Luke 22 - Sa Ugud Apudyus

Sa Inondae Angongat Ḵan Jesus

¹ Madam-an Gayagayan da Judyu we ngannonda Nallausan ya sa Gayagayae ngannonda Tinapaye Naippun Yeastna.

² Ḵad da papangat da papadi ya da mimistulun ni lintog singsingtonda inondae ampagongat ḵan Jesus we adi maigammu te maḵimutda'tta tagu.

Sa Naḵatuḻagan Judas We Angituyuḵ Ḵan Jesus

³ Pun nillumnoḵ aḵ Satan ḵan Judas Iscariot we osa'tta nasawaḻan aḵ duwae disipulun Jesus,

⁴ woḵ ummoy atta papangat da papadi ya da kapitan da guwaḻda'tte templo ta antutuḻaganda inonae angituyuḵ ḵan Jesus ḵan dida.

⁵ Pun allaylayadda woḵ nan-uugudandae ittanda'ḵ pilaḵ.

⁶ Naabus ḵade iyyunud Judas, insaḻadnae ang-angngit si gundawaynae angituyuḵ ḵan Jesus ḵan dida'tte ḵamaid da adu we tagu.

Sa Angisaganaanda Si Anungus Ni Maḵaḵananda Ḵan Jesus

⁷ Sa umunae aḻgaw dummatong Gayagayan da Judyu we ngannonda Tinapaye Naippun Yeastna, ḵad sadi nangisid-anda si ubbun ni karnero para'tte Gayagayae ngannonda Nallausan.

⁸ Pun imbuun Jesus da Peter ḵan John woḵ ḵanana, “Inḵayu isagana ḵanon taḵu'tte Gayagayae ngannon taḵu Nallausan.”

⁹ Ḵananda, “Dinu piome inḵani angisaganaan?”

¹⁰ Ḵanana ḵan dida, “Dongngonyu, nu lumnoḵ ḵayu'tte siyudad awad de laḻaḵi ye abotonyu we ummoy nanaḵdu. Tun-udonyu si boḻoye lumnoḵana,

¹¹ ḵad ḵananyu si simboḻoy, ‘Paimus ni mistulu taḵu ḵan siḵa nu dinu kuwartu we anḵaḵaḵananda'tta disipuluna'tte timpun ni Gayagayae ngannon taḵu Nallausan?’

¹² Ḵad ipuyutna ḵan diḵayu aḻwae kuwartu'tte ngatu we nisagana da ḵasapuḻan. Isaganayu da ḵanon taḵu sidi.”

¹³ Pun ummoy ḵad da sadi ye duwa, tuttuwa da losane imbagan Jesus ḵan dida. Pun insaganada da ḵanonda si Gayagayae ngannonda Nallausan.

Sa Anungus Ni Naḵaḵanan Jesus Atta Disipuluna

¹⁴ Dummatong ḵad ustu we timpu, naḵatuḵdu'ḵ Jesus atta apostolna ta anganda.

¹⁵ Ḵanana ḵan dida, “Pioḵe midoga ḵan diḵayu we angan si annae Gayagayae ngannon taḵu Nallausan, asiyaḵot ampaḵaḻam.

¹⁶ Te annaya ibagaḵ ḵan diḵayu, adiyaḵpun ogon angan atte ḵaḵnae gayagaya ingganae mituttuwa ḵapatog ni Gayagayae ngannonda Nallausan atte ampangatan Apudyus.”

¹⁷ Pun innaḻan Jesus tasae naḵuan atte bayase grape woḵ ḵananae nanggappiya ḵan Apudyus, “Aḻanyu anna ta an-at-atabanyu.

¹⁸ Te annaya ibagaḵ ḵan diḵayu, misaḻad sinsadi adiyaḵpun ḵasin uminum atte bayase grape inggana'ḵ dumatong ampangatan Apudyus.”

