Luke 24 - Sa Ugud Apudyus

Sa Ummuliyan Jesus

¹ Mabigat ḵad atte naḻaḵpus umillongane imbelangda'ḵ umunae aḻgaw ni sindumingguwan, nasapa ummoy da bubai atte libon Jesus, nangawitda si bangbanglu we insaganada.

² Indasanda onob ni libone naligad.

³ Pun nillumnoḵda yaḵon ippun indasanda si ladag Apu Jesus.

⁴ Sissiyada ḵade sintataag, nasaniḵad da duwae laḻaḵi si daḻnigdae sumilisiling da silupda.

⁵ Pun ummobaob da sanae bubbubai gapu'tte ḵimutda yaḵon ḵanan da duwae laḻaḵi ḵan dida, “Ngaipayu sington matattagu si igaw da natoy?

⁶ Naippun aḵ Jesus sina te tinagun Apudyus ḵasin. Naliwatanyu ḵamman imbagana ḵan diḵayu si inninggawanyu'tte probinsiya'd Galilee

⁷ we ḵanana, ‘Sa Abeng Di Tagu, ḵasapuḻane mipuḻang atta ḵabasbassuḻan ya ipattoḻda'tte kros ḵad matagu ḵasin atte miḵaḵlu we aḻgaw?’ ”

⁸ Pun inḵagasmoḵda imbagan Jesus.

⁹ Nipaulida ḵade naḻpu'tte libon Jesus, imbagada'tta nasawaḻan aḵ ossaane disipuluna ya da buḻunda da losane naḵwa.

¹⁰ Sa ngadan ḵad da annae bubai, da Mary Magdalene, Joanna ya aḵ Mary ye inan James. Dida ya da udum ose bubai da ummoy nangibaga'tta apostol atta naḵwa.

¹¹ Yaḵon da apostol adidapun pinati dida te sa somsomoḵda ḵanandapun nu dinodong-og da imbagada.

¹² Yaḵon aḵ Peter ḵad, nanoddaḵe ummoy atte libon. Dummatong ḵad, ummobaob ḵad ta ilana innilana abuse ludune namutiputda ḵan siya. Pun ummoyone natataag nu ngai naḵwa.

Sa Nampail-an Jesus Atta Duwae Disipuluna

¹³ Sa sadi bose aḻgaw, nanadtaddaḻan da duwae disipulun Jesus we umoy atte ili'd Emmaus, sa bootna'd Jerusalem ya ad Emmaus isuna boot ni lamog ni tagu taddaḻanon si umoye tuḻu we oras.

¹⁴ Sa nanadtaddaḻananda, inug-uggudda da losane naḵwa.

¹⁵ Sissiya ḵade an-ug-uggudda, ummadani'ḵ Jesus woḵ nitun-ud ḵan dida.

¹⁶ Yaḵon taḵon ay nu innilada'ḵ Jesus, adidapun naḵaimatun te tinupod Apudyus ta adida imatunan.

¹⁷ Ḵanan Jesus we nan-imus ḵan dida, “Ngai inug-uggudyu si anadtaddaḻananyu?” Nansadangdae mamaḵ-ilae andadauyda.

¹⁸ Pun ḵanan ni osa ḵan didae nangngadan aḵ Cleopas, “Ngai inonae siḵa abus aḵ mangili'd Jerusalem we adi nangigammu'tta naḵwa si naḻaḵpuse aḻgaw?”

¹⁹ Ḵanan Jesus, “Ngai ḵad ain da naḵwa?” Summongbatda woḵ ḵananda, “Da naḵwa ḵan Jesus we iNazareth. Siya imbelang Apudyus aḵ profetana ya ḵanan da tagu we siya bos maḵabooḻe angituttudu ya angwa'tta nakaskasdaaw.

²⁰ Ḵad impuḻang da papangat da papadi ya da angipangat ḵan ditaḵu, indaḻumda ta maḵoddongan aḵ matoy woḵ impaipattoḻda'tte kros.

²¹ Yaḵon siya ninamnamani oḵyane anubut ḵan diḵani ye ganaḵ Israel atta ḵabusuḻ taḵu. Yaḵon sinsadi ye aḻgaw, ḵaḵlun aḻgaw ni naḵwaan da annae banag.

²² Sinsadi inggaw naḵwae nataaganni, ummoy ḵad os da bubbubai ye buḻunni nawwiḵis si libon,

²³ naippun indasanda'ḵ ladagna. Pun nipaulidae ummoy nangibagae nampaila da anghel si isun di in-inope nangibaga ḵanane natagu'ḵ Jesus.

²⁴ Pun ummoy ḵad os da udume buḻunni si libon, nataagda te losan atta imbagan da bubai tuttuwa yaḵon ippun os innilada ḵan Jesus.”

²⁵ Pun ḵanan Jesus ḵan dida, “Anḵadong-og ḵayu! Ngaipa anḵamnut amatiyanyu'tta losane imbagan da profetan Apudyus?

