Luke 20 - Sa Ugud Apudyus

Sa Ḵaḻabbongan Jesus

¹ Sin-aḻgawan ḵad, nantuttudu'ḵ Jesus atte paway ni templo woḵ iwwaḻagawagna Ambaḻu we Damag. Pun ummoy ḵan siya da papangat da papadi, da mimistulun ni lintog ya da pallakayon da Judyu.

² Ḵananda ḵan siya, “Ibagam ud ḵan diḵani nu ngai ḵaḻabbongame angwa'tta anna? Ngai nangitod ḵan siḵa si annae ḵaḻabbongam?”

³ Pun ḵanan Jesus we summongbat ḵan dida, “Anna ud imusoḵ ḵan diḵayu. Songbatanyu saḵon,

⁴ dinu naḻpuwan ni ḵaḻabbongan John we Ambobonyag? Aḵ Apudyus baḵon nu da tagu?”

⁵ Pun ḵanandae nan-uugud, “Ngai isongbat taḵu? Nu ḵanan taḵu we, ‘Naḻpu ḵan Apudyus,’ ḵanana ḵan ditaḵu we, ‘Ngaipayu adi pinati nu?’

⁶ Yaḵon nu ḵanan taḵu we, ‘Naḻpu'tta tagu,’ aaddi ye batubatuwon ditaḵu'tta losane tagu inggana'ḵ matoy taḵu te pinatin da losane profeta'ḵ John.”

⁷ Pun ḵanandae summongbat, “Naippun igammuni nu ngai nangitod.”

⁸ Pun ḵanan Jesus ḵan dida, “Nu ḵaḵnat, umadiḵ os ibaga nu ngai nangitod si ḵaḻabbongaḵe angwa'tta sana.”

Sa Pani Atta Gumagammole

⁹ Pun inug-uggud Jesus annae pani'tta adu we tagu woḵ ḵanana, “Inninggaw tagu we nammuḻa'ḵ amoamode grape si lutana. Pun impatangḵonna'tta udume gumagammole woḵ ummoy atte adayu we ili'ḵ nabayag.

¹⁰ Dummatong ḵad timpu we ambuḻasanda'tta de grape, imbuun ni sinḵuwa osa'tta sammiluna'ḵ umoy angaḻa si billayna. Yaḵon dummatong ḵad, inap-aplit da gumagammole woḵ pinaḻyawdae awwakwakkay.

¹¹ Pun ḵasinna bos imbuun osa'tta sammiluna yaḵon isuna bose inap-aplitda ya ḵingwada da ḵababbain ḵan siya woḵ pinaḻyawdae awwakwakkay.

¹² Piḵlun ḵad di sammilu we imbuunna, sinugasugatda woḵ imballuda'tte lasin ni mumuḻḻaan atta de grape.

¹³ Pun ḵanan ni sinḵuwa'tte mumuḻḻaan atta de grape, ‘Ngai ḵooḵ? Ibuunḵu abengḵu we ay-ayatoḵ, patganda nin ain abengḵu.’

¹⁴ Yaḵon innilan ḵad da gumagammole, ḵanandae nantutuḻag, ‘Annaya angilaḵsun si annae mumuḻḻaan atta de grape. Gongaton taḵu ta anḵuwa taḵu laḵsunna.’

¹⁵ Pun pinaḻyawda'tte lasin ni sadi ye mumuḻḻaan atta de grape woḵ gingngatda.” Ḵanan Jesus, “Ngai nin ay ḵoon ni sinḵuwa'tte mumuḻḻaan atta de grape atta gumagammole?

¹⁶ Dumatong ḵad, gongatona dida ya impaayyuwanna'tta udume tagu mumuḻḻaan atta de grape.” Dingngoḻ ḵad da tagu sana, ḵananda, “Adi oḵyan maḵwa da ḵaḵna!”

¹⁷ Ḵanan Jesus we nangimumuskoḻ ḵan dida, “Ngai ḵad ain pion ni nigili ye Ugud Apudyus ḵanan? “ ‘Sa batu we indiyan da nantaḵad aḵ boḻoy, siya nambalinon Apudyus aḵ ḵapatogane batu we amapagdot atte boḻoy.’

¹⁸ Ngaimane maottag si annae batu magomogomoḵ ya sa tagu we maottagan ni sanae batu magabugabuḵe isun di gabu.”

Sa Mipanggob Atte Bugis

¹⁹ Dingngoḻ ḵad da mimistulun ni lintog ya da papangat da papadi sanae pani, pionda doḵmaane dagus aḵ Jesus te inigammudae inugudna pani'ḵ mibusuḻ ḵan dida. Yaḵon naḵimtanda'tta tagu.

²⁰ Pun inuuwwayda gundawaydae anoḵma ḵan siya. Ḵingwada ḵad, tinangdananda da udume laḻaḵi ya nangibuunda'ḵ umoy anipusiput ḵan Jesus ya ipailadae isudan mataḻgodan. Yaḵon sa planuda, an-im-imusda ḵan Jesus ta awad ḵad isongbatna'ḵ anggadingandae angidaḻum ḵan siya, asidaot doḵmaan ya ummoyda impuḻang si gobernor. Te sa gobernor anna ḵaḻabbonganae anguwis.

