John 6 - Sa Ugud Apudyus

Sa Namaḵanan Jesus Atta Lummabos Aḵ Limallibu

¹ Naḻaḵpus ḵad pigan aḻgaw, dummoḻmang aḵ Jesus ya da disipuluna'tte Baybay ad Galilee ye Tiberias osae ngadanna.

² Amoamod da tagu we nitun-ud ḵan siya te innilada da nakaskasdaawe ḵingwana'tta nasaḵit.

³ Pun nanagada'ḵ Jesus atte beleg woḵ naḵatuḵdu'tta disipuluna.

⁴ Sa sadi ye timpu, madam-an Gayagayan da Judyu we ngannonda Nallausan.

⁵ Nammotwa ḵad aḵ Jesus, intapna da amode tagu we ḵumatam ḵan dida. Ḵanana ḵan Philip, “Dinu ngumin-an taḵu'ḵ ḵanonda?”

⁶ Iniiggammun Jesus nu ngai ḵoona yaḵon inimusna ḵan Philip ḵaḵna ta pappadasona pammatina.

⁷ Ḵanan Philip ḵan siya, “Taḵon ay duwanggasute palata adinapun lamog mingina'ḵ tinapay aḵ maḵaḻnob ḵan dida taḵon ay nu sin-aḵ-itanda.”

⁸ Gumminga ḵad aḵ Andrew we sunud Simon Peter ya osa bos atta disipulu ḵanana,

⁹ “Annaya abenge nandinaan aḵ limae tinapaye barley ḵan duwae nidawise ugadiw. Yaḵon maḵaḻnob ḵamman atta amode tagu?”

¹⁰ Ḵanan Jesus atta disipuluna, “Patuḵduwonyu da tagu.” Tuttuḻni sadi ye inninggawanda. Pun sa iyap da laḻaḵi umoye limallibu, adipun niyiyap da bubai ya da abeng.

¹¹ Pune sadi, innaḻan Jesus tinapay woḵ nanggappiya ḵan Apudyus. Nagangput ḵad, impaiwaḻasna'tta disipuluna. Ḵaḵna bos ḵingwana'tte ugadiw. Impaiwaḻasna inggana'ḵ nassugda.

¹² Losanda ḵad nassug, ḵanan Jesus atta disipuluna, “Inḵayu dagupon da nabun-an ta ippun matangga.”

¹³ Dinagupda ḵad da bunada'tte limae tinapaye barley, naamin napnu nasawaḻan aḵ duwae aḵḵubaw.

¹⁴ Innilan ḵad da amode tagu da nakaskasdaawe sinyale ḵingwan Jesus ḵananda, “Sana pagay tuttuwae profeta we inkarin Apudyus we umali si annae lubung.”

¹⁵ Inigammun ḵad Jesus da somsomoḵ da tagu we ipatutdae siya an-ariyonda, tinenana dida woḵ ummoy ḵasine ossaan atte beleg.

Sa Nanaddaḻanan Jesus Atte Labaw Ni Danum

¹⁶ Anna ḵade mumasdom, nan-osog da disipulun Jesus atte baybay,

¹⁷ woḵ nambangkada ta dumoḻmangda'd Capernaum. Anna gaye lumabi daampun ay dumatong aḵ Jesus ḵan dida.

¹⁸ Inniggana ampigsae bali woḵ amod de tupiyaḵ.

¹⁹ Batug ḵad di lima baḵon nu onome kilomitro inaḵatda, intapda'ḵ Jesus we anadtaddaḻan atte labaw ni danume umadaadani'tte bangka woḵ naḵimtanda.

²⁰ Yaḵon ḵanan Jesus, “Saḵon anna, adi ḵayu maḵimut!”

²¹ Pun sillalaylayaddae nangilugan ḵan siya'tte bangka. Pun daguse dummatongda'tte taḻantage ayanda.

Sa Maḵane Angitod Si Biyag

²² Mabigat ḵad, nan-uuwway da tagu we natenan si domang te inigammudae ossaane abus bangkae ḵesan ḵad inniladae adipun aḵ Jesus naḵalugan yaḵon abus da disipuluna'ḵ nambangka.

²³ Pune sadi, dummatong da udume bangkae naḻpu'd Tiberias woḵ dummaḵaḻda'tte adani si nanganan da tagu'tte tinapay si nanggappiyaan Jesus ḵan Apudyus.

²⁴ Innilan ḵad da amoamode tagu we naippun aḵ Jesus ya da disipuluna sidi, nambangkada bos woḵ ummoyda'd Capernaum ta singtonda'ḵ Jesus.

²⁵ Dummatongda ḵad ad domang, indasanda'ḵ Jesus woḵ ḵanandae nangimus, “Mistulu, ḵamaan ni dummaḵngam sina?”

