Luke 23 - Sa Ugud Apudyus

Sa Nipuḻangan Jesus Ḵan Pilate

¹ Pune sadi, losanda lummanibbat ta iyoyda'ḵ Jesus ḵan Gobernor Pilate. Dummatongda ḵad sidi,

² indaḻumda'ḵ Jesus woḵ ḵananda, “Indasanni annae tagu we al-allelawona da susunude ganaḵ Israel. Sa ḵumagwa, ḵananae adiḵanipun oḵyan ambayad si bugis atte Emperor ad Rome ya sa ḵumaḵlu, ḵananae siya Kristu we Ari.”

³ Pun ḵanan Pilate we nan-imus ḵan Jesus, “Siḵa ḵamman Arin da Judyu?” Ḵanan Jesus, “Ustu imbagam.”

⁴ Pun ḵanan Pilate atta papangat da papadi ya da adu we tagu, “Naippun indasaḵ aḵ basuḻ ni annae tagu.”

⁵ Yaḵon ḵanandae nangipatut, “Ginuluguluna da adu we tagu'tte intero we probinsiya'd Judea. Insaḻadnae nantuttudu'tte probinsiya'd Galilee woḵ dummatong ad Judea ya taḵon ay sinsadi sina'd Jerusalem.”

Sa Nipuḻangan Jesus Ḵan Herod

⁶ Dingngoḻ ḵad Pilate imbagan da tagu inimusna ḵan dida ḵanane, “Naḻpu ḵamman annae laḻaḵi si probinsiya'd Galilee?”

⁷ Inigammuna ḵade naḻpu'ḵ Jesus atte probinsiya'd Galilee ye nampangatan Herod, impaiyoyna ḵan Herod te niyaspuḻe inninggaw aḵ Herod ad Jerusalem atte sadi ye timpu.

⁸ Innilan ḵad Herod aḵ Jesus, amod de layadna te nabayage piona ilan te dingngoḻna mipanggob ḵan siya ya piona ilan da nakaskasdaawe sinyale ḵoona.

⁹ Pun adu da inimusna yaḵon adipun paat summongbat aḵ Jesus.

¹⁰ Da papangat ḵad da papadi ya da mimistulun ni lintoge ataḵtaḵdog, amo pinabasuḻda.

¹¹ Pun aḵ Herod nidoga bos atta suḻdadunae nanginsultu ya nangang-angyag ḵan Jesus. Sinilupanda si langgoyode isuna silup da ari woḵ naabus ḵad impaulida ḵan Pilate.

¹² Inggan ni sadi ye aḻgaw, nambuḻbuḻun da Pilate ḵan Herod te sa naḻaḵpuse aḻgaw ambusuḻda.

Sa Naḵoddongan Jesus Aḵ Matoy

¹³ Pun impaayag Pilate da papangat da papadi, da udume papangat da Judyu ya da tagu,

¹⁴ ḵanana ḵan dida, “Indatongyu annae tagu ḵan saḵone ḵananyu we al-allelawona da tagu. Yaḵon andongoḻ ḵayu, sa nanumaḻyaaḵ si sinagungyu naippun indasaḵ aḵ basuḻna'ḵ amanoḵnoḵ atte ipabasuḻyu ḵan siya.

¹⁵ Taḵon ay aḵ Herod, naippun indasana'ḵ ḵingwana te annae impaulina ḵan ditaḵu, pun naippun ustu'ḵ gapunae magongat.

¹⁶ On paaplitḵu ya puḵayaḵ.”

¹⁷ Imbagana sadi te sa ugalin Pilate si tinawon atte Gayagayae ngannonda Nallausan, puḵayana osa'tta baḻude ḵodawon da tagu.

¹⁸ Yaḵon ḵananda losane nanug-uy, “Gongatomot! Aḵ Barabbas pionni ye puḵayam!”

¹⁹ Aḵ Barabbas ḵad, nibaḻud te ginuluna da iJerusalem ya inggaw os gingngatna.

²⁰ Pion Pilate we puḵayan aḵ Jesus te siya ḵasinna naḵaugudan atta tagu,

²¹ yaḵon amo ḵanandae nanug-uy, “Paipattoḻnu'tte kros! Paipattoḻnu'tte kros!”

²² Piḵlun ḵad Pilate we naḵaugud ḵan dida, ḵanana, “Ngaipa? Ngai ḵad ain ḵingwanae gapun ni mapatoyana? Naippun indasaḵ aḵ basuḻ ni annae tagu. Pun taḵon ay nu paaplitḵu ya puḵayaḵ.”

²³ Yaḵon amo nanugtug-uyda impatute ampaipattoḻ ḵan Jesus atte kros inggana'ḵ naabaḵ aḵ Pilate,

²⁴ pun iyyunudna pionda,

²⁵ woḵ pinuḵayana tagu we pionda papuḵaye nibaḻud gapu'tte nangguluwana ḵan ginnumngatana. Yaḵon aḵ Jesus, impuḻangna'tta suḻdadu ta ipattoḻda'tte kros ta mituttuwa pionda'tte mipanggob ḵan siya.

Sa Nipattoḻan Jesus Atte Kros

²⁶ Pun sa nangitallayanda ḵan siya, dinoḵmaanda'ḵ Simon we iCyrene we naḻpu'tta ili ye umoy atte siyudad woḵ impabuḵudda de kros ta mitun-ud ḵan Jesus.

²⁷ Inninggaw os da amoamode tagu we nitun-ud ḵan Jesus ya da bubai ye sin-iibil ḵan andomdom.

