Luke 10 - Sa Ugud Apudyus

Sa Nangibuunan Jesus Atta Pitumpuḻu Ya Duwae Disipuluna

¹ Nagangput ḵad, pinilin Jesus da pitumpuḻu ya duwa'tta udume disipuluna. Sinindodwana dida imbuun ta umoyda umuna antuttudu'tta ili ye ayana.

² Ḵanan Jesus we nangipani, “Amoamod da maani yaḵon aḵit da an-ani. Pun iluwaḻuyu ḵan Apudyus we sinḵuwa'tta maani ta angibuun aḵ amoamod aḵ umoy an-ani.”

³ Pun ḵanana, “Inḵayu! Sosomḵonyu anna. Ibuunḵu diḵayu'tta lawweng ya ampaḵimute tagu ḵad isuyun karnero we umoy atte lugar we igaw da tanane asu.

⁴ Adi ḵayu angawit aḵ pilaḵ, baḵaḻ ḵan ansuḵatanyu'ḵ sandal. Ḵad adi ḵayu maḵaug-uggud atta abotonyu te mataḵtaḵ ḵayu.

⁵ “Lumnoḵ ḵayu ḵad atte boḻoy, sa umunae ibagayu, ‘Itton oḵyan Apudyus lin-awa ḵan diḵayu.’

⁶ Ḵad nu pion diḵayu mangiliyon si boḻoyda, aḵ Apudyus angitod si lin-awa ḵan dida. Yaḵon nu umadida mangiliyon diḵayu, adimpun Apudyus itton ḵan dida lin-awa.

⁷ Nu awad ammangili ḵan diḵayu, inggaw ḵayu si boḻoyda inggana'ḵ tenanyu sadi ye ili. Adi ḵayu an-attuattun. Ḵanonyu ḵan inumonyu da ilusnuda te labbongnae matangdanan da anḵewaaḻ.

⁸ “Nu dumatong ḵayu'tte ngaimane ili ya mangiliyonda diḵayu, ḵanonyu da ilusnuda.

⁹ Ḵaanonyu da saḵit ya iwaḻagawagyu'tta tagu we gattoḵe sinsadi awad ḵan diḵayu ampangatan Apudyus.

¹⁰ Nu dumatong ḵayu'tte ngaimane ili ya adidapun diḵayu mangiliyon, inḵayu'tte paway ya ḵananyu we angibaga'tta tagu,

¹¹ ‘Taḵon ay gabun ni iliyu we anna'tta dapanni, ipaḻpagni ta angigammuwanyu we diḵayu asi ḵigad si madusaanyu. Yaḵon aaddi ye igammuwonyu we sinsadi gattoḵe awad oḵyan ḵan diḵayu ampangatan Apudyus.’

¹² Annaya ibagaḵ ḵan diḵayu, nu dumatong anguwisan Apudyus atta losane tagu, nadagdagson dusayu si annae ili nu sa dusan da iSodom.”

Sa Anguwisan Apudyus Atta Tagu

¹³ Ḵanan Jesus atta losane tagu, “Ḵaddagu ḵayu we iChorazin ya diḵayu we iBethsaida! Te nu ḵingwaḵ ad Tyre ḵan Sidon da nakaskasdaawe ḵingwaḵ atta iliyu, tummuḵduda oḵyane ansilup atta saḵu ya dapuḻanda da uḻuda ta ipailadae imbabawida da basuḻda ya iyyagaydae nangwa. Diḵayu ḵad, taḵon ay nu innilayu, adiḵayupun nambabawi'tta basuḻyu.

¹⁴ Nu dumatong anguwisan Apudyus atta losane tagu, nadagdagson andudusana ḵan diḵayu nu da iTyre ḵan iSidon.

¹⁵ Diḵayu ḵade iCapernaum, sosomḵonyu ḵad aine midayaw ḵayu'd langit? Naid! Sa maḵwa, aaddi ye miballu ḵayu'd Hades we igaw da natoye madusaanyu!”

¹⁶ Ḵanan Jesus we nangiyanungus atta disipuluna, “Ngaimane andongoḻ ḵan diḵayu, saḵon dingngoḻna. Ḵad sa angidiyan ḵan diḵayu, saḵon idiyanna. Ḵad sa angidiyan ḵan saḵon, idiyanna bos nangibuun ḵan saḵon.”

Sa Nipauliyan Da Pitumpuḻu Ya Duwa

¹⁷ Sin-aḻgawan ḵad, nipauli da pitumpuḻu ya duwae imbuun Jesus. Ḵanandae allaylayad, “Apu, taḵon ay da aḻan tinuttuwada si pinaḻyawni dida mipagapu si ngadannu!”

¹⁸ Ḵanan Jesus, “Innilaḵ aḵ Satan we naottage naḻpu'd langite isun di ḵilat.

¹⁹ Innatodḵu ḵan diḵayu ḵabooḻan ta oḻgonyu'ḵ Satan. Taḵon ay ngai ḵoonae amadas si ḵabooḻana, adiḵayupun paat madiwdiwat. On, taḵon ay gusdanyu da uḻog ya da gayyaman!

²⁰ Taḵon ay os nu lamogyu paḻyawon da aḻan, daḵampun aḵ siya gapunae allaylayad ḵayu. Sa gapunae allaylayad ḵayu oḵyan, nigili da ngadanyu'd langit.”

