Luke 14 - Sa Ugud Apudyus

Sa Nangaanan Jesus Atte Saḵit Ni Laḻaḵi

¹ Sin-aḻgawan ḵad atte umillongan, ummoy aḵ Jesus atte boḻoy ni pangat da Pharisee woḵ naḵaḵan, pune sadi sinipusiputanda nu ngai ḵoona.

² Inninggaw os si sinagungna laḻaḵi ye nallollotog long-agna.

³ Ḵanan Jesus atta nalainge mimistulun ni lintog ya da Pharisee, “Iyunud ḵamman ni lintog taḵu we ḵaanon taḵu saḵit da nasaḵit atte umillongan?”

⁴ Yaḵon gummiginnoḵda. Pun impatayna imana'tte nasaḵit woḵ naḵaan saḵitna. Pun pinaḻyawna.

⁵ Ḵanan Jesus ḵan dida, “Nu maottag abengyu baḵon nu baḵayu si bubun, adiyupun ḵamman umoy itoḵwaḻ taḵon ay nu umillongan?”

⁶ Pune sadi adidapun naḵasongbat.

Sa Bagbaga Atta Naayagan

⁷ Aḵ Jesus ḵad, innilana da naayagane siya pinilida'ḵ tummuḵduwanda da ampapatoge tutuḵduwan, ḵananae nantuttudu ḵan dida,

⁸ “Nu awad angayag ḵan siḵa'ḵ umoy si kasaran, adiḵa umoy maḵatuḵdu si igaw da nangangatu we tagu. Te nu awad naayagan aḵ nangatngatu nu siḵa,

⁹ mabainanḵa nu ḵanan ni simboḻoy, ‘Ḵumassadḵa yan ay si annae tuḵdu ta tumuḵdu annae osa si sanat.’ Pun inḵa maḵatuḵdu'tte igid atta daḵampun aḵ nangangatu we tagu.

¹⁰ Yaḵon nu awad angayag ḵan siḵa'ḵ maḵaḵan, igallapum umoy maḵatuḵdu si igid atta daḵampun aḵ nangangatu we tagu. Asi ḵigad simboḻoye angibaga ḵan siḵa ḵanane, ‘Buḻun, tumuḵduwan da daḵampun aḵ nangangatu we tagu sanat, awwaynu ta inḵa maḵatuḵdu si igaw da nangangatu we tagu.’ Ḵad mapatganḵa'tte antotollong da udume midoga naḵaḵan.

¹¹ Te ngaimane angipangatu si long-agna, mipababa. Ḵad ngaimane angipakumbaba si long-agna, mipangatu.”

¹² Ḵanan Jesus atte nangayag ḵan siya, “Nu an-ayagḵa'tta tagu'ḵ maḵaḵan ḵan siḵa, daḵampun aḵ abus aḵ ayagam da buḻbuḻunnu, da babaḵnange ḵailiyam ya da agim te umoyda bos siḵa ayagan ya nasubbat ḵingwam.

¹³ Yaḵon sa ḵoom ḵad oḵyan, ayagam da ḵamḵama, da naparalaes, da napilay ya da naḵuḻap.

¹⁴ Ḵad pianḵa te taḵon ay nu adida maḵasubbat ḵan siḵa, awatom gunguna te aḵ Apudyus we mismu asi anubbat atte aḻgawe umuli da naun-unane tagu.”

Sa Pani Atte Daḵoḻe Gayagayan Ni Kasar

¹⁵ Dingngoḻ ḵad ni osa'tta naḵaḵan da sanae bagbagan Jesus, ḵanana ḵan siya, “Pian pagay maḵaḵan atte ampangatan Apudyus.”

¹⁶ Pun impanin Jesus we summongbat ḵan siya woḵ ḵanana, “Inggaw osan tagu we nangisagana'ḵ ḵanon da adu we tagu ḵad adu bos da inayagana.

¹⁷ Naabus ḵade nisagana da losan, imbuunna sammiluna'ḵ ummoy nangibaga'tta naayagan ḵanane, ‘Umali ḵayu te nisagana maḵan.’

¹⁸ Yaḵon da naayagan, losanda nallasun, ḵanan ni osa, ‘Adim lawengon, adiyaḵpun maḵaali te ḵasapuḻane iyyaḵ ilan ḵangngin-aḵ we luta.’

