John 7 - Sa Ugud Apudyus

Aḵ Jesus Ya Da Sunudna

¹ Nagangput ḵad sadi, ummoy aḵ Jesus atta nampaliḵwose ili'tte probinsiya'd Galilee. Adinapun pione umoy atte probinsiya'd Judea te singsington da papangat da Judyu inondae angongat ḵan siya.

² Madam-an ḵad Gayagayan da Judyu we ngannonda Sigay,

³ ḵanan da sunud Jesus we laḻaḵi ḵan siya, “Tenam sina ya inḵa'tte probinsiya'd Judea ta ilan da disipulum da nakaskasdaawe ḵoom!

⁴ Ḵad nu ḵoom da sana, ilan da losane tagu si lubung ta igammuwonda. Te naippun tagu'ḵ itataḻuna ḵoona nu pionae ipaigammu ḵinatataguna.”

⁵ Imbagan da laḻaḵi ye sunud Jesus ḵaḵna te taḵon ay da sunudna, adidapun amati ḵan siya.

⁶ Ḵanan Jesus ḵan dida, “Daampun dumatong timpuḵe angituttuwa si planun Apudyus. Yaḵon ḵan diḵayu, baḻangnae timpu we maḵwa ḵoonyu da pionyu.

⁷ Te ippun lasun da tagu we adipun namati ye sumasanga ḵan diḵayu yaḵon sasangngaanda saḵon te panoḵnoḵaḵe lawweng da ḵoḵoḵḵonda.

⁸ Inḵayu maḵagayagaya. Umadiḵ umoy te daampun dumatong ustu we timpuḵe angituttuwa si planun Apudyus.”

⁹ Imbagana sana woḵ inninggaw atte probinsiya'd Galilee.

Sa Ummayan Jesus Atte Gayagaya

¹⁰ Yaḵon ḵesan ḵad da sunud Jesus we ummoy naḵagayagaya'd Jerusalem atte Gayagayan da Judyu we ngannonda Sigay, ummoy os aḵ Jesus yaḵon adipun nampappaila.

¹¹ Nangwa ḵad da papangat da Judyu, singsingtonda'tte gayagayae ḵananda, “Dimman aḵ Jesus?”

¹² Da nandatdatonge tagu'tte gayagaya, siya uguugudonda mipanggob ḵan Jesus. Ḵanan da udum, “Ambaḻu ugalin Jesus.” Yaḵon ḵanan os da udum, “Lawwelawweng te uḻ-uḻnugana da tagu.”

¹³ Yaḵon adidapun indangsoḻe angug-uggud si mipanggob ḵan siya te maḵimutda'tta papangat da Judyu.

¹⁴ Batug ḵad di angginawa gayagaya, ummoy aḵ Jesus atte paway ni templo woḵ nantuttudu.

¹⁵ Pun nataag da papangat da Judyu woḵ ḵananda, “Naippun nangatu'ḵ adaḻ ni annae tagu. Dinu nangaḻ-ana si laingna?”

¹⁶ Sinongbatan Jesus dida woḵ ḵanana, “Daḵampun aḵ sa somsomoḵḵu maḻpuwan ni ituttuduḵ yaḵon maḻpu ḵan Apudyus we nangibuun ḵan saḵon.

¹⁷ Ngaimane pionae angwa'tta pinion Apudyus, igammuwona nu maḻpu ḵan Apudyus da tuttuduḵ baḵon nu maḻpu si mismu we ḵaḻabbongaḵ.

¹⁸ Sa tagu we antuttudu we maḻpu si somsomoḵna, siya singtona midayawana. Yaḵon sa tagu we siya singtona dayaw ni nangibuun ḵan siya, pasige ustu ya tuttuwa da ibagana.

¹⁹ Daḵampun ḵamman ḵan Moses nangitod ḵan diḵayu si lintog? Yaḵon naippun ossaan ḵan diḵayu'ḵ nanuttuwa si sanate lintog te nu tinuttuwayu, adiyupun oḵyan singsington inonyu we angongat ḵan saḵon?”

²⁰ Ḵanan da tagu, “Naaḻananḵa! Ngai lawa maḻyad angongat ḵan siḵa?”

²¹ Ḵanan Jesus, “Inninggaw ossaane ḵingwaḵe nakaskasdaaw si umillongan si ḵinaanḵu saḵit ni tagu woḵ nataag ḵayu.

²² Innatod Moses lintoge inawatna'tta danaḵḵoḻnae ḵasapuḻane sogyatanyu abengyu we laḻaḵi si ḵumawaḻu we aḻgaw. Pun nu niyaspuḻ ḵumawaḻu we aḻgaw ni abeng atte umillongan, isunae sogyatanyu.

²³ Pun nu sogyatanyu'tte umillongan ta mituttuwa lintog Moses, ngaipa ḵayu sumanga si ḵinaanḵu saḵit ni tagu si umillongan?

²⁴ Adi ḵayu anḵuwise mibatay si ḵatollongan yaḵon anḵuwis ḵayu si ustu we anḵuḵuwis.”

Sa Maḻpuwan Ni Kristu

²⁵ Pun ḵanan da udume iJerusalem, “Daḵampun ḵamman atte annae tagu pion da papangat taḵu gongaton?

²⁶ Ilanyu ḵad, annate maḵaug-uggude maḻamaḻang atta tagu ḵad andi ye umman da papangat taḵu giginnoḵ. Inigammuda ḵammane tuttuwae siya Kristu?

²⁷ Yaḵon igammu taḵu naḻpuwan ni annae tagu. Te nu umali Kristu naippun angigammu si maḻpuwana.”