¹⁹ Pun innaḻana bos tinapay woḵ nagangput ḵad nanggappiya ḵan Apudyus, binisbisaḵna woḵ ḵananae nangitod ḵan dida, “Sana long-agḵu we ittoḵ ḵan diḵayu. Pasigyu ḵoon ḵaḵna ta angiḵagasmoḵanyu ḵan saḵon.”

²⁰ Naabus ḵade ḵinanda, innaḻana bos sintasae bayase grape woḵ ḵanana, “Sa annae natasae bayas, sana Baru we Tuḻag Apudyus atta tagu we amanoḵnoḵ atte daḻaḵe pumoy-as nu matoyaḵ para ḵan diḵayu.

²¹ “Yaḵon ibagaḵ ḵan diḵayu we sa angituyuḵ ḵan saḵon, awad sinsadi ye maḵaḵan ḵan ditaḵu.

²² Saḵone Abeng Di Tagu, ḵasapuḻane matoyaḵe mibatay si planun Apudyus atte awe. Yaḵon ḵaddagu tagu we angituyuḵ ḵan saḵon.”

²³ Pun nan-asiimusda nu ngai ḵan dida angwa'tte ḵatti.

Sa Ḵangatuwan

²⁴ Unipun, nansosongbat da disipulun Jesus nu ngai ḵan dida mibelange ḵangatuwan.

²⁵ Ḵanan Jesus ḵan dida, “Da ari ya da losane papangat atte lubung, ipatutda da pionda'tta ipangatanda ḵad piondae mangadananda'ḵ bumabbadang.

²⁶ Yaḵon daḵampun oḵyan aḵ ḵaḵnat ḵayu te sa ḵangatuwan ḵan diḵayu ḵasapuḻane ibelangna long-agna'ḵ isun di siya ḵaabengan ya da papangat ambalinda oḵyan aḵ isun di sammilu.

²⁷ Ngai ḵad ain nangatngatu, sa tumuḵdu we angan si lamisaan baḵon nu sa sammilu? Sa igammuyu, sa tumuḵdu we angan si lamisaan nangatngatu saadna. Yaḵon annaaḵ sinae anserbi ḵan diḵayu we isun di sammilu.

²⁸ “Inninggaw ḵayu ḵan saḵon atta nampaḵaḻamaḵ.

²⁹ Pun ittoḵ ḵan diḵayu ḵalintogane ampangate isun ni innatod Amaḵ ḵan saḵone ampangat.

³⁰ Ḵooḵ sanat ta midoga ḵayu ḵan saḵon maḵainum ya maḵaḵan si ampangataḵ ya tumuḵdu ḵayu bos si trono we ampangat ḵan anguwis atta ganaḵ da nasawaḻan aḵ duwae abeng Israel.”

Sa Nangibag-an Jesus Si Amuḵlitan Peter Ḵan Siya

³¹ Pun ḵanan Jesus ḵan Peter, “Simon, dongngom ḵappos ibagaḵ. Ḵindaw Satan gundawaynae amappadas ḵan diḵayu losan ta ilana nu awad misina ḵan diḵayu we isun ni misinaan ni dugi'tte wheat nu matop-an.

³² Yaḵon illuwaḻuwaḵ siḵa Simon ta adi pammatim maabaḵ ḵad nu ansagungḵa ḵan saḵon, ḵasapuḻane papigsaom oḵyan pammatin da susunudnu we namati.”

³³ Pun ḵanan Peter, “Apu, naabuse naḵasaganaaḵ taḵon ay nu midogaaḵ mibaḻud ḵan maḵaḵatoy ḵan siḵa.”

³⁴ Ḵanan Jesus, “Annaya ibagaḵ ḵan siḵa, daampun anullaḵuḵ ḵawitan si labi'ḵ uni, amiḵluwom puḵlitane igammum saḵon.”

Sa Pilaḵ, Baḵaḻ Ḵan Ispada

³⁵ Pun ḵanan Jesus ḵan dida, “Sa nangibuunaḵ ḵan diḵayu we naippun innaw-awityu'ḵ pilaḵ, baḵaḻ ya sandal, awad ḵad ain nangkuranganyu'tta ngaiman?” Summongbatda woḵ ḵananda, “Naippun tuwa.”

