Luke 1 - Sa Ugud Apudyus

Sa Gapunae Nigili

¹ Madaydayawe Theophilus, Adu da tagu we nangipapangoge nangigili'tta losane naḵwa ḵan diḵani'ḵ mituttuwaan da imbagan Apudyus.

² Niyiissu da inggilida'tta dingngoḻni ye inug-uggud da nangila'tte inggan ni lapun ni mipanggob ḵan Jesu Kristu we pinilin Apudyus aḵ Anagu ya An-ari ḵan nangiwaḻagawag os atta ḵingwana.

³ Saḵon ḵad, ummaḵ pinanoḵnoḵan da sadi'tte nabayage timpu ya simsimmoḵḵu bose ambaḻu on-ontagoḵ igili da losan para ḵan siḵa madaydayawe Theophilus.

⁴ Te pioḵe igammuwonyu we tuttuwa da nituttudu ḵan diḵayu.

Sa Nipadtuwan Ni Miyanaḵan John We Ambobonyag

⁵ Sa nampangatan ḵad Herod atte probinsiya'd Judea, inninggaw padin da Judyu we nangngadan aḵ Zechariah. Siya osa'tta grupun da papadi ye ganaḵ Abijah. Asawana'ḵ Elizabeth we ganaḵ os Aaron we padi'tte awe.

⁶ Naun-unandae an-asawa'tte antotollong Apudyus ya ippun nangkuranganda si nanuttuwaanda'tta losane lintogna ya sa tuttuduna.

⁷ Taḵon ay nu ḵaḵna, adidapun maganaḵ te basig aḵ Elizabeth ya lummaasda.

⁸ Pun sin-aḻgawan ḵad, ummoy aḵ Zechariah ya da grupuna'd Jerusalem ta ituttuwada da biyangda. Ḵad aḵ Zechariah anserbi ye padi si templo we boḻoy Apudyus.

⁹ Sa ugalin da papadi, ambubbunutda nu ngai lumnoḵ ad daḻom si templo. Pun aḵ Zechariah nabunute lumnoḵ atte templo we umoy anogob si incenso.

¹⁰ Sa nanogobana, inninggaw da amode tagu we nalluwaḻu'ḵ lasin.

¹¹ Pun nampaila anghel Apudyus woḵ tummaḵdog si madawinan ni altar we sosoggoban atte incenso.

¹² Innilana ḵad, naḵogway woḵ naḵimtan.

¹³ Yaḵon ḵanan ni anghel, “Zechariah, adiḵa maḵimut te dingngoḻ Apudyus luwaḻum. Pun aḵ Elizabeth we asawam, umanaḵ aḵ laḻaḵi ḵad ngadanam oḵyan aḵ John.

¹⁴ Umamdan layadnu ya ḵaḵnat os da tagu si mibuḵnagana

¹⁵ te ampatog atte antotollong Apudyus. Adipun oḵyan uminum aḵ bayas ya da udume bumartek. Taḵon ay sissiyaana'tte buwang inana, inggaw ḵabooḻan ni Ispiritu Santu ḵan siya.

¹⁶ Sa maḵwa ḵad, adu da dogayu we ganaḵ Israel we ipaulina ḵan Apu we sa Apudyusda.

¹⁷ Ḵad siya umuna nu aḵ Apu ya itton ni Ispiritu Santu ḵabooḻanae isuna innatodna ḵan Profeta Elijah we profeta we an-uuggudon Apudyus atte awe. Antimpuyugona somsomoḵ da an-amae nansubog ya ipaulina bos da lawwenge tagu ḵan Apudyus ta maun-unan da somsomoḵda. Ḵoona ḵaḵnat ta misaganada'tte dumaḵngan Apu.”

¹⁸ Nagangput ḵad imbagan ni anghel, ḵanan Zechariah, “Ngai angigammuwaḵe mituttuwa da imbagam? Te mummaḻmaḻong-agaḵ, ḵad mummammad-an aḵ asawaḵ!”

¹⁹ Ḵanan ni anghel, “Saḵon aḵ Gabriel we anserbi ḵan Apudyus. Siya nangibuun ḵan saḵon ta ibagaḵ ḵan siḵa annae Ambaḻu we Damag.

²⁰ Na! Adimpun patiyon da imbagaḵ! Sa ambanagana, maumoḻḵa oḵyan inggana'tte timpu we mituttuwa da sanae imbagaḵ!”

²¹ Sa nangibag-an ni anghel ḵan Zechariah, nataag da tagu si lasin ni templo we anguuway te nabayag ad daḻom.

²² Lummawa ḵad, nansinyal ḵan dida te adipun maḵaginga. Pun inigammudae awad de impailan Apudyus ḵan siyae isun di in-inop woḵ impiddagusna naumoḻ.

²³ Nagangput ḵad biyang Zechariah si templo, ummoyon.

²⁴ Adipun nabayag, nabugi'ḵ Elizabeth we asawana. Pun nalluḵuḵ atte limam buḻan.