²⁸ Pun nantuttudu ḵad aḵ Jesus si paway ni templo, indangsoḻnae gumminga woḵ ḵanana, “Igammuyu pagay saḵon ya igammuyu naḻpuwaḵ? Daḵampun aḵ ummaliyaḵ gapu si ḵuwaḵe ḵasomsomḵan. Yaḵon sa tuttuwae nangibuun ḵan saḵon, adiyupun igammu.

²⁹ Saḵon ḵad, igammuḵ te siya naḻpuwaḵ ya siya nangibuun ḵan saḵon.”

³⁰ Imbagan ḵad Jesus sadi, pinadas da papangat doḵmaan yaḵon adimpun Apudyus iyunud te daampun yan dumatong mituttuwaan ni planuna ḵan siya.

³¹ Yaḵon adu da namati ḵan siya woḵ ḵananda, “Sa annae tagu, tuttuwae adu da nakaskasdaawe sinyale ḵingwanae isun ni namnamaon taḵu we ḵoon Kristu nu umali sina.”

Sa Namadasanda Anoḵmaan Ḵan Jesus

³² Dingngoḻ ḵad da Pharisee ye sin-aayumimit da amode tagu mipanggob ḵan Jesus, nangibuun da papangat da papadi ya da Pharisee atta guwaḻdan ni templo ta umoyda doḵmaan aḵ Jesus.

³³ Ḵanan Jesus ḵan dida, “Sin-aḵitan inggawaḵ ḵan diḵayu ya mipauliyaḵ atte nangibuun ḵan saḵon.

³⁴ Ḵad asiyu saḵon singsington yaḵon adiḵayupun maḵaodas ḵan saḵon. Adiḵayupun maḵaali'tte ayaḵ.”

³⁵ Ḵanan da Judyu we nan-asiimus, “Dinu ayanae aditaḵupun maḵaodas ḵan siya? Umoy ḵamman nin atta adayu we ilin da Gentil we igaw da naas-asipaḻaḵe Judyu ya antuttudu'tta Gentil?

³⁶ Ngai piona ḵanane, ‘Singsingtonyu saḵon yaḵon adiḵayupun maḵaodas ḵan saḵon ya adiḵayupun maḵaali'tte ayaḵ?’ ”

Sa Bubune Adipun Mattuḵ

³⁷ Sa anungus ḵan ḵapatogane aḻgaw ni Gayagayan da Judyu we ngannonda Sigay, summiḵad aḵ Jesus woḵ ḵananae nangiyipḵaw, “Ngaimane mauwaw, umali ḵan saḵon ta uminum.

³⁸ Ngaimane amati ḵan saḵon, maitttan si awade nibaga'tte nigili si Ugud Apudyus we ḵanana, ‘Sa danume angitod si biyage isun di bubune bumubuse maḻpu'tte pusuna ya adipun mattuḵan.’ ”

³⁹ Siya inugud Jesus mipanggob si Ispiritu Santu we awaton da amati ḵan siya. Yaḵon daampun maatod ḵan dida te daampun mipauli'ḵ Jesus ta midayaw ad langit.

⁴⁰ Dingngoḻ ḵad da tagu inugudna, ḵanan da udum, “Siya tuttuwae inuuwway taḵu we profeta.”

⁴¹ Ḵanan da udum, “Siya Kristu we imbuun Apudyus.” Yaḵon ḵanan os da udum, “Naid! Sa Kristu, tuttuwae daḵampun aḵ maḻpu'tte probinsiya'd Galilee.

⁴² Te nigili si Ugud Apudyus we maḻpu Kristu atta ganaḵ Ari David. Ḵad miyanaḵ ad Bethlehem we ilin Ari David atte awe.”

⁴³ Pune sadi, nanggogwa da tagu mipanggob ḵan siya.

⁴⁴ Ḵad pion da udume doḵmaan yaḵon adimpun Apudyus iyunud.

Sa Adimpun Da Papangat Da Judyu Namatiyan

⁴⁵ Pun nipauli da guwaḻdan ni templo'tta papangat da papadi ya da Pharisee ye da nangibuun ḵan didae anoḵma ḵan Jesus. Ḵananda'tta guwaḻda, “Ngaipayu adi dinoḵmaan ya indatongyu sina?”

⁴⁶ Ḵanan da guwaḻda, “Adinipun te naippun paat miyisu'tte an-uugudnae ambaḻubaḻu!”

⁴⁷ Ḵanan da Pharisee ye summongbat, “Na! Naallelaw ḵayu bos atta imbagana?

⁴⁸ Awad ḵad ain osa'tta papangat baḵon nu ossaan ḵan diḵani ye Pharisee aḵ namati ḵan siya?

⁴⁹ Da tagu we namati ḵan siya, naippun igammuda si lintog Moses. Pun aaddi ye dusaon Apudyus dida.”

⁵⁰ Inninggaw sidi osa'tta Pharisee ye nangngadan aḵ Nicodemus. Ummoy si awe ḵan Jesus woḵ naḵaug-uggud ḵan siya. Ḵanana'tta buḻunna,

⁵¹ “Sa lintog taḵu, adipun maḵwae madusa tagu nu adi taḵu dongngon ḵan igammuwon nu naḵabasuḻ baḵon nu adipun.”

⁵² Ḵanandae summongbat ḵan siya, “Isum nin naḻpu'tte probinsiya'd Galilee. Singtom si Ugud Apudyus woḵ igammuwome naippun profeta'ḵ naḻpu'tte probinsiya'd Galilee.”

⁵³ Pun ummoyonda.