Luke 21 - Sa Ugud Apudyus

Sa Atod Ni Baḻu

¹ Pune sadi, nallangḻanga'ḵ Jesus woḵ innilana da babaḵnange an-itub-ung atta atodda'tte iiggaan da atod atte templo.

² Innilana bos ḵapuse baḻu we nangitub-ung aḵ duwae anḵabaḻan-oge ḵulipangpang.

³ Pun ḵanan Jesus, “Ibagaḵ ḵan diḵayu ḵatuttuwaan, naad-adu intub-ung ni annae ḵapuse baḻu nu da losane nangitub-ung si iiggaan atta atod.

⁴ Te innatodda da nasawaḻ atta binaḵnangda. Yaḵon sa baḻu ḵad, taḵon ay nu ḵapus, innatodna losane iḵataguna.”

Sa Mipanggob Si Madadailan Ni Templo

⁵ Da udum ḵad atta disipulu, siya ug-uggudonda mipanggob atte ḵinabaḻun ni templo te ampapatoge batu ḵopyana ya naam-ammaan atta ambabaḻu we nidatun ḵan Apudyus. Pun ḵanan Jesus,

⁶ “Ilanyu sinsadi da sana. Yaḵon sa umali ye aḻgaw, maamin miḵisob da sana ya miwalis ta naippun mabun-an taḵon ay ossaane batu si igawna.”

Sa Ampaḵaḻaman Atte Umali Ye Aḻgaw

⁷ Pun ḵanandae nangimus, “Mistulu, ḵamaan ni maḵwaan ni imbagam ḵan diḵani ḵan ngai sinyale angigammuwanni ye madam-an dumaḵngan ni sanae aḻgaw?”

⁸ Pun ḵanana, “Ummanyu ta adi ḵayu maallelaw. Te sa umali ye aḻgaw, adu da tagu we umali ya usaronda ngadanḵu we ang-angwadae dida Kristu gapu si ḵanandae ‘Saḵon Kristu,’ ya ḵananda bos, ‘Madam-an dumaḵngan ni sadi ye aḻgawe misaḻdan ni ampangatan Apudyus.’ Yaḵon adiyu unudon dida.

⁹ Ḵad nu dongngonyu we awad gubat ḵan da gulu, adi ḵayu maḵimut. Te ḵasapuḻane umuna maḵwa da sana yaḵon daḵampun aḵ daguse dumatong anungus ni lubung.”

¹⁰ Pinagatupana woḵ ḵanana, “Te anggugubat da adu we ili ya da adu we gubilnu.

¹¹ Awad os da adu we ampaḵimute lunig, inggi ya saḵit atta adu we lugar. Awad os da ampaḵimut ya nakaskasdaawe sinyal ad langit.

¹² “Yaḵon sa daan da sadi maḵwaan, doḵmaanda ḵan ampaḵaḻamon diḵayu. Idaḻumda diḵayu'tta sinagoga ḵad ibaḻudda diḵayu. Gapu si pammatiyu ḵan saḵon, iyoyda diḵayu'tta ari ya da gobernor.

¹³ Ḵad sadi gundawayyu we angibaga si Ambaḻu we Damag ḵan dida.

¹⁴ Imuḻayu'tta somsomoḵyu ta adi ḵayu ambinsaw atta isongbatyu.

¹⁵ Te saḵone mismu angitod ḵan diḵayu si laingyu we an-ugud ta ippun inon da losane ḵabusuḻyu we angngog ḵan diḵayu ya sumullagi'tta isongbatyu.

¹⁶ Taḵon ay da amayu ḵan inayu, da sunudyu, da agiyu ya da buḻbuḻunyu, ituyuḵda diḵayu'tta pangat ta gongatonda da udum ḵan diḵayu.

¹⁷ Ḵad sasangngaan os diḵayu'tta losane tagu gapu ḵan saḵon.

¹⁸ Yaḵon aḵ Apudyus angayyuwan ḵan diḵayu ta taḵon ay ossaan atta buuḵyu naippun mataḻaḵ.

¹⁹ Yaḵon ngaimane angiyattom atta losane ampaḵaḻaman ya gogomgomana pammatina, matagu'ḵ inggana.”