¹⁹ Ḵanan os ni osa, ‘Adim lawengon, adiyaḵpun maḵaali te awad da simpuḻu we baḵae nginin-aḵ, pun ḵasapuḻane iyyaḵ yan dida padason anḵewaaḻon.’

²⁰ Sa osa bos ḵanana, ‘Ḵaḵ-asawaaḵ, pun adipun maḵwae umaliyaḵ.’

²¹ “Pun nipauli sammilu woḵ imbagana da losan si apuna. Pun amod de sangan ni apuna woḵ ḵanana si sammiluna, ‘Agagame umoy atte ḵaḻsa ya sa lugar we andaḵdaḵngan da adu we tagu atte ili ta ayagam da ḵapus, da naparalaes, da naḵuḻap ya da napilay ta umalida maḵaḵan.’

²² Pune sadi ummoy. Nipauli ḵad ḵanana si apuna, ‘Apu tinuttuwaḵ da imbilinnu yaḵon sissiyae awad da maigawan.’

²³ Ḵanan ni apuna, ‘Inḵa'tta baḻangnae daḻan ḵan lugar ta inḵa ayagan da udum aḵ umali midoga maḵaḵan ta mapnu boḻoyḵu.

²⁴ Annaya ibagaḵ ḵan diḵayu, naippun osa'tta ummunae inayagaḵ aḵ animsim atte insaganaḵe maḵan.’ ”

Sa Ampaḵaḻaman Da Ambalin Aḵ Disipulun Jesus

²⁵ Sin-aḻgawan ḵad, nitun-ud da adu we tagu ḵan Jesus. Pun nansagung ḵan dida woḵ ḵanana,

²⁶ “Ngaimane maḻyade mitun-ud ḵan saḵon, ḵasapuḻane daḵdaḵoḻ ayatna ḵan saḵon nu sa ayatna'tta amana ḵan inana, sa asawana ya da abengna, da sunudna ya taḵon ay mismu we long-agna te nu adina ḵoon ḵaḵna, adipun maḵwae ambalin aḵ disipuluḵ.

²⁷ Ḵad ngaimane adinapun bubuḵḵudon de krosna ya maḵasaganae ampaḵaḻam ḵan matoy ta mitun-ud ḵan saḵon, adipun mibelang aḵ disipuluḵ.

²⁸ “Pun ḵasapuḻane sosomḵonyu we umuna ampaḵaḻaman ni ambalin aḵ disipuluḵ. Awatna, nu awad osa ḵan diḵayu'ḵ antaḵad aḵ daḵoḻe boḻoy, ḵasapuḻane unaona pattapattaon nu lamogna pilaḵna gastuwon si inggana'ḵ magangput.

²⁹ Te nu adina unaon pattapattaon ya adimpun ni pilaḵna lamog, ampatingga si abuse mataḵad aliḵina ya adipun maḵapagatup. Ḵad em-emeson da losane angila ḵan siya.

³⁰ Ḵananda, ‘Ilanyu ḵad sanae tagu, abus sinaḻdana ya adinapun lamog igangput.’

³¹ Nu awad ari aḵ simpuḻullibu da suḻdaduna ya umoy maḵagubat si ari ye duwampuḻu we libu da suḻdaduna, sosomḵona yan umuna nu lamogna oḻgon da ḵagubatna.

³² Nu pattapattaona ya adinapun lamog oḻgon dida, angibuun aḵ umoy angabot atta ḵabusuḻna'tte sissiyae adayuda ta umoyda imuson nu ngai pionda ta malintogan.

³³ Pun ḵaḵnat os ḵan diḵayu nu pionyu we ambalin aḵ disipuluḵ, ḵasapuḻane tenanyu da losane awad ḵan diḵayu.”

Sa Ippun Anunae Asin

³⁴ Pune sadi, inug-uggud Jesus ḵan dida pani woḵ ḵanana, “Ambaḻu asin yaḵon nu ippun ogon tamtamna, ngai inonae mipauli tamtamna ḵasin?

³⁵ Ḵad naippun paat ogon ḵaaḻ-ana taḵon ay atte luta baḵon nu an-abunu ḵad miballu. Diḵayu we andodongngoḻ, sosomḵonyu da dingngoḻyu.”