²⁵ Pun ḵanana si somsomoḵna, “Annae impailan Apudyus ḵadaguna ḵan saḵon te annae nabugiyaḵ. Pun ḵinaanna bainḵu'tta tagu si nabayage adiyaḵpun mabugi.”

Sa Nipadtuwan Ni Miyanaḵan Jesus

²⁶ Sa miḵanome buḻan ni bugin Elizabeth, imbuun Apudyus aḵ Gabriel we anghel ad Nazareth we ili si probinsiya'd Galilee,

²⁷ te awad de imbagana'tte babaḻasange nangngadan aḵ Mary. Ippun natnattoḵana ya nituḻage asaw-ona'ḵ Joseph we ganaḵ Ari David.

²⁸ Pun dummatong ḵad anghel ḵan siya ḵanana, “Annaaḵ! Lumayadḵa te anna'ḵ Apudyus ḵan siḵa ya amod de ḵinabaḻuna ḵan siḵa.”

²⁹ Dingngoḻ ḵad Mary imbagan ni anghel, naḵosḵosyawan woḵ ḵuttuḵuttumona nu ngai piona ḵanan.

³⁰ Ḵanan ni anghel, “Mary, adiḵa maḵimut te amod de ḵinabaḻun Apudyus ḵan siḵa.

³¹ Sa maḵwa, mabugiḵa ya umanaḵḵa'ḵ laḻaḵi. Ḵad ngadanam oḵyan aḵ Jesus.

³² Amod ḵabooḻana ya ngannonda Abeng ni Ḵangatuwane Apudyus. Siya an-ariyon Apudyus we isuna'ḵ Ari David we daḵdaḵoḻna.

³³ Pun ipangatana da ganaḵ Israel aḵ inggana. Te naippun patinggan ni ampangatana.”

³⁴ Ḵanan Mary si anghel, “Ngai inonae maḵwa ḵaḵnat si naippun laḻaḵi'ḵ nandoḵ ḵan saḵon?”

³⁵ Ḵanan ni anghel, “Umali Ispiritu Santu ḵan siḵa ḵad mabugiḵa gapu si ḵabooḻan ni Ḵangatuwane Apudyus. Ḵade sadi mibuḵnag ngannonda nasantuwane Abeng Apudyus.

³⁶ Ilam ḵad aḵ Elizabeth we agim, taḵon ay nu nginadananda'ḵ basig ya lummaas, nabugi! Nagangpute onom buḻan ni bugina.

³⁷ Te aḵ Apudyus lamogna ḵoon da ngaiman!”

³⁸ Ḵanan Mary, “On, saḵon ḵad, annaaḵe sammilun Apudyus. Mituttuwa oḵyan da imbagame maḵwa ḵan saḵon.” Pun tinenan ni anghel.

Sa Namisitaan Mary Ḵan Elizabeth

³⁹ Sa sadi ye aḻgaw, nallibbat aḵ Mary ye anḵamuḵamu we ummoy si boḻoy da Zechariah. Sa ilida ḵad, awad atte tagudtud si probinsiya'd Judea.

⁴⁰ Dummatong ḵad, bummagbaga woḵ nillumnoḵ si boḻoy Zechariah woḵ pinakumustaana'ḵ Elizabeth.

⁴¹ Dingngoḻ ḵad Elizabeth gingan Mary, nanggidu abeng atte buwangna. Pun ummoy ḵabooḻan ni Ispiritu Santu ḵan Elizabeth

⁴² woḵ ḵananae nampoḵaw, “Pianḵa'tta losane bubai ya pian os abenge iyanaḵnu!

⁴³ Ngai ḵad ain patogḵu we bisitaom, siḵae inan ni Apuḵ?

⁴⁴ Annaya gapunae inigammuḵe siḵa inan ni Apuḵ. Gummingaḵa ḵad ay, nanggidu abeng atte buwangḵu si layadna!

⁴⁵ Pianḵa te pinatime mituttuwa imbagan Apu ḵan siḵa.”

Sa Andayawan Mary Ḵan Apudyus

⁴⁶ Ḵanan Mary, “Idaydayawku'ḵ Apu, si pusuḵ ḵan somsomoḵḵu.

⁴⁷ Amoamod layadḵu, ḵan Apudyus we Anagu ḵan saḵon.

⁴⁸ Te inḵagasmoḵna saḵone ḵamḵamae sammiluna. Pun misaḻad sinsana, ibagan da losane lunap ḵan saḵone pianḵa.

⁴⁹ Gapu'tta banage ḵingwana, nakaskasdaaw da naḵwa, Maḵabooḻ aḵ Apu ya siya abus aḵ gattoḵe nasantuwan.

⁵⁰ Siyae ḵumadagu'tta angisipog ḵan siya. Siya pasige ḵumadagu atta tagu'tte losane timpu.

⁵¹ Gapu'tte ḵabooḻana, ampatog da ḵoona. Da tagu we ḵama'ḵ osa, ansinasinaona dida. Losane planuda, maḵwa dadailona.

⁵² Da nangatu we papangatda, ipakumbabana dida. Da tagu we ḵamḵama, itaḻayagna dida.