²⁶ Ḵanan Jesus ḵan dida, “Ibagaḵ ḵan diḵayu ḵatuttuwaan, singsingtonaḵ te nangan ḵayu ya nassug ḵayu'tte tinapaye impaḵanḵu ḵan diḵayu. Daḵampun aḵ gapu ta naawatanyu da nakaskasdaawe sinyale innilayu.

²⁷ Adiyu gamgaman maḵane madadail yaḵon siya oḵyan gamgamanyu maḵane angitod si biyag aḵ inggana. Ḵad saḵone Abeng Di Tagu angitod atte sadi ye maḵan ḵan diḵayu te ummapyu'ḵ Apudyus we Amaḵ ḵan saḵon.”

²⁸ Pun ḵanandae nan-imus ḵan siya, “Ngai ḵasapuḻane ḵoonni ta mituttuwa da pinion Apudyus?”

²⁹ Ḵanan Jesus, “Annaya pinion Apudyus we ḵoonyu, amati ḵayu oḵyan ḵan saḵone imbuunna.”

³⁰ Ḵananda bos, “Ngai nakaskasdaawe sinyale ḵoom ta ilanni ya amati ḵani'tta imbagam? Ngai ḵoom?

³¹ Nangan da danaḵḵoḻ taḵu'tte manna si inninggawanda'tte bumbummaaw, ḵad siya bos nigili si Ugud Apudyus we ḵanana, ‘Pinaḵanana dida'tte maḵane naḻpu'd langit.’ ”

³² Ḵanan Jesus ḵan dida, “Ibagaḵ ḵan diḵayu ḵatuttuwaan, daḵampun ḵan Moses nangitod ḵan dida'tte maḵane naḻpu'd langit. Yaḵon aḵ Amaḵ nangitod ya siya angitod ḵan diḵayu'tte tuttuwae maḵane maḻpu'd langit.

³³ Te sa maḵane itton Apudyus, siya dummoḻae maḻpu'd langite angitod si biyag aḵ inggana'tta tagu si lubung.”

³⁴ Ḵananda ḵan siya, “Mistulu, patilayunḵa oḵyan angitod si sanate maḵan.”

³⁵ Ḵanan Jesus, “Saḵon maḵane angitod atte biyag aḵ inggana. Ḵad da umali ya amati ḵan saḵon, adidapun paat mauḻat ḵan mauwaw.

³⁶ Yaḵon ibagaḵ ḵan diḵayu we taḵon ay nu innilayu saḵon, sissiyae adiḵayupun amati.

³⁷ Da losane tagu we intaḻgod Amaḵ ḵan saḵon, dida bos da umali ḵan saḵon. Ḵad ngaimane umali ḵan saḵon, adiḵpun paat paḻyawon.

³⁸ Te daḵampun aḵ ummaliyaḵe naḻpu'd langit ta ḵooḵ da pinioḵ yaḵon ummaliyaḵ ta ḵooḵ da pinion ni nangibuun ḵan saḵon.

³⁹ Ḵad sa pinion ni nangibuun ḵan saḵon, ayyuwanana da innatodnae amati ḵan saḵon. Pauliyoḵ dida taguwon si anungus ni aḻgaw,

⁴⁰ te sa pinion Amaḵ, losane angimatune saḵon Abengna ya amati ḵan saḵon, maittanda si biyag aḵ inggana. Ḵad pauliyoḵ dida taguwon si anungus ni aḻgaw.”

⁴¹ Pune sadi, insaḻad da Judyu we singngongonot ḵan siya te ḵanana, “Saḵon maḵane naḻpu'd langit.”

⁴² Ḵananda, “Daḵampun ḵamman aḵ siya Jesus we abeng Joseph? Igammu taḵu da amana ḵan inana. Ḵad ngaipana ḵanane naḻpu'd langit?”

⁴³ Ḵanan Jesus, “Adi ḵayu singngongonot!

⁴⁴ Naippun tagu'ḵ maḵaali ya amati ḵan saḵon nu adin Amaḵ we nangibuun ḵan saḵon iyadani. Ḵad da amati, taguwoḵ dida ḵasin si anungus ni aḻgaw.

⁴⁵ Te ḵanan ni inggilin da profeta si awe, ‘Tuttuduwan Apudyus da losane tagu.’ Ḵad ngaimane andongoḻ ya an-adaḻ ḵan Amaḵ, dida da umali ḵan saḵon.

⁴⁶ Daḵampun aḵ piona ḵanane awad nangila ḵan Apudyus, malaksid ḵan saḵone naḻpu ḵan siya.

⁴⁷ Ibagaḵ ḵan diḵayu ḵatuttuwaan, ngaimane amati ḵan saḵon, awad ḵan siya biyag aḵ inggana.

⁴⁸ Te saḵon maḵane angitod atte biyag.