³⁶ Ḵanan Jesus, “Yaḵon sinsadi ḵad, sa awad pilaḵna ya baḵaḻna, ḵasapuḻane awitona ya sa naippun ispadana, ḵasapuḻane umoy oḵyan ngumina taḵon ay nu ḵasapuḻane inginana taḵḵop ni silupna ta maḵangina.

³⁷ Te ḵasapuḻane mituttuwa nigili ye Ugud Apudyus si mipanggob ḵan saḵone ḵanana, ‘Niyiyap atta tulisan.’ Ḵad annan madam-ane mituttuwa.”

³⁸ Ḵananda, “Apu, annaya duwae ispada.” Ḵanan Jesus, “Siya.”

Sa Nalluwaḻuwan Jesus Atte Beleg Olives

³⁹ Pun tinenan da Jesus ya da disipuluna siyudad woḵ ummoyda si Beleg Olives we siya dagusda ḵoon.

⁴⁰ Dummatongda ḵad ḵanan Jesus ḵan dida, “Alluwaḻu ḵayu ta adi ḵayu masulisug.”

⁴¹ Pun bummattawa'ḵ Jesus ḵan dida si isun ni tayud ni mibintuge batu, nanalluḵu woḵ nalluwaḻu.

⁴² Ḵanana, “Ama, nu piom, iligsim oḵyan saḵon si annae ampaḵaḻamane sasangnguwoḵ. Yaḵon daḵampun aḵ sa pioḵ mituttuwa yaḵon sa piom.”

⁴³ Pun nampaila ḵan siya anghel we naḻpu'd langit woḵ pinaḵosdoḻna.

⁴⁴ Ḵad gapu'tte ummamdane ampaḵaḻamana, pummangoge nalluwaḻu woḵ sa lingotna isunan daḻae nantottod si luta.

⁴⁵ Naabus ḵad nalluwaḻu, nipauli si igaw da disipuluna woḵ indasana didae masusuyop te naayongda'tte ummamdane babauyda.

⁴⁶ Pun ḵanana ḵan dida, “Ngaipa ḵayu masusuyop? Bumangon ḵayu ta alluwaḻu ḵayu ta adi ḵayu masulisug.”

Sa Nanoḵmaanda Ḵan Jesus

⁴⁷ Sissiya ḵad aḵ Jesus we maḵaug-uggud atta disipuluna, nadanatong da adu we tagu we impuyut Judas we osa'tta nasawaḻan aḵ duwae disipuluna. Ummadani ḵan Jesus ta ogoḵanae isun di pakumustaona ta mipailae ambuḻbuḻunda.

⁴⁸ Yaḵon ḵanan Jesus, “Judas, ngaipam ogoḵe sinyal ni layad ambalinon aḵ sinyal ni angituyuḵam ḵan saḵone Abeng Di Tagu?”

⁴⁹ Innilan ḵad da disipulu maḵwa ḵan siya ḵananda, “Apu, maḵababbaḵag ḵani ḵan dida?”

⁵⁰ Pun ummadani osa'tta disipuluna woḵ binaḵagna madawinane ingan ni musassun ni ḵangatuwane padi.

⁵¹ Yaḵon ḵanan Jesus, “Ustu!” Pun iyyappadna imana'tte ingan ni musassu woḵ nipaḻ-og.

⁵² Pun ḵanana'tta papangat da papadi, da kapitan da guwaḻda si templo ya da pallakayon da Judyu we ang-angngit ḵan siya ta doḵmaanda, “Tulisanaḵ ḵamman ta ummali ḵayu we ampaḵ-odon aḵ ispada ḵan pang-oḵe umoy anoḵma ḵan saḵon?

