Luke 19 - Sa Ugud Apudyus

Da Jesus Ḵan Zacchaeus

¹ Anna ḵade lausan da Jesus ad Jericho,

² inggaw baḵnange pangat da andadagup atta bugis, sa ngadanna ḵad Zacchaeus.

³ Piona oḵyan ilan nu ngai'ḵ Jesus yaḵon naippun inona te adu da tagu ya siya ḵad os ansoḵba.

⁴ Pun ummuna nanoddaḵ nu da Jesus woḵ ummoy ḵummaḻab atte ḵayu we sycamore ta awad inonae angila ḵan siya nu lumaus.

⁵ Niduum ḵad aḵ Jesus atte ḵummaḻaban Zacchaeus, nantangad ḵan siya woḵ ḵanana, “Zacchaeus, agagame an-osog te ḵasapuḻane andawosaḵ si boḻoynu sinsadi.”

⁶ Pun nan-osoge dagus aḵ Zacchaeus ya amod pagay layadnae nammangili ḵan Jesus.

⁷ Yaḵon da losane nangila ḵanandae singngongonot, “Ngaipa umoy pamangili si boḻoy ni andi ye ḵabasbassuḻan?”

⁸ Pun tummaḵdog aḵ Zacchaeus woḵ ḵanana ḵan Apu Jesus, “Apu, ittoḵ gogwan da ḵuḵuwaḵ atta ḵapus. Nu awad tagu'ḵ nan-igabaḵ, ipauliḵ aḵ angimpat ḵan siya ḵaadun ni inigabḵu.”

⁹ Pun sa ḵanan Jesus atta tagu si mipanggob ḵan Zacchaeus, “Sinsadi, tinagun Apudyus da annae simbaḻyan atte madusaanda'tta basuḻda te tuttuwae ganaḵ os Abraham gapu'tte pammatina.

¹⁰ Te saḵone Abeng Di Tagu, ummaliyaḵ ta iyyaḵ sington ḵan taguwon da nataḻaḵe tagu.”

Da Naittan Aḵ Pilaḵ

¹¹ Sissiya ḵade andodongngoḻ da tagu ḵan Jesus, inug-uggudna annae pani te madam-anda'd Jerusalem ḵad ḵanandapun nu daguse misaḻad ampangatan Apudyus.

¹² Pun ḵanana, “Inninggaw nangatu we tagu we ummoy atte adayu we ili ta umoyna awaton nadutuḵana'ḵ an-ari ya mipauli.

¹³ Anna ḵade madam-an ayonana, inayagana da simpuḻu'tta sammiluna woḵ linnobna dida'ḵ pilaḵe buḻawan woḵ ḵanana, ‘Paaduwonyu da sanate pilaḵ inggana'ḵ mipauliyaḵ.’

¹⁴ “Yaḵon summanga da ḵailiyana ḵan siya, pun nangibuunda'ḵ udume tagu'ḵ mitun-ud ḵan siyae umoy angibaga'tte osae anutuḵ ḵan siya'ḵ an-ari ye ḵanana, ‘Adinipun paat pione siya an-arini.’

¹⁵ Yaḵon siya pagay nadutuḵan aḵ an-ari woḵ angulin. “Dummatong ḵad, impaayagna da sammilunae nangittana'tta pilaḵ ta imusona nu piga nagalansiyada.

¹⁶ Dummatong ḵad de ummuna, ḵanana, ‘Apu Ari, sa pilaḵe innatodnu ḵan saḵon, simpuḻu nagalansiyaḵ.’

¹⁷ Ḵanan ni Ari, ‘Ambaḻu ḵingwam. Ambaḻuḵae sammilu. Gapu ta mataḻgodanḵa'tte aḵite intaḻgodḵu ḵan siḵa, ampangatoḵ siḵa'tta simpuḻu we siyudad.’

¹⁸ “Ummoy os ḵumagwa woḵ ḵanana, ‘Apu Ari, sa pilaḵe innatodnu ḵan saḵon, lima nagalansiyaḵ.’

¹⁹ Ḵanan os ni Ari, ‘Nu ḵaḵnat, ampangatoḵ siḵa'tta limae siyudad.’

²⁰ “Pun ummoy os ḵumaḵlu woḵ ḵanana, ‘Apu Ari, annaya innatodnu we pilaḵ. Binusdongḵu si luput woḵ inggappotḵu,

²¹ te maḵimutaḵ ḵan siḵa te sangngaanḵa. Ḵad aḻam daḵampun aḵ nallingtam ya apitom os daḵampun aḵ immuḻam.’

²² Ḵanan ni Ari, ‘Lawwengḵae sammilu! Sa imbagam siya anguwisḵu ḵan siḵa. Iniiggammume sangngaanaḵ ya aḻaḵ daḵampun aḵ nallingtaḵ ya apitoḵ os daḵampun aḵ immuḻaḵ.

²³ Ngaipam adi imbangku pilaḵḵu ta nangulinaḵ ḵad, awad oḵyan intuḻ-ayna?’