⁴⁹ Da danaḵḵoḻyu, taḵon ay nu ḵinanda maḵane ngannonda manna si inninggawanda'tte bumbummaaw, natoyda.

⁵⁰ Sa maḵane ugudoḵ, sana tuttuwae maḵane dummoḻae naḻpu'd langit. Ḵad ngaimane angan, adipun paat matoy.

⁵¹ Saḵon maḵane angitod si biyag aḵ ingganae naḻpu'd langit. Ḵad ngaimane angan atte annae maḵan, matagu'ḵ inggana. Sa sanae maḵan, sa long-agḵu we ittoḵ ta matagu da tagu si lubung.”

⁵² Dingngoḻ ḵad da Judyu imbagan Jesus, ḵanandae nansosongbat, “Ngai inonae ittona long-agna ḵan ditaḵu ta ḵanon taḵu?”

⁵³ Ḵanan Jesus ḵan dida, “Ibagaḵ ḵan diḵayu ḵatuttuwaan, nu adiyu ḵanon long-agḵu we Abeng Di Tagu ḵan adiyu inumon daḻaḵ, naippun ḵan diḵayu biyag aḵ inggana.

⁵⁴ Ngaimane angan atte long-agḵu ḵan anginum atte daḻaḵ, awad ḵan siya biyag aḵ inggana. Ḵad ḵasinḵu taguwon dida'tte anungus ni aḻgaw.

⁵⁵ Te sa long-agḵu, siya tuttuwae maḵan ya sa daḻaḵ, siya tuttuwae mainum.

⁵⁶ Ngaimane angan atte long-agḵu ya anginum atte daḻaḵ, iinggaw ḵan saḵon ya iinggawaḵ os ḵan siya.

⁵⁷ Aḵ Amaḵ we naḻpuwan ni biyag, imbuunaḵ woḵ nataguwaḵ gapu ḵan siya. Pun sadi isun ni angan atte long-agḵu, matagu bos gapu ḵan saḵon.

⁵⁸ Saḵon maḵane naḻpu'd langit, daḵampun aḵ isuna ḵinan da danaḵḵoḻyu we manna woḵ natoyda pos pagay. Ngaimane angan atte annae maḵan, matagu'ḵ inggana.”

⁵⁹ Imbagan Jesus da anna'tte nantuttuduwana si sinagoga we mimittingan da Judyu ad Capernaum.

Sa Angitod Atte Biyag Aḵ Inggana

⁶⁰ Dingngoḻ ḵad da adu'tta disipuluna annae imbagana ḵananda, “Atopay ḵamnut ni annae tuttuduna! Ngai maḻyad andongoḻ?”

⁶¹ Taḵon ay nu naippun angibaga ḵan siya, igammun Jesus we singngongonot da disipuluna woḵ ḵanana ḵan dida, “Nadismaya ḵayu ḵamman atta intuttuduḵ ḵan diḵayu?

⁶² Ngai inona nu ilanyu saḵone Abeng di Tagu we ngumatuwaḵ si naḻpuwaḵ?

⁶³ Sa angitod atte biyag, sa Ispiritu Santu. Naippun lamog ni long-ag itton. Ḵad da inugudḵu ḵan diḵayu, naḻpuda'tte Ispiritu ḵad siya angitod si biyag aḵ inggana.

⁶⁴ Yaḵon awad ḵan diḵayu da adipun amati.” Te gagangaye inigammun Jesus nu ngai da adipun amati ya sa angituyuḵ ḵan siya.

⁶⁵ Pinagatupana bos woḵ ḵanana, “Sana gapun ni nangibag-aḵ ḵan diḵayu we naippun ḵallamog umali ya amati ḵan saḵon nu adin Amaḵ iyunud.”

⁶⁶ Inggan ni sadi, adu da tagu we nibuḻubuḻun ḵan Jesus we nan-awid woḵ adidapun ogon mibuḻun ḵan siya.

⁶⁷ Pune sadi, ḵanan Jesus atta nasawaḻan aḵ duwae disipulu, “Ḵan diḵayu, pionyu ḵammane tenanaḵ os?”

⁶⁸ Ḵanan Simon Peter we summongbat, “Apu, ngai unudonni nu? Annat ḵan siḵa da ugude angitod atte biyag aḵ inggana.

⁶⁹ Namati ḵani ḵan iniiggammuni ye siḵa nasantuwane imbuun Apudyus.”

⁷⁰ Pun ḵanan Jesus, “Daḵampun ḵamman aḵ saḵon namili ḵan diḵayu we nasawaḻan aḵ duwa? Yaḵon awad pagay osa ḵan diḵayu we dimunyu.”

⁷¹ Siya piona ugudon aḵ Judas Iscariot we abeng Simon we taḵon ay nu osa'tta nasawaḻan aḵ duwae disipuluna, siya asi angituyuḵ ḵan Jesus.