John 4 - Sa Ugud Apudyus

Aḵ Jesus Ya Sa Bubai Ye ISamaria

¹ Da Pharisee ḵad, dingngoḻdae naadu da inawis ḵan binonyagan Jesus we disipulu nu aḵ John. Inigammun Jesus we dingngoḻ da Pharisee anna.

² Yaḵon sa ḵatuttuwaan, daḵampun ḵan Jesus nambonyag yaḵon abus da disipuluna.

³ Inigammun ḵad da Jesus sana, tinenanda probinsiya'd Judea ta mipaulida'tte probinsiya'd Galilee.

⁴ Ḵad ḵasapuḻane ayonda'd Samaria.

⁵ Pun dummatongda'd Sychar we osae ili'd Samaria ya adani si lutae innatod Jacob si awe ḵan Joseph we abengna.

⁶ Inninggaw bubun Jacob sidi si awe. Gapu'tte ayong Jesus we nanadtaddaḻan, tummuḵdu si daḻnig ni bubun. Annae mumamatuḵ atte sadi.

^7-8 Da disipuluna ḵad, ummoyda si siyudad ngumina'ḵ ḵanonda. Sibotda ḵad, dummatong bubai ye iSamaria we umoy anaḵdu woḵ ḵanan Jesus ḵan siya, “Ittanaḵ ud aḵ inumoḵ.”

⁹ Ḵanan ni bubai, “Ngaipaḵa gay anḵodaw aḵ danum ḵan saḵone siḵa ḵad Judyuḵa ya saḵon ḵad iSamaria?” Te sa ugalin da Judyu, adidapun maḵabuḻbuḻun atta iSamaria.

¹⁰ Ḵanan Jesus, “Nu inigammum atod Apudyus ya inigammum nu ngaiyaḵe anḵodaw atte danum, siḵa oḵyan anḵodaw ta ittaḵ siḵa si danume angitod si biyag.”

¹¹ Ḵanan ni bubai, “Apu, adaddaḻoman annae bubun ḵad ippun gagaudnu. Dinu ḵad ain angaḻ-am atte danume angitod si biyag?

¹² Aḵ Jacob we daḵdaḵoḻ taḵu, impaḻaḵsunna annae bubun. Ḵad sanat maḻpuwan ni inumona ya sa inumon da abengna ya da ayamna. Nangatngatuḵa ḵamman nu aḵ Jacob?”

¹³ Ḵanan Jesus, “Ngaimane uminum si danume maḻpu si annae bubun, mauwaw ḵasin.

¹⁴ Yaḵon sa uminum atte danume ittoḵ, adipun ogon mauwaw. Te ambalin aḵ isunan bubune bumubus si long-agnae angitod si biyag aḵ inggana.”

¹⁵ Ḵanan ni bubai, “Apu, ittanaḵ ud atte sanate danum ta adiyaḵ ogon mauwaw ḵad agayḵu we umoy anaḵdu.”

¹⁶ Ḵanan Jesus ḵan siya, “Inḵa ayagan aḵ asawam ta umali ḵayu.”

¹⁷ Ḵanan ni bubai, “Naippun asawaḵ.” Ḵanan Jesus, “Tuttuwa sanate imbagam,

¹⁸ te nangallimaḵa nangasawa. Ḵad sa inḵamboḻoynu we sana, daḵampun aḵ gattoḵe asawam. Tuttuwa sanate imbagam.”

¹⁹ Ḵanan ni bubai, “Apu, igammuḵe profetaḵa.

²⁰ Da danaḵḵoḻni, sa annae beleg andayawanda ḵan Apudyus yaḵon diḵayu ḵade Judyu, ḵananyu we ad Jerusalem ḵasapuḻane andayawan da tagu ḵan Apudyus.”

²¹ Ḵanan Jesus, “Bubai, amatiḵa ḵan saḵon, dumatong timpu we daḵampun ogon atte annae beleg baḵon nu ad Jerusalem andayawan da tagu ḵan Apudyus we Ama.

²² Diḵayu we iSamaria, naippun igammuyu ḵan Apudyus we dayawonyu. Diḵani ḵade Judyu, igammuni te diḵani maḻpuwan ni anagu'tta losane tagu.

²³ Yaḵon dummatong timpu we da tuttuwae andayaw ḵan Apudyus we Ama, ḵasapuḻane andayawda ḵan siya si Ispiritu ya mibatay si ḵatuttuwaan. Te sanat da singsington Apudyus we andayaw ḵan siya.

²⁴ Aḵ Apudyus Ispiritu. Ḵad da andayaw ḵan siya, ḵasapuḻane andayawda si Ispiritu ḵan ḵatuttuwaan.”

²⁵ Pun ḵanan ni bubai, “Igammuḵe dumatong Messiah we awaganda'ḵ Kristu ḵad nu umali ipaigammuna ḵan ditaḵu da ngaiman.”

²⁶ Ḵanan Jesus, “Saḵone maḵaug-uggud ḵan siḵa sinsadi, saḵon sadi ye imbagame umali.”

²⁷ Sissiya ḵade maḵaug-uggud aḵ Jesus, dummatong da disipuluna woḵ nataagda te naḵaug-uggud si bubai. Yaḵon naippun osa'ḵ nangimus nu ngai pion ni bubai baḵon nu ngaipa maḵaug-uggud aḵ Jesus ḵan siya.