²⁴ “Pun ḵanana'tta sadi ye ataḵtaḵdog, ‘Aḻanyu sanate pilaḵ ḵan siya ta ittonyu'tte nangdon si simpuḻu we pilaḵ.’

²⁵ “Ḵananda, ‘Apu, awad os simpuḻu ḵan siya!’

²⁶ “Ḵanan ni ari, ‘Annaya ibagaḵ ḵan diḵayu, ngaimane awad ḵan siya te mataḻgodan, ad-adu maatod ḵan siya. Yaḵon ngaimane adipun mataḻgodan, taḵon ay aḵite awad ḵan siya, maḵaan.

²⁷ Yaḵon nu mipanggob os atta ḵabusuḻḵu we adi maḻyad ḵan saḵon aḵ an-arida, idatongyu dida sina ta gongatonyu dida si sinagungḵu.’ ”

Sa Nanaydayawanda Ḵan Jesus Ad Jerusalem

²⁸ Naabus ḵad da pani ye imbagan Jesus ḵan dida, ummuna nanagada'd Jerusalem.

²⁹ Madam-anda ḵad ad Bethphage ya ad Bethany si Beleg Olives, pinaunana da duwa'tta disipuluna,

³⁰ Ḵanana, “Inḵayu si umasi ye ili. Ḵad nu dumatong ḵayu, odasanyu nipungode donkey ye daampun aḵ maḵabayuwan. Ḵad uḵasanyu ya idatongyu sina.

³¹ Nu awad angimus ḵan diḵayu we ḵanana, ‘Ngaipayu uḵasan sanat?’ Ḵananyu, ‘Ḵasapuḻan ni Apu.’ ”

³² Pun ummoyda woḵ tuttuwa da losane imbagan Jesus ḵan dida.

³³ Anna ḵade uḵasanda taḵodna, ḵanan da sinḵuwa, “Ngaipayu uḵasan?”

³⁴ Ḵananda, “Ḵasapuḻan ni Apu.”

³⁵ Pune sadi, inniyoyda ḵan Jesus woḵ iyyap-apda da taḵḵop da silupda'tte odog ni donkey woḵ nangabayuwonda'ḵ Jesus.

³⁶ Pune sadi, nangabayu ḵad aḵ Jesus atte donkey ye umoy ad Jerusalem, da tagu we inninggaw sidi iyyap-apda da taḵḵop da silupda'tte ḵaḻsae ayon Jesus ta idayawda ḵan pasaaḻonda.

³⁷ Madam-anda ḵad ad Jerusalem si daḻane an-osog si Beleg Olives, amod layad da amode disipuluna woḵ insaḻaddae nangidangsoḻ atta gingadae angidaydayaw ḵan Apudyus gapu'tta losane nakaskasdaawe innilada.

³⁸ Ḵananda, “Madaydayaw oḵyan Ari ye umali ye imbuun Apudyus! Lin-awa'd langit. Madaydayaw aḵ Apudyus we ḵangatuwan!”

³⁹ Pun da udum atta Pharisee ye nidoga'tta adu we tagu, ḵananda ḵan Jesus, “Mistulu, paginḵom da annae disipulum.”

⁴⁰ Yaḵon ḵanan Jesus, “Annaya ibagaḵ ḵan diḵayu, nu guminoḵda, mipasani da annae batu andaydayaw ḵan saḵon.”

Sa Nangibilan Jesus Atta IJerusalem

⁴¹ Madam-an ḵad da Jesus ad Jerusalem, innilana sanae siyudad woḵ naḵaibil gapu si daguna.

⁴² Pun ḵanana, “Diḵayu we iJerusalem, inigammuyu ḵad oḵyan da sana malin-awaan ḵayu. Yaḵon sinsadi, adiyupun lamog imatunan te nitataḻuda.

⁴³ Sa umali ye aḻgaw, liḵubon diḵayu'tta ḵabusuḻyu ya sondonda da losane maoy ta naippun inonyu we umawid. Ḵad umadanida ḵan diḵayu si losane suli.

⁴⁴ Aminonda dadailon iliyu ya da losane tagu. Ḵad maamin miwalis da sana ta naippun mabun-an taḵon ay ossaane batu si igawna te adiyupun binigbig umaliyan Apudyus we anagu ḵan diḵayu.”

Sa Namaḻyawan Jesus Atta Allaḵlaḵu Atte Templo

⁴⁵ Dummatong ḵad aḵ Jesus ad Jerusalem, ummoy si paway ni templo woḵ insaḻadnae nampaḻyaw atta allaḵlaḵu,

⁴⁶ woḵ ḵanana, “Nigili'tte Ugud Apudyus we ḵanana, ‘Sa boḻoyḵu boḻoye luluwaḻuwan da tagu.’ Yaḵon nambalinonyu'ḵ inggawan da tulisan.”

⁴⁷ Inaḻgawe nantuttudu'ḵ Jesus atte paway ni templo. Da papangat da papadi, da mimistulun ni lintog ya da udume papangat da Judyu, singsingngitda nu ngai inondae ampagongat ḵan siya.

⁴⁸ Yaḵon ippun inonda te da losane tagu, pipiondae anodongngoḻ atta losane ibagana.