Luke 3 - Sa Ugud Apudyus

Sa Tuttudun John We Ambobonyag

¹ Sa miḵasawaḻ aḵ limae tawon atte nampangatan Emperor Tiberius, aḵ Pontius Pilate Gobernor atte probinsiya'd Judea. Aḵ Herod os Gobernor atte probinsiya'd Galilee ya aḵ Philip we sunudna, nampangat atta Iturea ya ad Trachonitis. Ḵad aḵ Lysanias nampangat ad Abilene.

² Ḵad da Annas ḵan Caiaphas ḵangatuwane padin da Judyu. Sa inninggawan John we abeng Zechariah atte bumbummaaw, inninggaw impaigammun Apudyus ḵan siya.

³ Pune sadi, ummoy John iwwaḻagawag atte nandomange taḻantag ni tawwang Jordan. Ḵanana, “Ibabawiyu da basuḻyu ya agayyu we angwa ya ampabonyag ḵayu ta pakawanon Apudyus diḵayu.”

⁴ Aḵ John ḵad, siya inggilin Profeta Isaiah we ḵanana, “Sa bumbummaaw, awad de angibagbagae ḵanana, ‘Saganaonyu oḵyan daḻan atte umaliyan Apu ya pagodongonyu daḻane ayona.

⁵ Sana da ḵoonyu. Panadonyu oḵyan da beleg ya da tagudtud, piluganyu da dummallug ta tumanap, pagodongonyu da nampiḵḵupiḵḵu, ya panadonyu da ateḵḵeteḵḵe.

⁶ Ta ilanda losane tagu anaguwan Apudyus.’ ”

⁷ Pune sadi, ummoy da amode tagu nampabonyag ḵan siya. Ḵanana ḵan dida, “Diḵayu we ganaḵ ni uḻog! Nankamali somsomoḵyu we nangibagae lamogyu iligsi da long-agyu'tte madusaanyu ḵan Apudyus nu pabonyag ḵayu.

⁸ Adipun paat maḵwa te ḵasapuḻane ḵoonyu da losan ta ipailayu we tuttuwae imbabawiyu da basuḻyu ya iyyagayyu we nangwa. Ḵad adiyu pay maag ḵanane miligsi ḵayu te aḵ Abraham daḵdaḵoḻyu. Annaya ibagaḵ ḵan diḵayu te aḵ Apudyus maḵwae ambalinona da annae batu'ḵ ganaḵ Abraham!

⁹ Sa mipaniyan ni dusayu, isun ni wasaye misaganae ampoḵpoḵ atta ḵayu ya da adipun ambaḻu bungada, mapoḵpoḵda ya niballuda'tte apuy.”

¹⁰ Gapu'tte sadi, amod da tagu we ḵanandae nangim-imus, “Ḵad umpay, ngai ḵoonni?”

¹¹ Ḵanana, “Ngaimane duwa silupna, ittona oḵyan osa'tte ippun silupna. Ḵad sa ansawaḻ aḵ maḵan, angitod oḵyan atta ippun ḵanonda.”

¹² Inninggaw os da andadagup atta bugise ummoy nampabonyag ḵan siya woḵ ḵananda, “Mistulu, ngai ḵoonni?”

¹³ Ḵanana ḵan dida, “Adiyu tuḻ-ayane ansingir.”

¹⁴ Inninggaw os da suḻdadu we ummoy nan-imus ḵan siya woḵ ḵananda, “Diḵani ḵad, ngai ḵoonni?” Ḵanana ḵan dida, “Adiyu ḵoḻḵogon baḵon nu pabasuḻon da ngaimane tagu ta aḻanyu da pilaḵda ḵad mat-op ḵayu oḵyan os atta tangdanyu.”

¹⁵ Gapu'tta sadi ye intuttudun John, ḵanan ni awad atta somsomoḵ da tagu, “Siya nin namnamaon taḵu? Siya nin Kristu?”

¹⁶ Ḵanan John ḵan dida, “Bonyagaḵ diḵayu si danum. Yaḵon sa umali ye nangatngatu nu saḵon, bonyagana diḵayu si Ispiritu Santu ḵan apuy. Gapu si ḵinangatuna, naippun labbongḵu we anguḵas si sandalna.