⁵³ Da ampaḵaḻame tagu, innatodna ambaḻu. Ta awad mapnoḵanda atte mataguwanda. Da tagu ḵade baḵnang, naippun ḵatḵat-opanda. Pinaoyonna dida, nawwakwakkayda lawa.

⁵⁴ Da ganaḵ Israel we sammiluna, dida binadangana. Nituttuwa inkarina si ummamdane daguna.

⁵⁵ On, ḵummadagu tuwa atta danaḵḵoḻe ummunae aḵ Abraham we ama, ya da ganaḵna'ḵ inggana.”

⁵⁶ Pune sadi, inninggaw aḵ Mary si boḻoy da Elizabeth aḵ tuḻun buḻan, pun nipauli.

Sa Niyanaḵan John We Ambobonyag

⁵⁷ Sin-aḻgawan ḵad, dummatong umanaḵan Elizabeth, pun iyyanaḵna laḻaḵi.

⁵⁸ Dingngoḻ ḵad da ḵailiyanda ya da susunudda da nakaskasdaawe ḵadagun Apudyus ḵan siya, naḵalaylayadda.

⁵⁹ Ḵawaḻun aḻgawna ḵad, nandatdatongda bos ta sogyatanda ta anuttuwaanda si lintog. Pionda oḵyan ingadan ḵan siya Zechariah we ngadan amana.

⁶⁰ Yaḵon ḵanan ni inana, “Naid! Sa ngadanna ḵad John!”

⁶¹ Ḵananda ḵan siya, “Adim oḵyan ingadan de John te naippun agiyu'ḵ nangngadan si ḵaḵnat!”

⁶² Pun sininyasanda'ḵ Zechariah ta igammuwonda nu ngai piona ingadan atte utting.

⁶³ Ḵingwana ḵad, nampaidatong aḵ angigiliyana pun sa inggilina, “John ngadanna.” Pun nataag da losane tagu.

⁶⁴ Baag-en naḵaan umoḻ Zechariah woḵ insaḻadnae gumminga pun indaydayawna'ḵ Apudyus.

⁶⁵ Naḵimtan da ḵailiyanda woḵ nandinongoḻ ugud atte mipanggob si naḵwa'tta losane ili'tta probinsiya'd Judea.

⁶⁶ Pun ḵinuttuḵuttumda da losane dingngoḻda woḵ ḵanandae nan-asiimus, “Ngai nin ay ambanagan ni andi ye abeng?” Te immatunandae iinggaw ḵabooḻan Apudyus ḵan siya.

Da Impaigammun Zechariah

⁶⁷ Pune sadi, aḵ Zechariah we aman John, ummoy ḵabooḻan ni Ispiritu Santu ḵan siya woḵ impaigammuna sanae Ugud Apudyus. Ḵanana,

⁶⁸ “Idaydayaw taḵu'ḵ Apu we Apudyus da ganaḵ Israel, te ummali ta subutona ditaḵu we taguna.

⁶⁹ Imbuunna ḵan ditaḵu Anagu we awad de ḵabooḻana, osa'tta ganaḵ Ari David we nanserbi ḵan Apudyus.

⁷⁰ Siya impaibagan Apudyus atta profetanae nanserbi ḵan siya si awe

⁷¹ ye taguwona ditaḵu'tta ḵabusuḻ taḵu ya da losane anasanga ḵan ditaḵu.

⁷² Pune sadi, mituttuwa inkarin Apudyus atta danaḵḵoḻ taḵu we mipanggob si ḵadaguna, ya aaddi ye ituttuwana ḵabaḻuwane intuḻagna ḵan dida,

⁷³ te sanat os gattoḵe inkarina ḵan Abraham we daḵdaḵoḻ taḵu

⁷⁴ ta iligsina ditaḵu'tta ḵabusuḻ taḵu, ta anserbi taḵu ḵan siyae ippun ḵimut.

⁷⁵ Ta ambaḻu ugali taḵu ya unudon taḵu maun-unane antatagu we piniona inggana'ḵ matoy taḵu.”

⁷⁶ Pinagatupan Zechariah woḵ ḵanana, “Siḵa ḵad John we abengḵu, ngannonda siḵa profetan ni Ḵangatuwane Apudyus, te umunaḵa nu aḵ Apu ta isaganam daḻanna.

⁷⁷ Sa ḵoom, ibagam atta tagunae mataguda, mipagapu'tte mapakawanan da basuḻda.

⁷⁸ Te aḵ Apudyus ḵumadagu ya naanus, pun ibuunna Anagu we naḻpu'd langite isuna inite dumingit.

⁷⁹ Dumatong ḵad, langḻangana da tagu we iinggaw si giḵbote maḵimute matoy, ya ipuyutna ditaḵu ta lumin-awa somsomoḵ taḵu.”

⁸⁰ Aḵ John ḵade abengna, dummaḵoḻ woḵ lummaing ya pummigsa pammatina. Inninggaw atte bumbummaaw inggana'ḵ dummatong tumoḵwaḻana ta antuttudu'tta ganaḵ Israel.