²⁸ Yaḵon nantawili ḵad aḵ Jesus ḵanana, “Bubbubai ye iJerusalem, daḵampun oḵyan aḵ saḵon ibilanyu yaḵon siya ibilanyu da long-agyu ya da abengyu.

²⁹ Te aaddi ye dumatong aḻgawe umamdan ampaḵaḻaman ḵad ḵanan da tagu, ‘Amo pian da basig ya da adipun mabugi ḵan ampasusu.’

³⁰ Te sa sanate timpu, ḵodawon da tagu'tta beleg ḵanane, ‘Magday ḵayu ta mabumbunan ḵani.’

³¹ Te nu ḵaḵna ḵoonda ḵan saḵone ippun basuḻḵu we mipani si allilingsi ye ḵayu, aaddi ye sindumallu ḵoonda ḵan diḵayu we naḵabasuḻe mipani si naaḻ-aḻane ḵayu.”

³² Inninggaw os da duwae tulisane imbuḻunda ḵan Jesus ta umoyda midoga magongat.

³³ Dummatongda'tte igawe ngannonda “Battuḵag.” Impattoḻda'ḵ Jesus atte kros. Da duwae tulisan, impattoḻda bos dida'tta de krosda, sa osa'tte madawinanna ya sa osa'tte madawigina.

³⁴ Pun ḵanan Jesus, “Ama, pakawanom dida te ippun igammuda'tte ḵoonda.” Da suḻdadu ḵad, nambubbunutda woḵ nambisbisaḵanda silupna.

³⁵ Summisiḵad da tagu we nambubuya yaḵon insassaud da papangat da Judyu we angigga'ḵ nges-el ḵan siyae ḵananda, “Tinaguna da udume tagu. Taguwona oḵyan long-agna nu tuttuwae siya Kristu we pinilin Apudyus.”

³⁶ Inang-angyag os da suḻdadu. Pun ummadanida ta idawdawda ḵilom ḵan siya,

³⁷ woḵ ḵananda, “Nu tuttuwae siḵa Arin da Judyu, taguwom long-agnu.”

³⁸ Inninggaw os nigili'tte lap-at ni uḻuwan Jesus we ḵanana, “Annaya Arin da Judyu.”

³⁹ Taḵon ay osan tulisane nipattoḻ si daḻnig Jesus, inang-angyagna bose ḵanana, “Daḵampun ḵamman aḵ siḵa Kristu? Taguwom long-agnu ya indogam diḵani!”

⁴⁰ Yaḵon sa buḻunnae tulisan, sinuppaḵana woḵ ḵanana, “Adiḵapun ḵamman maḵimut ḵan Apudyus? An-iisu we naḵoddongan taḵu'ḵ matoy.

⁴¹ Yaḵon dita labbongnae madusa te naḵabasuḻta yaḵon sa annae tagu ippun basuḻna.”

⁴² Pune sadi, ḵanana ḵan Jesus, “Jesus, iḵagasmoḵnu ḵappos saḵon nu umaliḵae ampangat.”

⁴³ Ḵanan Jesus ḵan siya, “Ibagaḵ ḵan siḵa ḵatuttuwaan, sinsadi ye aḻgaw midogaḵa ḵan saḵon ad langit.”

Sa Natoyan Jesus

⁴⁴ Anna ḵade mumamatuḵ, gummiḵbot losane ili inggana'ḵ ummag-agaw,

⁴⁵ te gummiḵbot init. Pun napissay nanḵagwa kortinan ni templo.

⁴⁶ Napapḵaaw aḵ Jesus woḵ ḵanana, “Ama, itaḻgodḵu ḵalidodwaḵ ḵan siḵa.” Imbagana ḵad sadi, naḵaan angosna.

⁴⁷ Innilan ḵad ni kapitan da suḻdadu da sadi ye naḵwa ḵananae nandayaw ḵan Apudyus, “Tuttuwae naun-unan annae tagu!”

⁴⁸ Da adu we tagu we nadagupe namubuya, innilada ḵad da naḵwa ḵesandae ḵinabḵabḵabda da baḻuḵungda te andomdomda.

⁴⁹ Yaḵon da losane buḻbuḻun Jesus ya da bubai ye nibuḻune naḻpu'tte probinsiya'd Galilee, summisiḵaddae nan-oottap.

Sa Nilibonan Jesus

^50-51 Inninggaw laḻaḵi ye nangngadan aḵ Joseph we iyArimathea we osae ili si probinsiya'd Judea. Siya ḵad, ambaḻu ya naun-unan, pasigna uuwayon dumaḵngan ni ampangatan Apudyus. Osa'tta ḵuḵunsisaḻ yaḵon adipun ummapyu si nan-uunudan da buḻunna ya sa ḵingwada ḵan Jesus.

⁵² Aḵ Joseph, ummoy ḵan Pilate ta umoyna ḵodawon ladag Jesus.

⁵³ Pun ummoyna impas atte kros woḵ putiputana'tte itaḵe sinnun woḵ asinaot ummoy illibon si liyange ḵaḵḵopyae natiḵitiḵane batu we naippun nilibon.

⁵⁴ Sa gapun ni nangwaana si sadi, madam-an misaḻdan ni umillongan da Judyu te masdom ni ansaganaan da Judyu.

⁵⁵ Da bubbubai ḵade naḵaoy ḵan Jesus we naḻpu'tte probinsiya'd Galilee, nibuḻunda ḵan Joseph woḵ innilada nangilibonana ḵan Jesus ya sa inonae nangilibon.

⁵⁶ Pun ummoyonda ta umoyda isagana lana ḵan bangbanglu ta siya asida umoy iyappus si ladag. Yaḵon sa umillongan, ummillongda te siya lintogda.