⁵³ Inaḻgawe inninggawaḵ ḵan diḵayu'tte paway ni templo we antuttudu, adiyupun saḵon dinoḵmaan. Yaḵon sinsadi, annae dummatong timpuyu we inḵoddong Apudyus ya dummatong os timpun Satan we angipangat atte giḵbot.”

Sa Namuḵlitan Peter Ḵan Jesus

⁵⁴ Pun dinoḵmaanda'ḵ Jesus woḵ iyoyda si boḻoy ni ḵangatuwane padi. Aḵ Peter ḵad, nituntun-ude naktay ḵan dida'ḵ panos.

⁵⁵ Yaḵon nan-apuyda ḵad atte gawan ni naliḵube paway ta an-aniduda, ummoy naḵatuḵdu'ḵ Peter ḵan dida.

⁵⁶ Pun innilan ni babaḻasange sammilu te nalangḻangan atte apuy, immumusḵoḻna woḵ ḵanana, “Sa annae laḻaḵi, osa'tta buḻun Jesus.”

⁵⁷ Yaḵon ḵanan Peter we namuḵlit, “Naippun igammuḵ ḵan siya.”

⁵⁸ Panos ḵad, inninggaw os laḻaḵi ye nangimatun ḵan siya woḵ ḵanana, “Siḵa osa ḵan dida.” Yaḵon ḵanan Peter, “Daḵanaḵpun.”

⁵⁹ Naḻaḵpus ḵad sin-orasan, inninggaw os osae laḻaḵi ye ḵananae nangipatut, “Tuttuwae osa'tta buḻun Jesus te siya ḵad os naḻpu'tte probinsiya'd Galilee.”

⁶⁰ Yaḵon ḵanan Peter, “Sa ḵatuttuwaan ippun igammuḵ si sanate ugudonyu.” Daampun ḵad magangput ugudona, nanullaḵuḵ ḵawitan.

⁶¹ Pun natanawili'ḵ Apu Jesus we nangimumuskoḻ ḵan Peter woḵ inḵagasmoḵna imbagan Apu ḵan siyae ḵanana, “Daampun anullaḵuḵ ḵawitan si labi'ḵ uni, amiḵluwom saḵon puḵlitan.”

⁶² Pun ḵesan woḵ ummibiibil.

Sa Nangang-angyaganda Ḵan Jesus

⁶³ Da nanguwaḻda ḵan Jesus, inang-angyagda ya inap-aplitda.

⁶⁴ Pun binungutda bos atana woḵ ḵanandae nangang-angyag, “Sinsadi nu lamognu pugtuwan, ibagam ḵan diḵani nu ngai nangaplit ḵan siḵa.”

⁶⁵ Ḵad nan-ibagada'tta adu we banage nangamsew ḵan siya ḵad nan-uguugudanda'ḵ lawweng.

Sa Nanumaḻyaanda Ḵan Jesus

⁶⁶ Anna ḵade pumadda, inniyoyda'ḵ Jesus atte igaw da ḵuḵunsisaḻ we nandaḵdaḵngan da pallakayon da Judyu, da papangat da papadi ya da mimistulun ni lintog.

⁶⁷ Ḵananda ḵan siya, “Ibagam ḵappos ḵan diḵani nu siḵa Kristu?” Summongbat aḵ Jesus woḵ ḵanana, “Taḵon ay nu ibagaḵ, aaddi ye adiḵayupun amati.

⁶⁸ Ḵad nu awad imusoḵ ḵan diḵayu, adiyupun songbatan.

⁶⁹ Yaḵon sinsadi, saḵone Abeng Di Tagu, tumuḵduwaḵ si madawinan Apudyus we maḵabooḻ atta losan.”

⁷⁰ Pun amo sinootda woḵ ḵananda, “Siḵa ḵad ain Abeng Apudyus?” Ḵanana, “Diḵayu we mismu nangibaga'tte sanat.”

⁷¹ Pun ḵananda, “Ngaipa taḵu ḵasapuḻane awad anaḵdoḻ? Annae dingngoḻ taḵu we mismu imbagana.”