²¹ Pun ḵananda ḵan Jesus, “Mistulu, igammuni ye tuttuwa losan da ibagam ya ustu da ituttudum. Ḵad igammuni bose ippun laḵlaḵsigom aḵ tagu te siya ituttudum ḵatuttuwaan mipanggob si pinion Apudyus we ḵoon da tagu.

²² Pun ibagam ud ḵan diḵani nu lisalisonni lintog Moses nu ambayad ḵani'tta bugis atte Emperor ad Rome? Ambayad ḵani baḵon nu umadini?”

²³ Yaḵon inigammun Jesus siḵapda woḵ ḵanana ḵan dida,

²⁴ “Angipaila ḵayu ḵan saḵon aḵ osae palata. Ngai simbosaḻ ya singngadan si anna?” Ḵanandae summongbat, “Aḵ Emperor.”

²⁵ Ḵanan Jesus ḵan dida, “Nu ḵaḵnat, ittonyu ḵan Emperor da ḵuwana ḵad ittonyu bos ḵan Apudyus da ḵuwana.”

²⁶ Pune sadi, ippun indasanda'ḵ anggadinganda'tta imbagan Jesus atte sinagung da tagu woḵ naabus ḵad gummiginnoḵda te nataagda si insongbat Jesus.

Sa Im-imus Atte Umuliyan Da Matoy

²⁷ Pun ummoy da udume Sadducee ḵan Jesus woḵ nan-imusda ḵan siya. Dida osae grupun da Judyu we adipun amati ye umuli da matoy.

²⁸ Pun ḵananda ḵan siya, “Mistulu, sa lintog taḵu we inggilin Moses ḵanana, ‘Nu awad laḻaḵi'ḵ angasawa ya natoye ippun abengda, ḵasapuḻane asaw-on os ni sunudna baḻu. Ḵad nu awad abengda, mibelang aḵ abeng ni natoy.’

²⁹ Pun inninggaw da pitu we ansusunude lallaḻaḵi. Nangasawa panguḻu yaḵon natoy atte daandapun maganaḵ.

³⁰ Pun sa ḵumagwae sunudna inasawana baḻu woḵ natoy ose ippun abengda,

³¹ ya isuna bos atte ḵumaḵlu inggana si ḵumapitu. Ḵatti ḵingwan da sadi ye ansusunud, inasawada baḻu, pun nanḵaḵatoyda losane ippun ganaḵda.

³² Anungusna ḵad, natoy os baḻu.

³³ Sa umali ye aḻgaw atte umuliyan da natoy, ngai ḵan dida ustu we sin-asawa'tte annae bubai te losanda inasawa?”

³⁴ Ḵanan Jesus ḵan dida, “Da tagu'd luta si sanae timpu, an-as-asawada.

³⁵ Yaḵon da tagu we ibelang Apudyus we labbongnae umuli ya midoga ḵan siya'd langit si umali ye timpu, adidapun an-as-asawa.

³⁶ Te adidapun ogon matoye isun da anghel we adidapun ogon matoy ya dida da abeng Apudyus te ummulida.

³⁷ “Taḵon ay aḵ Moses pinanoḵnoḵana umuliyan da natoy. Te sa inggilin Moses si mipanggob atte umapuapuye ḵayu we ḵanana, aḵ Apu siya Apudyus da Abraham, Isaac ya aḵ Jacob.

³⁸ Aḵ Apudyus ḵad, siya Apudyus da matattagu, daḵampun aḵ Apudyus da natoy te da losane amati, matattaguda si antotollongna.”

³⁹ Pun ḵanan da udume mimistulun ni lintog, “Mistulu, tuttuwa da insongbatnu.”

⁴⁰ Inggana'tte sadi, naippun ogon maḵaituḻode an-imus ḵan Jesus.

Sa Mipanggob Ḵan Kristu

⁴¹ Pun ḵanan Jesus ḵan dida, “Ngaipada ḵanane aḵ Kristu ganaḵ Ari David?

⁴² Te aḵ Ari David we mismu, ngannona aḵ Kristu Apuḵ si inggilina'tte iblun da de Psalm. “ ‘Ḵanan Apudyus atte Apuḵ: Tumuḵduḵa'tte madawinanḵu

⁴³ inggana'ḵ oḻgoḵ da ḵabusuḻnu.’

⁴⁴ Pun nu ḵanan Ari David we aḵ Kristu Apuna, ngai inonae ganaḵna bos nu?”

Da Mimistulun Ni Lintog

⁴⁵ Nandodongngoḻ ḵad da losane tagu ḵanan Jesus atta disipuluna,

⁴⁶ “Ummanyu'tta mimistulun ni lintog te piondae alliḵliḵwose ansisillup atta langgoyod. Ampilida'tta ḵabaḻuwane tutuḵduwan atta sinagoga ya pionda bose mapatganda'tta ampakumusta ḵan dida'tta lugar we andaḵdaḵngan da adu we tagu. Ḵad pipionda midayawda nu awad gayagaya.

⁴⁷ Te allelawonda da baḻu ta aḻanda da ḵuḵuwada ya da boḻoyda ḵad anduanduwonda da luwaḻuda si sinagung da adu we tagu ta analingodda'tta ḵoḵoḵḵonda. Sa umali ye aḻgaw amo nadagdagson dusada.”