Sa Anggappiyaan Jesus

²¹ Sa nangibag-ana'tte sadi, pinalayad ni Ispiritu Santu aḵ Jesus woḵ ḵananae nalluwaḻu, “Ama, ipangatam da losan sina'd luta ya ad langit. Anggappiyaaḵ ḵan siḵa te adimpun impaigammu ḵatuttuwaan atta nalalaing ḵan naadaḻane tagu, siya nangipaigammuwam da napakumbaba ya da antaḻgode isudan abeng. On, ḵingwam ḵaḵna te siya piom.”

²² Pun ḵanan Jesus atta tagu, “Innatod Amaḵ we Apudyus ḵan saḵon da losane ḵabooḻan ḵan ḵinalaing. Iniiggammuna saḵone Abengna ya naippun udum aḵ nangigammu ḵan saḵon. Ḵaḵna bos aḵ Amaḵ. Naippun angigammu ḵan siya, abusaḵ ya da ngaimane tagu we pioḵe angipaigammuwan.”

²³ Pune sadi, nansagung atta disipuluna ta tuttuduwana didae abus. Ḵanana, “Diḵayu ḵad, pian ḵayu te lamogyu ilan da ḵooḵ.

²⁴ Te annaya ibagaḵ ḵan diḵayu, taḵon ay nu adu da profeta ḵan da ari atte awe ye pionda ilan da innilayu, adidapun innila dida. Taḵon ay os nu pionda dongngon da dingngoḻyu, adidapun dingngoḻ dida.”

Sa Ḵumadagu We ISamaria

²⁵ Inninggaw osa ḵan didae nalainge mistulun ni lintoge tummaḵdog woḵ ḵananae namadas ḵan Jesus, “Mistulu, ngai ambaḻu we ḵooḵ ta ittanaḵ ḵan Apudyus atte biyag aḵ inggana?”

²⁶ Ḵanan Jesus, “Ngai binasam si nigili ye Lintog Apudyus? Ngai piona ḵanan?”

²⁷ Ḵanana, “Nigili'tte Ugud Apudyus, ‘Ḵasapuḻane ayatom aḵ Apu we Apudyusnu atte amine pusum ya amine ḵalidodwam ya amine ḵinosdoḻnu ya amine somsomoḵnu.’ Nigili bose, ‘Ḵasapuḻane ayatom da asintatagume isun ni an-aayatnu si long-agnu.’ ”

²⁸ Ḵanan Jesus, “Ustu insongbatnu! Ḵoom da ḵaḵna woḵ mataguḵa'ḵ inggana.”

²⁹ Yaḵon piona panoḵnoḵane siya ḵad naun-unan. Pun ḵasinna bos ḵanane nan-imus ḵan Jesus, “Ngai asintataguḵ we ayatoḵ nu?”

³⁰ Ḵanan Jesus we summongbat, “Inninggaw tagu we naḻpu'd Jerusalem we an-osog ad Jericho. Nanadtaddaḻan ḵad, sinnob da tulisan woḵ innaḻada da losane ḵuḵuwana, indogada bos da silupna. Ḵad pinang-opang-oḵda inggana'ḵ matoyan woḵ tenanda.

³¹ Pune sadi, inninggaw padi ye an-osog. Innilana ḵad laḻaḵi ye matoyan, nilipatna.

³² Unipun, inninggaw os ganaḵ Levi, taḵon ay nu innilana bos sadi ye matoyane laḻaḵi, nilipatna.

³³ Unipun, dummatong os iSamaria woḵ innilana ḵad ay sadi ye matoyan, ḵinadaguwana.

³⁴ Pun ummadani woḵ agasana da sugatna si lanae olives ḵan bayas woḵ binadaḻna. Pun insaḵayna si ḵabayuna woḵ inniyoyna'tte dadawwosane maabangan ta ayyuwanana.

³⁵ Mabigat ḵad, innatodna duwae palata si simboḻoy woḵ ḵanana, ‘Ayyuwanam ḵappos annae tagu. Mipauliyaḵ ḵad, bayadaḵ nu potog.’ ”

³⁶ Pun ḵanan Jesus, “Atte ḵasomsomḵam, ngai'tta sadi ye tuḻu tuttuwae asintatagun ni napang-oḵ?”

³⁷ Ḵanana, “Sa ḵummadagu ḵan siya.” Ḵanan Jesus, “Inḵan ya ḵoom os ḵaḵna.”

Sa Namisitaan Jesus Ḵan Da Martha Ḵan Mary

³⁸ Pinagatupan Jesus ya da disipulunae nanaddaḻan inggana'ḵ dummatongda'tte ili. Inninggaw sidi'ḵ Martha we inayagana dida'ḵ ḵuwada.

³⁹ Inninggaw os aḵ Mary ye sunudnae tummuḵdu si adanin Jesus ta dongngona tuttuduna.

⁴⁰ Yaḵon aḵ Martha, nambinsaw atta adu we isaganana. Pun ummoy ḵan Jesus woḵ ḵanana, “Apu, naippun ḵamman ḵanana ḵan siḵa nu tenanaḵ ḵan sunudḵu we ansagana? Ibagam ḵappos ta badanganaḵ!”

⁴¹ Ḵanan Apu, “Martha, Martha, adu bos ay da ambinsawam.

⁴² Taḵon ay nu ḵatti, os-ossaan ḵasasappuḻan. Siya annate pinilin Mary, sa ḵapatogane ippun paat maḵaaḻa.”