Luke 17 - Sa Ugud Apudyus

Sa Gapun Ni Maḵabasuḻan

¹ Ḵanan Jesus atta disipuluna, “Gagangaye dumatong sulisug atta namati yaḵon ḵaddagu tagu we gapun da sanae maḵabasuḻan.

² Un-unnoyna nu mitaḵod daḵoḻe binatu we gilingan si bagangna ya miballu'tte baybay nu sa sulisugona ta maḵabasuḻ taḵon ay osa'tta annae ḵamḵamae tagu.

³ Pun ummanyu'tta ḵoonyu. “Nu maḵabasuḻ asintatagum suppaḵam ḵad nu ambabawi'tta basuḻna ya agaynae angwa, pakawanom.

⁴ Nu angampitu we maḵabasuḻ ḵan siḵa si sin-aḻgaw ya angampitu umali anḵodaw aḵ pakawan, ḵasapuḻane pakawanom.”

Sa Mipanggob Atte Pammati

⁵ Pun ḵanan da apostol ḵan siya, “Apu, papigsaom ḵappos da pammatini.”

⁶ Pun ḵanana, “Nu awad aḵit aḵ pammatiyu'ḵ isun ni ḵapeet ni buḵoḻ ni mustasa, maḵwae ḵananyu si annae daḵoḻe ḵayu, ‘Mabagutḵa ya nimuḻaḵa si baybay’ woḵ tuttuwaona.”

Sa Ḵewaaḻ Ni Sammilu

⁷ Ḵanan Jesus, “Nu awat di awad sammilun ni osa ḵan diḵayu'ḵ an-aḻadu baḵon nu antangḵon atta karnero, nu dumatonge maḻpu si anḵewaaḻana, ḵanana ḵad ain ḵan siyae, ‘Awwaynu ta anganḵa’?

⁸ Naid yaḵon ḵanana ḵan siya, ‘Inḵa ansuḵat ta isaganam ḵanoḵ ya illusnum inggana'ḵ maabusaḵe angan, ḵad asiḵaot mipasani.’

⁹ Anggappiyaaḵ ḵamman ḵan siya nu tinuttuwana da bilinnu?

¹⁰ Isuna bos ḵan diḵayu, nu ginanggangputyu da losane imbilin Apudyus we ḵoonyu, ḵasapuḻane ḵananyu, ‘Sammilu ḵani ye ḵingwani da ḵewaaḻni.’ ”

Da Simpuḻu We Naleprosy

¹¹ Ummoy ḵad da Jesus ad Jerusalem, nangoyda si boddongna'd Samaria ya sa probinsiya'd Galilee.

¹² Dummatongda ḵad atte osae ili, inabotda da simpuḻu we laḻaḵi ye naleprosy. Summiḵadda'tte battawa,

¹³ woḵ ḵanandae nampoḵaw, “Apu Jesus ḵadaguwam ḵappos diḵani!”

¹⁴ Innilan ḵad Jesus dida ḵanana, “Inḵayu ampaila'tta papadi ta ilanda nu naḵaan da saḵityu.” Inggawda ḵad atte daḻan, pummoḻḵasda.

¹⁵ Innilan ḵad ni osa ḵan didae naḵaan saḵitna, daguse nampauli woḵ indangsoḻnae nandaydayaw ḵan Apudyus.

¹⁶ Nanalluḵu'tte sinagung Jesus woḵ nanggappiya. ISamaria sanae laḻaḵi.

¹⁷ Pun ḵanan Jesus, “Daḵampun ḵamman aḵ simpuḻu da naḵaan da saḵitda? Dimman da siyam?

¹⁸ Ngaipa naippun nampauli'ḵ anggappiya ḵan Apudyus, abus annae Gentil?”

¹⁹ Pun ḵanana'tte sadi ye laḻaḵi, “Tumaḵdogḵa ta inḵan. Sa pammatim gapun ni lummin-awaam.”

Sa Ampangatan Apudyus

²⁰ Sin-aḻgawan ḵad, inninggaw da udum atta Pharisee ye ummoy ḵan Jesus nangimus nu ḵamaan ni misaḻdan ni ampangatan Apudyus atta tagu. Ḵanan Jesus, “Naippun sinyal aḵ angipailae isaḻad Apudyus we ampangat.

²¹ Naippun os angibaga ḵanane, ‘Ilanyu, anna sina!’ baḵon nu ‘Ilanyu, andiya!’ Te sa ḵatuttuwaan, sinsadi awad ḵan diḵayu ampangatan Apudyus.”

²² Pun ḵanana'tta disipuluna, “Dumatong timpu we pionyu ilan Abeng Di Tagu taḵon ay sin-aḵitan yaḵon adiyupun maila saḵon.

²³ Awad da angibaga ḵanane, ‘Ilanyu, awad sidi,’ baḵon nu, ‘Ilanyu, anna sina!’ Yaḵon adiyu paat patiyon, adi ḵayu mibuḻun ḵan dida ta singtonyu saḵon.

²⁴ Te sa mipauliyaḵe Abeng Di Tagu, ilan da losane tagu we isuna anguliyatyatan ni ḵilat ad langit atte losane suli.

²⁵ Yaḵon ḵasapuḻane umunae ampaḵaḻamaḵ ya idiyan da tagu saḵon sinsana.”

²⁶ “Sa ugalin da tagu si timpun ni mipauliyaḵe Abeng Di Tagu, isun ni ugalin da tagu si timpun Noah si awe.

²⁷ Te sa sadi ye timpu angaanganda, an-iinumda ya an-as-asawada inggana si aḻgawe nillumnoḵan da Noah si bapur. Pune sadi nalitap lubung woḵ naaminda naanud.

²⁸ Isun os ni timpun Lot si awe ad Sodom. Da tagu angaanganda, an-iinumda, allaḵuda, angngingnginada, ammuḻada ya amoḻoyda,

²⁹ inggana si aḻgawe tinenan da Lot sadi ye ili. Nagangput ḵad, naottag apuy ya da bumaḻabaḻae batu we ngannonda sulfur we naḻpu'd langit woḵ naamin nadadail.

³⁰ Sanat iissun ni maḵwa si aḻgawe ampail-an ni Abeng Di Tagu.”

³¹ “Sa sadi ye aḻgaw, sa tagu we awad si otop ni boḻoyna, umawid oḵyane dagus ta mataguwana ya adi mataḵtaḵe lumogsade umoy angaḻa'tta ḵuḵuwana. Isun os ni tagu we awad si pappayaw, ḵasapuḻane adi oḵyan mataḵtaḵe mipauli si boboḻoye umoy angaḻa'tta ngaiman.

³² Iḵagasmoḵyu naḵwa si asawan Lot.

³³ Ngaimane tagu we angipatog atte long-agna, matoy pos pagay. Yaḵon sa angiḵatoy atte pammatina ḵan saḵon, itton Apudyus ḵan siya biyag aḵ inggana.

³⁴ Annaya ibagaḵ ḵan diḵayu, nu labi umaliyaḵ awad da duwae masusuyop atte ossaane ḵama, maaḻa osa ya matenan osa.

³⁵ Isun os da duwae bubai ye anggiligiling atte binayu, maaḻa osa ya matenan osa.

³⁶ Ḵad awad os da duwae laḻaḵi ye anḵewaaḻ atte pappayaw, maaḻa osa ya matenan os osa.”

³⁷ Pun ḵanan da disipulunae nangimus ḵan siya, “Apu, dinu maḵwaan da sana?” Summongbat aḵ Jesus we nangipani woḵ ḵanana, “Dinumane igaw da ladag, sadi bos andaḵdaḵngan da gayang.”