John 2 - Sa Ugud Apudyus

Sa Kasar Ad Cana

¹ Naḻaḵpus ḵad duwan aḻgaw, inggaw kasar ad Cana si probinsiya'd Galilee. Inninggaw inan Jesus sidi,

² ya inninggaw os aḵ Jesus ya da disipuluna te naayaganda.

³ Naamin ḵad bayas, ḵanan ni inan Jesus ḵan siya, “Naaminanda'ḵ bayas.”

⁴ Ḵanan Jesus, “Ina, adipun ḵasapuḻane ibagam ḵooḵ. Daampun dumatong orase anuttuwaaḵ atte planun Apudyus.”

⁵ Pune sadi, ḵanan ni inan Jesus atta antataug atte bayas, “Ḵoonyu da ngaimane ibagana ḵan diḵayu.”

⁶ Awad de ugalin da Judyu atte pumoḻḵasan. Pun inggaw sidi onome ammutu we batug di opat baḵon nu onom lataan si danum.

⁷ Ḵanan Jesus atta antataug atte bayas, “Punuwonyu da annae ammutu si danum.” Pun pinnuda losan dida.

⁸ Pune sadi ḵanana, “Gumaud ḵayu ta iyoyyu'tte angidaḻan si amung.” Pun nangiyoyda ḵan siya.

⁹ Sinimsimana ḵad danume nambalin aḵ bayas, ippun igammuna si naḻpuwana te abus da nanaug aḵ nangigammu. Inabusna ḵad sinimsiman, inayagana laḻaḵi ye ankasar,

¹⁰ woḵ ḵanana ḵan siya, “Sa ugali taḵu, pasige umuna mitaug ampiyae bayas ḵad nu mabebbelengan da tagu, asiyot mitaug bogsaḻ. Yaḵon siḵa ḵad, indudulinnu ampiyae bayas woḵ asim intoḵwaḻ si anungusna.”

¹¹ Sa annae ḵingwan Jesus ad Cana we ili'tte probinsiya'd Galilee, sana ummunae nakaskasdaawe sinyale nangipail-ana'tte ḵinaapudyusna. Pune sadi, namati da disipuluna ḵan siya.

¹² Nagangput ḵad kasar, ḵesan da Jesus ya aḵ inana, da susunudna ya da disipuluna'd Capernaum woḵ inninggawda sidi'ḵ sin-aḵitane aḻgaw.

Sa Namaḻyawan Jesus Atta Allaḵlaḵu Atte Templo

¹³ Madam-an ḵad de Gayagayan da Judyu we ngannonda Nallausan, ummoy da Jesus ad Jerusalem.

¹⁴ Nillumnoḵ atte paway ni templo we boḻoy Apudyus woḵ indasana da allaḵu'tta baḵa, karnero, kalapati ya da ansusuḵat aḵ pilaḵe atuḵtuḵdu'tta lamisaan.

¹⁵ Pun nangwa'ḵ aplitna'tte tali woḵ pinaḻyawna dida'tte lasin ni templo, nidoga da baḵa ḵan da karnero. Iwwaliwalisna pilaḵ da ansusuḵat aḵ pilaḵ woḵ binalittuwaḵna da lamisaanda.

¹⁶ Ḵanana bos atta allaḵu'ḵ kalapati, “Ḵaanonyu da sanat si anna! Adiyu ambalinon aḵ lalaḵḵuwan boḻoy Amaḵ!”

¹⁷ Pune sadi, inḵagasmoḵ da disipuluna nigili ye Ugud Apudyus we ḵanana, “Sa angipatogaḵ si boḻoynu we adidapun patgan, siya matoyaḵ.”

¹⁸ Innilan ḵad da papangat da Judyu ḵingwana ḵananda, “Ngai sinyale ipailam ḵan diḵani ta panoḵnoḵame anna ḵaḻabbongame angwa'tta ḵaḵna?”

¹⁹ Ḵanan Jesus, “Nu dadailonyu annae templo, taḵadoḵ si tuḻun aḻgaw.”

²⁰ Ḵanan da Judyu, “Opatpuḻu ya onome tawon nanaḵadanda'tte annae templo. Lamognu ḵamman taḵadon si abuse tuḻun aḻgaw?”

²¹ Yaḵon sa pion Jesus ugudone templo, sa long-agna.

²² Pun ummuli ḵad aḵ Jesus, inḵagasmoḵ da disipuluna sanae imbagana. Pun namatida si nigili ye Ugud Apudyus mipanggob ḵan siya ya tuttuwa da imbagan Jesus.

²³ Adu da namati ḵan siya si inggawana'd Jerusalem atte timpun ni Gayagayan da Judyu we ngannonda Nallausan te innilada da nakaskasdaawe sinyale ḵingwana.

²⁴ Yaḵon adimpun Jesus intaḻgod long-agna ḵan dida. Te iniiggammuna somsomoḵ da losane tagu.

²⁵ Ḵad adinapun ḵasapuḻane awad anaḵdoḻ mipanggob ḵan dida te inigammuna da awad atta somsomoḵda.