²⁸ Ḵingwan ḵad ni bubai, tinenana sasaḵduwanae banga woḵ nipauli'tte siyudad. Pun ummoyna imbaga'tta tagu ḵanane,

²⁹ “Awwayyu ḵad ta inḵayu ilan tagu we imbagana da losane ḵingwaḵ! Siya ḵamman nin Kristu?”

³⁰ Pun ummoyda'tte igaw Jesus.

³¹ Sa ḵesanan ḵad ni bubai, isassaud da disipulun Jesus ḵanane angimus, “Mistulu, anganḵa!”

³² Yaḵon ḵanana ḵan dida, “Awad de maḵane ḵanoḵe naippun igammuyu.”

³³ Da disipuluna ḵad, ḵanandae nan-asiimus, “Awad nin nangiyoy ḵan siya'ḵ ḵanona?”

³⁴ Pun ḵanan os Jesus ḵan dida, “Sa ḵanoḵ sa anuttuwaaḵ ḵan angangputaḵ atta ḵewaaḻe paḵwan ni nangibuun ḵan saḵon.

³⁵ Awad de uuggudonyu we ḵanana, ‘Opat buḻan daan ya asiyot iyyaani.’ Yaḵon sa ḵanaḵ iyyaani sinsana. Allangḻanga ḵayu! Annat da umali ye tagu we maḻyad andongoḻ ya angawat atta ugudoḵ. Dida isun da pagoy we naḻ-um ya madam-an maani.

³⁶ Da an-ani ḵad matangdananda, da anagup atta tagu awatonda biyag aḵ inggana. Ḵad da angimuḻae isun da angibaga'tte ugudḵu ya da an-ani ye bumadang ta awatonda ugudḵu, anggangganasda losan.

³⁷ Te tuttuwa uuggudone ḵanana, ‘Awad de angimuḻa ya awad os an-ani.’

³⁸ Te ibuunḵu diḵayu'ḵ umoy an-ani'tte adiyupun inayong. Maḵḵon da nanḵewaaḻ ya diḵayu angaaw atta inayongda.”

³⁹ Da iSamaria ḵade ummili'tte siyudad, adu da namati ḵan Jesus gapu'tte imbagan ni bubai ye ḵanana, “Imbagana da losane ḵingwaḵ.”

⁴⁰ Pun dummatong ḵad da iSamaria'tte inninggawan Jesus, tinawidanda ta inggaw yan ḵan dida woḵ inninggaw sidi'ḵ duwan aḻgaw.

⁴¹ Gapu'tta imbagana, amo ummadu da namati ḵan siya.

⁴² Ḵananda si bubai, “Daḵampun ogon atta imbagam namatiyanni te dingngoḻni ye mismu ḵad igammuni ye siya tuttuwae Anagu'tta tagu'tte lubung.”

Sa Nangaanan Jesus Atte Saḵit

⁴³ Naḻaḵpus ḵad duwan aḻgaw, ummoy da Jesus atte probinsiya'd Galilee,

⁴⁴ te pinanoḵnoḵan Jesus we mismu ḵanane, “Sa profeta adipun mapatgan si mismu we ilina.”

⁴⁵ Pun dummatongda ḵad atte probinsiya'd Galilee, nisagaw da tagu we nammangili ḵan siya te innilada da nakaskasdaawe ḵingwana'tte Gayagayae Nallausan ad Jerusalem.

⁴⁶ Pune sadi, ummoyda bos ad Cana we osae ili'tte probinsiya'd Galilee ye sa nambalinon Jesus danum aḵ bayas. Inninggaw osae pangat atte gubilnu'd Capernaum we nasaḵit abengnae laḻaḵi.

⁴⁷ Dingngoḻna ḵade dummatong aḵ Jesus atte probinsiya'd Galilee ye naḻpu'tte probinsiya'd Judea, ummoy ḵan siya nandagdagu ta an-osog ad Capernaum ya ḵaanona saḵit ni abengnae mamattoy.

⁴⁸ Ḵanan Jesus ḵan siya, “Nu ippun ilanyu'ḵ nakaskasdaawe sinyal, adiḵayupun amati.”

⁴⁹ Yaḵon ḵanan ni pangat, “Apu, awwaynu ḵappos ta daan matoy abengḵu.”

⁵⁰ Pun ḵanan Jesus, “Inḵan, matagu abengnu.” Pun namati pangat atte imbagana woḵ ummoyon.

⁵¹ Mabigat ḵad si sissiya'tte daḻan, inabotna da sammilunae ḵanandae nangibaga ḵan siya, “Natagu abengnu!”

⁵² Inimusna ḵad nu ngai ye oras bummaḻuwana ḵananda, “Naḵaan atungna'tte nandangawel akkaḻbiyan.”

⁵³ Pun inḵagasmoḵ ni ama we sadi ustuustu we nangibag-an Jesus ḵan siya ḵanane, “Matagu abengnu.” Pune sadi, siyae mismu ya da ḵabaḻyanna namatida losan ḵan Jesus.

⁵⁴ Sana miḵagwae sinyale ḵingwan Jesus atte probinsiya'd Galilee si naḻpuwana'tte probinsiya'd Judea.