Jude 1 - Sa Ugud Apudyus

Sa Laplapun ni Suḻat

¹ Saḵon aḵ Jude we sammilun Jesu Kristu ya sunud James. Annaya suḻatḵu ḵan diḵayu we napili ya ay-ayaton Apudyus we Ama ya sinaḻaḵnibana inggana si mipauliyan Jesu Kristu.

² Awad oḵyan ḵan diḵayu amode ḵadagu, lin-awa ḵan ayate maḻpu ḵan Apudyus.

Sa Maḵuwisan Da Daḵampun Aḵ Tuttuwae Mistulu

³ Ay-ayatoḵe buḻbuḻun, ansagsaganaaḵe anuḻat ḵan diḵayu si mipanggob atte mataguwan taḵu losane namati. Yaḵon sinsadi, ḵasapuḻane anuḻataḵ ta bagbagaaḵ diḵayu we iggayu ḵabooḻanyu we angitaḵdog si pammati taḵu we namingpingsane intaḻgod Apudyus atta taguna.

⁴ Te annat da tagu we illimoddae nidoga ḵan diḵayu we adiḵayupun naḵaimatun ḵan dida. Dida da nipadtu si awe si Ugud Apudyus we asi maḵuwis. Sana da tagu we daḵampun aḵ naapudyusane baliwanda ḵatuttuwaan mipanggob si ḵinabaḻun Apudyus te usaronda Ugud Apudyus aḵ analingodda'tta lawwenge ḵoḵoḵḵonda. Adidapun os bigbigon ḵatuttuwaan mipanggob ḵan Jesu Kristu we abus aḵ Apu we anserbiyan taḵu.

Sa Nadusaan Da Bummasuḻ Si Awe

⁵ Sinsadi pioḵ paiḵagasmoḵ annae iniiggammuyu we ustu mipanggob si nanusaan Apudyus atta tagu we naḵabasuḻ si awe ḵad ibagaḵ ḵan diḵayu mipanggob si nanaguwana'tta taguna si nangipuyutana ḵan didae nanenan ad Egypt yaḵon sibotna ḵad dinusana da adipun namati woḵ nanḵaḵatoyda.

⁶ Sosomḵonyu ḵad os da anghel we adipun nat-op atte saaddae innatod Apudyus ḵan dida woḵ tinenanda ustu we inggawanda'd langit. Gapu si nangwaanda'tte sadi, ḵinawadan Apudyus dida'ḵ inggana woḵ imbaḻudna dida si ḵagiḵbotan inggana'ḵ dumatong aḻgawe anguwisana ḵan dida.

⁷ Isun os ni naḵwa'tta ummili'd Sodom ḵan Gomorrah ya da nampaliḵwose ili. Naḵabasuḻda ḵad atte dagdagas ya da losane pipion da long-agda, singgob Apudyus dida ya da ilida. Pun sadi oḵyan angipaila ḵan ditaḵu we dusaon Apudyus da adipun amati si apuye ippun maḵdopana'ḵ inggana.

Sa Ugalin Da Daḵampun Aḵ Tuttuwae Mistulu

⁸ Yaḵon ḵatti isun ni ḵoon da daḵampun aḵ tuttuwae mistulu. Nipaigammu ḵan dida'tta in-inopdae ḵoonda lawweng. Pun maḵabasuḻda si angadaḻuganda'tta daḵampun aḵ asawada, adidapun bigbigon ḵaḻabbongan Apudyus ya an-ugudda'ḵ lawweng atta madaydayawe anghel.

⁹ Taḵon ay pangat da anghel we aḵ Michael, adipun nan-ugud aḵ lawweng ta ḵuwisona'ḵ Satan atte nansongbatanda ḵan Satan mipanggob atte ngai ḵaḻabbonganae angaḻa si ladag Moses. Abuse ḵanana, “Aḵ Apudyus asi anuppaḵ ḵan siḵa.”

¹⁰ Yaḵon da sanae tagu we adipun naapudyusan, an-ugudda'ḵ lawwenge misullagi'tta banage adidapun maawatan. Isudan ayam te adidapun maḵaḵasḵasmoḵ nu ngai ambaḻu ḵan lawweng ya siya unudonda da gagangaye lawwenge pipionda. Ḵad da sanae banag anadail ḵan dida.