²⁶ Maawatanyu oḵyane ḵasapuḻane sa Kristu umunae ampaḵaḻam ya asiyot midayaw.”

²⁷ Pun impaḵaawat Jesus ḵan dida da losane nigili'tte Ugud Apudyus mipanggob si long-agna, nisaḻad atte umunae iblun Moses inggana'tta losane inggilin da profetan Apudyus.

²⁸ Anna ḵade madam-anda miduum atte ayandae ili, isun di anaḵdaḵpus aḵ Jesus,

²⁹ yaḵon ḵanandae nanawid, “Umiyan taḵu sina te annan lumabi.” Pun nibuḻun ḵan dida.

³⁰ Tummuḵduda ḵade angan, innaḻan Jesus tinapay, nanggappiya ḵan Apudyus woḵ binisbisaḵna woḵ innatodna ḵan dida.

³¹ Pun ḵama'ḵ pummadda ilanda woḵ immatunanda'ḵ Jesus yaḵon baag-en ippun ogon ilanda ḵan siya.

³² Ḵananda, “Siya lummayadanta si inggawan taḵu'tte daḻan si nangipaḵaawatana'tta nigili ye Ugud Apudyus.”

³³ Pun daguse nipaulida'd Jerusalem. Indasanda da nasawaḻan aḵ ossaane disipuluna ya da udume nandatdatong sidi,

³⁴ woḵ ḵananda, “Tuttuwae natagu'ḵ Apu woḵ nampaila ḵan Simon!”

³⁵ Pun inug-uggudda da naḵwa'tte daḻan ya sa nangimatunanda ḵan Jesus si namisbisaḵana'tte tinapay.

Sa Nampail-an Jesus Atta Disipuluna

³⁶ Sissiya ḵade ug-uggudonda da sanae naḵwa, natanaḵdog aḵ Jesus we mismu'tte inggawanda woḵ ḵanana, “Lin-awa oḵyan awad ḵan diḵayu.”

³⁷ Yaḵon naḵogwayda ya naḵimtanda te ḵanandapun nu lagayan.

³⁸ Pun ḵanana ḵan dida, “Ngaipa ḵayu maḵimut ya anduwaduwa ḵan saḵon?

³⁹ Ilanyu da imaḵ ya da suḵiḵ ta amati ḵayu we tuttuwae saḵon anna. Appadanaḵ ta mat-op ḵayu. Te sa lagayan ḵad, naippun long-agna ḵan tung-aḻna ḵad ilanyu we wadawadda ḵan saḵon.”

⁴⁰ Nagangput ḵade imbagana da sana, impailana ḵan dida da imana ya da suḵina.

⁴¹ Sissiyae adidapun amati gapu si amode layadda ḵan nantataagda, pun ḵanan Jesus ḵan dida, “Awad ḵamman maḵan sina?”

⁴² Pun innattanda si nautu we ugadiw,

⁴³ woḵ ḵinanna si sinagungda.

⁴⁴ Pun ḵanana ḵan dida, “Da annae naḵwa, ustuustu'tta imbagaḵ si sissiyaaḵ ḵan diḵayu: Losan atta nigili ye lintog Moses ya da profetan Apudyus ya da losane nigili'tte Psalm atte mipanggob ḵan saḵon ḵasapuḻane mituttuwada.”

⁴⁵ Pun sinilawana da somsomoḵda ta maawatanda nigili ye Ugud Apudyus.

⁴⁶ Ḵanana ḵan dida, “Annaya nigili: Ḵasapuḻane ampaḵaḻam ya matoy Kristu ḵad matagu'tte miḵaḵlu we aḻgaw.

⁴⁷ Sa ambabawiyan da tagu'tta basuḻda ya agaydae angwa ya sa amakawanan Apudyus ḵan dida mipagapu ḵan saḵon, ḵasapuḻane miwaḻagawag atta losane ili si lubung misaḻad sina'd Jerusalem.

⁴⁸ Diḵayu we mismu anaḵdoḻe ḵatuttuwaan da innilayu.

⁴⁹ Ḵad saḵone mismu angibuun si inkarin Amaḵ ḵan diḵayu. Yaḵon ḵasapuḻane uwayonyu sina'd Jerusalem inggana'ḵ awatonyu ḵabooḻane maḻpu'd langit.”

Sa Nipangatuwan Jesus Ad Langit

⁵⁰ Pun impuyutna dida'd Bethany woḵ itayagna imanae namindisyun ḵan dida.

⁵¹ Sissiya ḵade ambindisyun, tinenana dida woḵ nipangatu'd langit.

⁵² Pun nandaydayawda ḵan siya woḵ nipaulida'd Jerusalem we amod de layadda.

⁵³ Pun inaḻgawe umoyda'tte paway ni templo andaydayaw ḵan Apudyus.