John 3 - Sa Ugud Apudyus

Sa Ummayan Nicodemus Ḵan Jesus

¹ Inninggaw tagu we nangngadan aḵ Nicodemus. Siya ḵad, Pharisee ya osae pangat da Judyu.

² Sillabiyan ḵad, ummoy ḵan Jesus woḵ ḵanana, “Mistulu, igammuni ye siḵa imbuun Apudyus we umoy antuttudu ḵan diḵani te naippun maḵaḵwa'tta nakaskasdaawe sinyale ḵoom nu maid aḵ Apudyus ḵan siya.”

³ Ḵanan Jesus, “Ibagaḵ ḵan siḵa ḵatuttuwaan, nu adi tagu miyanaḵ ḵasin, adipun maḵwae midoga si ampangatan Apudyus.”

⁴ Ḵanan Nicodemus ḵan siya, “Ngai inon ni tagu we miyanaḵ ḵasin nu naḻaḵay? Maḵwa ḵamman mipauli si buwang inana ta miyanaḵ ḵasin?”

⁵ Ḵanan Jesus, “Ibagaḵ ḵan siḵa ḵatuttuwaan, adipun maḵwae midoga tagu si ampangatan Apudyus nu adi miyanaḵ atte danum ya sa Ispiritu Santu.

⁶ Sa miyanaḵ atte tagu, siya abeng di tagu yaḵon sa miyanaḵ atte Ispiritu Santu, siya abeng Apudyus te naispirituwan.

⁷ Adiḵa mataag atte imbagaḵe ḵasapuḻane miyanaḵ ḵayu ḵasin.

⁸ Isun ni bibbid, adipun maila yaḵon angoy atte dinuman. Dongngonyu bungug ni bibbid yaḵon naippun igammuyu si maḻpuwana ḵan ayonana. Sadi isunae naippun maila ḵan maawatan atte inon ni miyanaḵ ḵasin atte Ispiritu Santu yaḵon tuttuwae awad de ambanagana'tte biyag ni miyanaḵ ḵasin mipagapu'tte Ispiritu Santu.”

⁹ Ḵanan Nicodemus, “Ngai inonae maḵwa?”

¹⁰ Ḵanan Jesus, “Ngai inonae siḵa osa'tta madaydayawe mistulu'd Israel yaḵon adimpun maawatan da sana?

¹¹ Ibagaḵ ḵan siḵa ḵatuttuwaan, siya panoḵnoḵanni igammuni ya da innilani yaḵon adiyupun patiyon.

¹² Nu imbagaḵ ḵan diḵayu da mipanggob atta maḵwa si annae lubung ya adiḵayupun amati, ngai inonyu we amati nu ibagaḵ da mipanggob atta maḵwa'd langit?

¹³ Naippun nampangatu'd langit yaḵon abusaḵe Abeng Di Tagu we dummoḻae naḻpu'd langit.

¹⁴ Sa ḵingwan Moses, intayagna gambange sinan-uḻog si inninggawanda'tte bumbummaaw. Sadi isun ni maḵwa ḵan saḵone Abeng Di Tagu we ḵasapuḻane mitaḻayag,

¹⁵ ta ngaimane amati ḵan saḵon, awad ḵan siya biyag aḵ inggana.”

¹⁶ Gapu ta amod de ayat Apudyus atta tagu si lubung, innatodna os-ossaane abengna'ḵ datun ta ngaimane amati ḵan siya, adipun madusa'ḵ inggana yaḵon awad ḵan siya biyag aḵ inggana.

¹⁷ Imbuun Apudyus abengna si lubunge daḵampun aḵ dusaona da tagu gapu'tta basuḻda. Yaḵon imbuunna ta taguwona dida si sadi ye madusaanda.

¹⁸ Pun da amati ḵan siya, adidapun maḵoddongan. Yaḵon da adipun amati, naḵoddonganda. Te adidapun amati'tte os-ossaane Abeng Apudyus.

¹⁹ Annaya gapunae maḵuwisda. Ummali si annae lubung sadi ye ngannonda Silawe anilaw atta an-aawat taḵu mipanggob ḵan Apudyus yaḵon siya dinumaon da tagu pongot nu sa silaw te lawweng ḵoḵoḵḵonda.

²⁰ Te da losane angwa'ḵ lawweng, sasangngaanda sadi ye ngannonda silaw ya adidapun umadani te adidapun pione masilawan da ḵoḵoḵḵonda.

²¹ Yaḵon da angunud atte ḵatuttuwaan, umadanida'tte silaw ta mamaḵ-ilae aḵ Apudyus maḻpuwan ni angwaanda'tta ambaḻu we ḵoonda.

Sa Imbagan John Mipanggob Ḵan Jesus

²² Pune sadi, ummoy aḵ Jesus ya da disipuluna'tte probinsiya'd Judea woḵ inninggawda sidi ta ambonyagda'tta tagu.

²³ Aḵ John ḵad os, nambonyag ad Aenon we adani'd Salim te adu danum sidi. Ḵad dumanatong da tagu we umoy ḵan siya pabonyag.

²⁴ Daampun aḵ John mibaḻud si sadi ye timpu.

²⁵ Angwa ḵad da disipulun John, naḵasossongbatda'tte osae Judyu si mipanggob atte ugalida we pumoḻḵasan.

²⁶ Pun ummoyda ḵan John woḵ ḵananda, “Mistulu, sa tagu we ummali ḵan siḵa si domang ni tawwang Jordan we sa pinanoḵnoḵam, awade ambonyag ḵad losan da tagu umoy ḵan siya.”

²⁷ Summongbat aḵ John woḵ ḵanana, “Naippun tagu'ḵ awad awatona nu adi abus maatod ḵan siyae maḻpu ḵan Apudyus.

²⁸ Diḵayu we mismu anaḵdoḻ atte imbagaḵe daḵampun aḵ saḵon Kristu yaḵon saḵon imbuun Apudyus we umuna nu siya.

²⁹ Sa ḵasasaadḵu isuna buḻbuḻun ni ankasar we laḻaḵi. Ḵad taḵon ay nu daḵampun ḵan siya angikasar si bubai, amod de layadnae midoga si kasar te dongngona gingan ni buḻbuḻunna. Sadi isuna ḵan saḵone amoamod layadḵu sinsadi gapu ḵan Kristu.

³⁰ Pun ḵasapuḻane siya ngumatu ya saḵon dumoḻa te siya planun Apudyus.”

Sa Naḻpu Ad Langit

³¹ Sa naḻpu si annae luta, ḵuwan ni luta ya abus aḵ ugudona mipanggob atte luta. Sa naḻpu'd langit, siya ḵangatuwan.

³² Ibagana da innilana ḵan dingngoḻna yaḵon aḵit da amati'tta ibagana ḵan dida.

³³ Ḵad da amati'tta ibagana, panoḵnoḵandae tuttuwa ibagan Apudyus.

³⁴ Sa imbuun Apudyus, siya ugudona da Ugud Apudyus te innatod Apudyus Ispiritu Santu ḵan siyae ippun anungusna.

³⁵ Te aḵ Ama we Apudyus, ayatona abengna woḵ impuḻangna ḵan siya da losan.

³⁶ Ḵad ngaimane tumuttuwa gapu si amatiyana'tte Abengna, maatod ḵan siya biyag aḵ inggana. Yaḵon sa adipun tumuttuwa gapu si adinapun amatiyan atte Abengna, ippun ḵan siya biyag aḵ inggana yaḵon sa sangan Apudyus iinggaw ḵan siya.