Sa Madadailana'd Jerusalem

²⁰ Ḵanan os Jesus, “Nu ilanyu'd Jerusalem we naliḵwos atta amoamode suḻdadu, sadi angigammuwanyu we madam-an madadailana.

²¹ Pun da inggaw atte probinsiya'd Judea, umawidda oḵyan atta bebbeleg. Da awad atte siyudad, ambaḵwitda oḵyan ya da awad os atte lasin ni ili, adida oḵyan umoy ad Jerusalem.

²² Te sanat timpu we dusaon Apudyus da tagu ta mituttuwa da nigili si ugudna.

²³ Da sadi ye aḻgaw, ḵaddagu da mabugi ya da antagibi. Te umamdan da ampaḵaḻaman te siya timpu we anusaan Apudyus atta tagu si annae luta.

²⁴ Matoy da udum atte gubat ya da udum iyoyda dida'tta adu we nansabasabali ye adayu we ili ta ibaḻudda ya ambalinonda dida'ḵ musassu. Sina'd Jerusalem, oḻgon da Gentil dida ya dida ampangat inggana'tte timpu we amungtuwon Apudyus ampangatanda.”

Sa Umaliyan Ni Abeng Di Tagu

²⁵ Pinagatupan Jesus woḵ ḵanana, “Ḵad awad da nakaskasdaawe sinyale maḵwa'tte init, soḻag ya da bituwon. Ḵad da losane tagu si luta, magulu somsomoḵda ya amo masaliduduwanda gapu'tte andangsoḻe aguduud ni baybay ya sa tupiyaḵna.

²⁶ Ḵade sadi, maalimudong ya mapittuwaḵ da tagu'tte ḵimutda si anguuwayanda'tte maḵwa'tte lubung te mayugayug da losane awad ad langit.

²⁷ Ḵad ilanda saḵone Abeng Di Tagu we umali ye mibuḻun atta libuu. Ḵad ilanda bos ummamdane ḵabooḻaḵ ḵan ummamdane ḵinapaddan ni ḵinaapudyusḵu.

²⁸ Pun nu dumatong misaḻdan da annae maḵwa, papigsaonyu da somsomoḵyu te madam-ane subuton Apudyus diḵayu.”

Sa Maadaḻ Atte Ḵayu We Fig

²⁹ Pun inug-uggud Jesus ḵan dida annae pani woḵ ḵanana, “Sosomḵonyu ḵayu we fig ya da udume ḵayu.

³⁰ Nu ilanyu bose summimitda, mailayu we mismu ya igammuyu we madam-an dagun.

³¹ Ḵad nu ilanyu bose maḵwa da losane imbagaḵ, igammuyu we sinsadi gattoḵe awad ḵan diḵayu ampangatan Apudyus.

³² “Ibagaḵ ḵan diḵayu ḵatuttuwaan, sissiyae matattagu da udume tagu si annae lunap atte mituttuwaan da losane imbagaḵ ḵan diḵayu.

³³ Amungtu losan da awad ad langit ya sina'd luta yaḵon adipun amungtu da ugudḵu.”

Sa Pasig Taḵu Ansasagganaan

³⁴ Pinagatupan Jesus woḵ ḵanana, “Ummanyu ta adi ḵayu midoga'tta umamdane gangganas ni bartek ya adi ḵayu ambinsaw atta ḵasapuḻanyu'tte biyag ta adi ḵayu maaddagan nu mapoḵḵatan umaliyaḵ te adiḵayupun naḵasagana. Sa aḻgawe mipauliyaḵ sina'd luta isun di silu we mapoḵḵatan maboḵas.

³⁵ Maḵwa sana'tta tagu si losane ili sina'd luta.

³⁶ Ansasaggana ḵayu ya alluwaḻu ḵayu ta pumigsa ḵayu ḵan tumuḻod ḵayu we angiyattom atta annae maḵmaḵwa ta maḵwae sumangu ḵayu ḵan saḵone Abeng Di Tagu.”

³⁷ Inaḻgawe ummoy aḵ Jesus nantuttudu'tte paway ni templo ya nilabi ye ummoy atte Beleg Olives.

³⁸ Ḵad da amode tagu, masapada'tta binigbigate umoy atte paway ni templo we andongoḻ atta ibagana.