John 9 - Sa Ugud Apudyus

Sa Laḻaḵi Ye Niyanaḵe Naḵuḻap

¹ Anadtaddaḻan ḵad aḵ Jesus, innilana laḻaḵi ye niyanaḵe naḵuḻap.

² Ḵanan da disipuluna ḵan siyae nangimus, “Mistulu, ngai gapun ni naḵuḻapan ni annae laḻaḵi? Siya ḵamman naḵabasuḻ baḵon nu da sin-abeng?”

³ Ḵanan Jesus, “Daḵampun aḵ basuḻna baḵon nu da sin-abeng. Yaḵon naḵwa anna ḵan siya ta mipaila ḵabooḻan Apudyus we angaan atte ḵuḻapna.

⁴ Ḵasapuḻane ḵoon taḵu da ḵewaaḻe paḵwan ni nangibuun ḵan saḵon te sissiyae aḻgaw te umun-uni ḵad lumabi ya ippun inon taḵu we angwa.

⁵ Sa annaaḵ si lubung, saḵon silaw da tagu si lubung.”

⁶ Imbagan ḵad Jesus sadi, tinuppaana gabu woḵ tamayona. Naabus ḵad impeḵlana'tta atan ni naḵuḻap.

⁷ Ḵanana, “Inḵa daḻ-upan bosaḻnu'tte aammosan ad Siloam.” Sa pion ni ngadane Siloam ḵanan, nibuun. Pun ummoy ḵad nandaḻ-up, naḵaila woḵ ummoyon.

⁸ Innilan ḵad da daḻnigda ya da udume tagu we siya antapatapaya si awe ḵananda, “Daḵampun ḵamman aḵ siya inninggawe tutuḵdu sinae antapatapaya?”

⁹ Ḵanan da udum, “Siya.” Ḵanan os da udum, “Daḵampun yaḵon iissuna.” Ḵanana, “Saḵon sadi.”

¹⁰ Pun ḵananda ḵan siya, “Ḵad ngai inome naḵaila sinsadi?”

¹¹ Ḵananae summongbat, “Sa tagu we Jesus ngadanna, tinamayna gabu woḵ impeḵlana'tta ataḵ. Pun ḵanana ḵan saḵon, ‘Inḵa andaḻ-up atte aammosan ad Siloam.’ Ummoyaḵ ḵad nandaḻ-up, naḵailaaḵ.”

¹² Ḵananda ḵan siya, “Dinu igawna?” Ḵanana, “Naippun igammuḵ.”

Sa Nanumaḻyaan Da Pharisee Atte Naḵuḻape Laḻaḵi

¹³ Ḵingwan ḵad da tagu, inniyoyda sadi ye laḻaḵi ye ḵinaan Jesus ḵuḻapna'tta Pharisee.

¹⁴ Te tinamay Jesus gabu ta maḵaan ḵuḻapna'tte umillongan.

¹⁵ Pun inimus da Pharisee nu ngai naḵwa ḵan siyae naḵaila. Ḵananae summongbat, “Impeḵlana'tta ataḵ tinamaynae gabu woḵ dinaḻ-upaḵ. Pun naḵailaaḵ.”

¹⁶ Pune sadi ḵanan da udume Pharisee, “Daḵampun aḵ naḻpu ḵan Apudyus annae tagu te adinapun tuttuwaon lintog mipanggob si umillongan.” Ḵanan os da udum ḵan dida, “On! Yaḵon maḵaḵwa ḵamman ḵabasbassuḻan atta nakaskasdaawe sinyale isun ni ḵingwana?” Pune sadi, nan-asisullagida.

¹⁷ Pun ḵasin da Pharisee nan-imus atte laḻaḵi woḵ ḵananda, “Ḵad nu diniyat Jesus da atam, ngai ḵanam si mipanggob ḵan siya?” Ḵanana, “Siya profeta.”

¹⁸ Yaḵon da papangat da Judyu, sissiyae adidapun patiyone gagangaye naḵuḻap sadi ye laḻaḵi woḵ naḵaila. Pun ḵingwada ḵad, nangibuunda'ḵ ummoy nangayag atta sin-abeng ḵan siya.

¹⁹ Dummatongda ḵad ḵanandae nan-imus, “Sana ḵamman abengyu we ḵananyu we nibuḵnage naḵuḻap? Ḵad nu siya, ngai inonae naḵaila sinsadi?”