¹¹ Ḵaddaguda te gattoḵe ampaḵimut dusada! Te unudonda lawwenge ugalin Cain, ḵad sa basuḻda isuna basuḻ Balaam we ḵamommod si pilaḵ ya sullagiyonda bos da angipangpangu ḵan didae isun ni ḵingwan Korah ḵan Moses atte awe. Gapu'tta ḵoḵoḵḵonda, madusada'ḵ ingganae isun ni dusan Korah.

¹² Sa midog-anda ḵan diḵayu nu angan ḵayu ḵan ankumulgar ḵayu dumimoḵda. Ippun paat bainda, lawotda ḵan bartekeroda te sa long-agdae abus sosomḵonda. Mipanida'tta libuu we mibibbibbide ippun udanda. Isuda bos ḵayu we adipun amunga si ustu we amungaana baḵon nu sa ḵayu we naḻangu ya nabagut.

¹³ Mipanida bos si daḵoḻe tupiyaḵ atte baybaye itupitupiyaḵna itoḵwaḻ da ḵaissawe taḻbutab da ḵababbaine ḵoḵoḵḵonda. Isuda bos da bituwon ad langite ansayasayape nalimuda si ustu we aayyonda. Pun sana gapunae insaganan Apudyus ḵagiḵbotane inggawanda'ḵ inggana.

Sa Madusaan Da Daḵampun Aḵ Tuttuwae Mistulu

¹⁴ Aḵ Enoch we ḵumapitu we lunap atta ganaḵ Adam, awad de impadtuna si mipanggob ḵan dida. Ḵanana, “Ilanyu, umali'ḵ Apu we buḻunna da simpuḻullibu we anghelna

¹⁵ ta umoyna ḵuwison da losane tagu. Dusaona da losane ḵabasbassuḻane adipun naapudyusan gapu'tta losane ḵingwadae lawweng ya da losane ampaite imbagada si nanullagiyanda ḵan siya.”

¹⁶ Da sanae tagu, pasigda ngumonongonot ya ippun pulus ḵat-opanda. Siya ḵoonda da lawwenge pipion da long-agda. Isḵaḻda da long-agda ya allelawonda da buḻunda ta aḻanda da pipionda.

Sa Imbagan Da Apostol

¹⁷ Yaḵon ḵan diḵayu we ay-ayatoḵe buḻbuḻun, ḵasapuḻane adiyu maliwatan da imbagan da apostol Jesu Kristu we Apu taḵu.

¹⁸ Ḵananda ḵan diḵayu, “Nu dumatong anungus ni aḻgaw, awad da tagu we umang-angyage da angunud si pipiondae lawweng.”

¹⁹ Dida da gapun ni magoggogwaanyu, siya ḵoonda da gagangaye pipion ni long-agda te naippun ḵan dida Ispiritu Santu.

Sa Bagbaga Atta Namati

²⁰ Yaḵon ḵan diḵayu we ay-ayatoḵe buḻbuḻun, papigsaonyu da pammatiyu ḵan Apudyus. Ḵad alluwaḻu ḵayu'tte ḵabooḻan ni Ispiritu Santu.

²¹ Popotpotanyu ayat Apudyus ḵan diḵayu si anguuwwayanyu si biyag aḵ inggana'd langite itton Jesu Kristu we Apu taḵu gapu si ḵadaguna.

²² Ḵadaguwanyu da anduwaduwa ta papigsaonyu da pammatida.

²³ Ḵad taguwonyu da udume adipun namati ye isun di lapsutonyu dida si apuy ad infiernu. Ḵadaguwanyu bos da ḵabasbassuḻan yaḵon ummanyu ta adi ḵayu mamansaan atte lawwenge ḵoonda.

Sa Mabindisyunan Ya Sa Mapadayawan Apudyus

^24-25 Madaydayaw oḵyan os-ossaane Apudyus we anagu ḵan ditaḵu mipagapu ḵan Jesu Kristu we Apu taḵu. Lamogna saḻaḵniban diḵayu ta adi ḵayu maḵabasuḻ ya ippun madellaw ḵan diḵayu nu pasiḵadona diḵayu si sinagungna. Ḵad maganasan ḵayu we angitotollong atte sumilinge ḵinaapudyusna. Madaydayaw te siya ḵangatuwan ḵan maḵabooḻe Apudyus we naippun ḵigad ni ḵaḻabbongana inggan ni laplapuna, sinsana ya aḵ inggainggana. Amen.