaaw. Nangwa ḵad da tagu, singsingngitda'ḵ Jesus inggana'ḵ indasanda woḵ pinadasda awisone adina tenan dida.

⁴³ Yaḵon ḵanana ḵan dida, “Ḵasapuḻane iyyaḵ atta udume ili ta iwaḻagawagḵu Ambaḻu we Damag mipanggob si ampangatan Apudyus. Te siya gapunae imbuunaḵ.”

⁴⁴ Pune sadi, pinagatupanae ummoy nangiwaḻagawag atta sinagoga si probinsiya'd Judea.