²⁰ Ḵanan da sin-abeng, “On, tuttuwae abengni anna ya tuttuwae nibuḵnage naḵuḻap.

²¹ Yaḵon naippun igammuni nu ngai inonae naḵaila ya nu ngai naniyat atta atana. Imusonyu ḵan siya te naangsan ḵan igammunae sumongbat.”

^22-23 Ḵaḵna imbagan da sin-abeng te maḵimutda'tta papangat da Judyu te nantutuḻagandae ngaimane angibabagga ḵanane, “Aḵ Jesus de Kristu,” adipun ogon maḵwae lumnoḵ atte sinagogan da Judyu.

²⁴ Inayagan os da papangat da Judyu ḵasin sadi ye laḻaḵi woḵ ḵananda ḵan siya, “Andayawḵa ḵan Apudyus we ibagam ḵatuttuwaan. Te igammuni ye sa sadi ye Jesus ḵabasbassuḻan.”

²⁵ Ḵananae summongbat, “Naippun igammuḵ nu ḵabasbassuḻan sadi ye tagu. Sa abuse igammuḵ, naḵuḻapaḵ woḵ sinsadi naḵailaaḵ.”

²⁶ Pun ḵanandae nan-imus ḵan siya, “Ngai ḵingwana ḵan siḵa? Ngai inonae naniyat atta atam?”

²⁷ Ḵananae summongbat, “Inabusḵu imbaga ḵan diḵayu yaḵon adiḵayupun nandongoḻ. Ḵad ngaipayu pion ḵasin dongngon? Pionyu ḵamman ose ambalin aḵ disipuluna?”

²⁸ Pun nan-uguugudanda sadi ye laḻaḵi woḵ ḵananda, “Siḵa osa'tta disipuluna yaḵon diḵani disipulun Moses.

²⁹ Igammuni ye naḵaugud aḵ Apudyus ḵan Moses. Yaḵon aḵ Jesus ḵad, ippun igammuni si naḻpuwana.”

³⁰ Summongbat os laḻaḵi woḵ ḵanana, “Mataagaḵ ḵan diḵayu! Ippun igammuyu si naḻpuwana yaḵon diniyatna ataḵ!

³¹ Ḵad igammu taḵu we adimpun Apudyus dongngon da ḵabasbassuḻan yaḵon dongngona da angidayaw ḵan siya ya da angwa'tta piona.

³² Inggan ni lapun ni annae lubung, naippun paat dingngoḻ taḵu'ḵ naniyat atta atan ni nibuḵnage naḵuḻap.

³³ Nu daḵampun aḵ naḻpu ḵan Apudyus annae tagu, ippun lamogna ḵoon.”

³⁴ Ḵananda bos ḵan siya, “Ḵabasbassuḻanḵa inggan ni niyanaḵam. Ngaipam ay diḵani tuttuduwan?” Pune sadi, pinaḻyawda'tte lasin ni sinagogan da Judyu.

³⁵ Dingngoḻ ḵad Jesus we pinaḻyawda laḻaḵi, ummoyna singngit woḵ indasana. Ḵanana ḵan siya, “Amatiḵa pagay si Abeng Di Tagu?”

³⁶ Ḵanan ni naḵuḻap, “Mistulu, ngai sanate tagu? Ibagam ḵappos ta amatiyaḵ ḵan siya.”

³⁷ Ḵanan Jesus, “Sinsadi innilam te siya annae ḵaug-uggudnu.”

³⁸ Ḵanan ni laḻaḵi, “Apu, amatiyaḵ.” Pun nanalluḵu we nandayaw ḵan Jesus.

³⁹ Ḵanan Jesus, “Ummaliyaḵ si annae lubung ta ḵuwisoḵ da tagu, ta da naḵuḻap, ḵaanoḵ da ḵuḻapda. Yaḵon da ḵanandae maḵaila, sissiyae naḵuḻapda.”

⁴⁰ Dingngoḻ da udum atta Pharisee ye adani ḵan siya woḵ ḵananda, “Ḵanam ḵammane naḵuḻap ḵani bos?”

⁴¹ Ḵanan Jesus ḵan dida, “Nu naḵuḻap ḵayu naippun oḵyan ḵabasuḻanyu. Yaḵon sinsadi ye ḵananyu we maḵaila ḵani, sissiya da basuḻyu.”