John 20 - Sa Ugud Apudyus

Sa Ummuliyan Jesus

¹ Mabigat ḵade nagangput umillongane ngannonda ummunae aḻgaw ni sindumingguwan, nammadam-an taḻun aḵ Mary Magdalene we ummoy atte nilibonan Jesus. Sissiya ḵade anggiḵbot, innilanae naḵaan batu we onob ni libon.

² Pun nanoddaḵe ummoy ḵan da Simon Peter ya sa osae disipulu we ay-ayaton Jesus woḵ ḵanan Mary ḵan dida, “Innaḻada ladag Apu Jesus ḵad ippun igammuni nu dinu nangiggaanda.”

³ Nangwa ḵad da Peter ya sa osae disipulu, lummibbatda woḵ ummoyda si libon.

⁴ Losanda nanoddaḵ yaḵon nilasiyan ni osae disipulu'ḵ Peter woḵ ummuna niduum atte libon.

⁵ Pun ummobaob ta ilana'd daḻom woḵ innilana sinnune babaddong yaḵon adipun nillumnoḵ.

⁶ Dummatong ḵad aḵ Simon Peter we nituntun-ud, nillumnoḵ si libon woḵ innilana sinnune babaddong

⁷ ya sa sinnune nibusdung si uḻunae natipli ya nisina'tta sinnune babaddong.

⁸ Sa osae disipulu we ummuna niduum atte libon, nillumnoḵ os woḵ innilana ḵad da naḵwa, namati ye ummuli'ḵ Jesus.

⁹ Te sa sadi ye timpu, daandapun maawatan nigili ye Ugud Apudyus we ḵananae ḵasapuḻane umuli'ḵ Jesus.

¹⁰ Pun ummoyon da disipulu atta naḻpuwanda.

Sa Nampail-an Jesus Ḵan Mary

¹¹ Yaḵon aḵ Mary Magdalene, sisiḵad si lasin ni libone umibiibil. Ummobaob ḵade umibiibil ta ilana'd daḻom si libon,

¹² innilana da duwae anghel we nansilup aḵ itaḵe tutuḵdu si nibadongan ni ladag Jesus, sa osa si nan-uḻuwana ya sa osa si nan-uyadana.

¹³ Ḵananda ḵan Mary, “Bubai, ngaipaḵa umibiibil?” Ḵanana ḵan dida, “Te innaḻada ladag Apuḵ ḵad naippun igammuḵ nu dinu nangiggaanda ḵan siya.”

¹⁴ Imbagana ḵad sadi, nantawili woḵ innilana'ḵ Jesus we sisiḵad yaḵon adinapun immatunan.

¹⁵ Ḵanan Jesus ḵan siya, “Bubai, ngaipaḵa umibiibil? Ngai singsingtom?” Ḵanampun Mary nu sa angayyuwan atte mumuḻḻaan woḵ ḵanana, “Apu, nu intallaynu, ibagam nu dinu nangiggaam ta iyyaḵ aḻan.”

¹⁶ Ḵanan Jesus ḵan siya, “Mary!” Nansagung aḵ Mary woḵ ḵanana ḵan siya si Hinebrew, “Rabboni,” sa piona ḵanan Mistulu.

¹⁷ Ḵanan Jesus, “Adim yan onnan saḵon te daanaḵpun mipauli ḵan Amaḵ. Yaḵon inḵa'tta susunudḵu we namati ya ibagam ḵan didae mipauliyaḵ ḵan Amaḵ we Amayu ya Apudyusḵu we Apudyusyu.”

¹⁸ Pun ummoy aḵ Mary Magdalene woḵ imbagana'tta disipulu ḵanane, “Innilaḵ aḵ Apu.” Ḵad imbagana ḵan dida da inugud Jesus ḵan siya.

Sa Nampail-an Jesus Atta Disipuluna

¹⁹ Ḵugḵugab ḵad si sadi ye aḻgawe sa umunae aḻgaw ni sindumingguwan, nidaḵig inggawan da disipulu te maḵimutda'tta Judyu. Nampaila'ḵ Jesus woḵ naḵataḵdog ḵan dida woḵ ḵanana, “Lin-awa oḵyan awad ḵan diḵayu.”

²⁰ Imbagana ḵad sana, impailana da imana ya sa butiḵna. Pun nallaylayad da disipuluna si innilada'ḵ Apu.

²¹ Pun ḵanan os Jesus ḵasin ḵan dida, “Lin-awa awad ḵan diḵayu. Ibuunḵu diḵayu we isun ni nangibuunan Amaḵ ḵan saḵon.”

²² Imbagana ḵad sana, sinap-uyana dida woḵ ḵanana, “Awatonyu Ispiritu Santu.

²³ Nu pakawanonyu da basuḻ da ngaiman, mapakawanda. Yaḵon nu adiyupun pakawanon dida, adidapun mapakawan.”

Sa Nampail-an Jesus Ḵan Thomas

²⁴ Yaḵon aḵ Thomas we ngannonda Ḵapil ya osa'tta disipulu, naippun ḵan dida si nampail-an Jesus.

²⁵ Pun imbagan da udume disipulu ḵanane, “Innilani'ḵ Apu.” Yaḵon ḵanana ḵan dida, “Nu adiḵ ilan ḵan igga tammuduḵ atte aled ni pattoḻ atta imana ya adiḵ appadan butiḵna, adiyaḵpun amati.”

²⁶ Naḻaḵpus ḵad sindumingguwan, inninggaw os da disipulu'tte boḻoy woḵ inninggaw aḵ Thomas ḵan dida. Nidaḵig onob yaḵon nampaila'ḵ Jesus woḵ naḵataḵdog ḵan dida woḵ ḵanana, “Lin-awa awad ḵan diḵayu.”

²⁷ Pun ḵanana ḵan Thomas, “Ilam da imaḵ ya appadam dida. Uyadom imam ya iggam atte sugat ni butiḵḵu. Adiḵa ogon anduwaduwa yaḵon amatiḵa.”

²⁸ Summongbat aḵ Thomas ḵan siya woḵ ḵanana, “Apuḵ ḵan Apudyusḵu!”

²⁹ Ḵanan Jesus ḵan siya, “Namatiḵa gapu ta innilam saḵon? Pian da adipun nangila ḵan saḵon yaḵon namatida.”

³⁰ Adu da nakaskasdaawe sinyale ḵingwan Jesus atte sinagung da disipulunae adipun nigili si annae iblu.

³¹ Yaḵon nigili da anna ta amati ḵayu we aḵ Jesus siya Kristu we Abeng Apudyus ḵad sa amatiyanyu awad ḵan diḵayu biyag gapu ḵan siya.