¹⁷ Naḵasaganae anguwis atta tagu ḵad mipani anḵuḵuwisna'tte tagu we naḵasaganae antopa si de wheat. Sa bogas ni de wheat, dagupona ya igappotna'tte aḻangna. Yaḵon sa losane dugi, aminona aḻan ya soggona'tte apuye adipun masobsoban.”

¹⁸ Ḵaḵna intuttudun John ya indogana bos da udum atte nangibag-ana ḵan dida'tte Ambaḻu we Damag.

¹⁹ Dam-on os John sinuppaḵan aḵ Gobernor Herod gapu'tte ḵingwanae inasawana'ḵ Herodias we asawan ni sunudna ya da losane ḵingwana.

²⁰ Pune sadi, ḵingwan Herod de sillumaweng te impaibaḻudna'ḵ John.

Sa Nabonyagan Jesus

²¹ Sa daan John mibaḻudan, sissiyae inninggaw da adu we tagu we binonyagana. Sin-aḻgawan ḵad, binonyagana bos aḵ Jesus. Pune sadi, nalluwaḻu ḵad aḵ Jesus, nabuḵtan ad langit.

²² Pun dummoḻa Ispiritu Santu we isunan kalapati woḵ nansap-oy ḵan siya. Ḵanan ni gingae naḻpu'd langit, “Siḵa Abengḵu we ay-ayatoḵ ya masmas-omaḵ ḵan siḵa.”

Sa Listaan Da Danaḵḵoḻ Jesu Kristu

²³ Sana nangisaḻdan Jesus we nantuttudu'tte batug di tuḻumpuḻu tawonna. Ḵad sa ḵasomsomḵan da tagu, siya abeng Joseph. Aḵ Joseph, siya abeng Heli.

²⁴ Aḵ Heli, abeng Matthat. Aḵ Matthat, siya abeng Levi ye abeng Melchi. Aḵ Melchi, siya abeng Jannai we abeng Joseph.

²⁵ Aḵ Joseph, abeng Mattathias we abeng Amos. Aḵ Amos, abeng Nahum we abeng Esli. Aḵ Esli, abeng Naggai.

²⁶ Aḵ Naggai, abeng Maath. Aḵ Maath, abeng Mattathias we abeng Semein. Aḵ Semein, abeng Josech we abeng Joda.

²⁷ Aḵ Joda, abeng Joanan we abeng Rhesa. Aḵ Rhesa, abeng Zerubbabel we abeng Shealtiel. Aḵ Shealtiel, abeng Neri ye abeng Melchi.

²⁸ Aḵ Melchi, abeng Addi ye abeng Cosam. Aḵ Cosam, abeng Elmadam we abeng Er.

²⁹ Aḵ Er, abeng Joshua we abeng Eliezer. Aḵ Eliezer, abeng Jorim we abeng Matthat. Aḵ Matthat, abeng Levi.

³⁰ Aḵ Levi, abeng Simeon. Aḵ Simeon, abeng Judah we abeng Joseph. Aḵ Joseph, abeng Jonam we abeng Eliakim.

³¹ Aḵ Eliakim, abeng Melea we abeng Menna. Aḵ Menna, abeng Mattatha we abeng Nathan. Aḵ Nathan, abeng Ari David.

³² Aḵ David, abeng Jesse. Aḵ Jesse, abeng Obed we abeng Boaz. Aḵ Boaz, abeng Salmon we abeng Nahshon.

³³ Aḵ Nahshon, abeng Amminadab we abeng Admin. Aḵ Admin, abeng Arni ye abeng Hezron. Aḵ Hezron, abeng Perez, we abeng Judah.

³⁴ Aḵ Judah, abeng Jacob. Aḵ Jacob, abeng Isaac we abeng Abraham. Aḵ Abraham, abeng Terah we abeng Nahor.

³⁵ Aḵ Nahor, abeng Serug we abeng Reu. Aḵ Reu, abeng Peleg we abeng Eber. Aḵ Eber, abeng Shelah.

³⁶ Aḵ Shelah, abeng Cainan. Aḵ Cainan, abeng Arphaxad we abeng Shem. Aḵ Shem, abeng Noah we abeng Lamech.

³⁷ Aḵ Lamech, abeng Methuselah we abeng Enoch. Aḵ Enoch, abeng Jared we abeng Mahalaleel. Aḵ Mahalaleel, abeng Cainan.

³⁸ Aḵ Cainan, abeng Enos. Aḵ Enos, abeng Seth we abeng Adam we ḵingwan Apudyus.