John 19 - Sa Ugud Apudyus

Sa Nangang-angyagan Da Suḻdadu Ḵan Jesus

¹ Pun impaaḻan Pilate aḵ Jesus atta suḻdaduna woḵ impaap-aplitna.

² Ḵad pummaliḵug da suḻdadu'tte naḻasiyane waḵaḻ woḵ imbaḻangatda ḵan siya woḵ sinilupanda si dilaage isun ni silup ni ari.

³ Pun nampasapasanidae ummoy ḵan siya woḵ ḵanandae nangang-angyag, “Matataguḵae Arin da Judyu!” Pun nilipaḵda.

Sa Naḵoddongan Jesus Aḵ Matoy

⁴ Lummawa ḵasin aḵ Pilate woḵ ḵanana'tta Judyu, “Annae paḻawaoḵ annae tagu ta igammuwonyu we ippun indasaḵ aḵ basuḻna.”

⁵ Pune sadi, lummawa'ḵ Jesus we nabaḻangatan atte waḵaḻe naḻasiyan ya nasilupan atte dilaag. Ḵanan Pilate, “Ilanyu annayae tagu!”

⁶ Innilan ḵad da papangat da papadi ya da guwaḻdan ni templo, ḵanandae nanugtug-uy, “Paipattoḻnu'tte kros! Paipattoḻnu'tte kros!” Ḵanan Pilate ḵan dida, “Aḻanyu ya ipattoḻyu'tte kros te naippun indasaḵ aḵ basuḻna.”

⁷ Ḵanan da Judyu we summongbat, “Awad de lintogni ye ḵasapuḻane matoy aḵ Jesus te ngannona long-agna'ḵ Abeng Apudyus.”

⁸ Dingngoḻ ḵad Pilate da sana, amo naḵimtan.

⁹ Pun nillumnoḵ ḵasin atte palasna woḵ ḵanana ḵan Jesus, “Dinu naḻpuwam?” Yaḵon adipun aḵ Jesus summongbat.

¹⁰ Pun ḵanan Pilate, “Ngaipam saḵon adi songbatan? Adimpun ḵamman igammu we anna ḵabooḻaḵe amuḵay ḵan siḵa ya ḵabooḻaḵe ampaipattoḻ ḵan siḵa'tte kros?”

¹¹ Ḵanan Jesus, “Naippun ḵabooḻam ḵan saḵon nu adin Apudyus innatod ḵan siḵa. Pun da nangipuḻang ḵan saḵon ḵan siḵa nadagdagson da basuḻda.”

¹² Inggan ni sadi, pinadas Pilate puḵayan aḵ Jesus yaḵon da Judyu ḵanandae nanugtug-uy, “Nu puḵayam sanate tagu, daḵampun aḵ buḻbuḻunnu Emperor ad Rome. Ngaimane ngannona long-agna ari, sumullagi si Emperor.”

¹³ Pun dingngoḻ ḵad Pilate da sana, pinaḻawana ḵasin aḵ Jesus woḵ ummoy tummuḵdu si tutuḵduwan ni anḵuwis atte igawe ngannonda Nadatdatan si Batu ya sa Hinebrew Gabbatha.

¹⁴ Annae mumamatuḵ si sadi ye aḻgawe ansagsaganaan da Judyu si Gayagayae ngannonda Nallausan. Ḵanan Pilate atta Judyu, “Annaya ariyu!”

¹⁵ Pun ḵanandae nanugtug-uy, “Pagongatnu! Pagongatnu! Paipattoḻnu'tte kros!” Ḵanan Pilate, “Pionyu ḵammane ipattoḻḵu'tte kros ariyu?” Ḵanan da papangat da papadi, “Naippun udum aḵ arini yaḵon sa Emperor.”

¹⁶ Pun impuḻang Pilate aḵ Jesus atta suḻdadu ta umoyda ipattoḻ atte kros.

Sa Nipattoḻan Jesus Atte Kros

¹⁷ Pun innaḻan da suḻdadu'ḵ Jesus woḵ intallayda si lasinna'd Jerusalem we impabuḵudda ḵan siya de krosna inggana'ḵ dummatongda si “Lugar ni Battuḵag” we ngannonda Golgotha atte Hinebrew.

¹⁸ Pun impattoḻda'ḵ Jesus atte kros sidi. Inninggaw os da duwae impattoḻda dida'tta krosda, sa osa'tte madawinanna ya sa osa'tte madawigina.

¹⁹ Inninggaw os impaigilin Pilate we impaiggana'tte kros Jesus we ḵanana, “Jesus we iNazareth, Arin da Judyu.”

²⁰ Adu da Judyu we namasa te adani'tte siyudad sadi ye nipattoḻan Jesus atte kros ya nigili si tuḻu we nansabasabali ye ugud we Hinebrew, Linatin ḵan Grineek.

²¹ Pun ummoy da papangat da papadi ḵan Pilate woḵ ḵananda, “Adim igili, ‘Arin da Judyu,’ ta siya igilim, ‘Ḵanan ni annae tagu we siya Arin da Judyu.’ ”

²² Ḵanan Pilate, “Ngai ḵappagay inggiliḵ, siya!”

²³ Nagangput ḵade impattoḻ da suḻdadu'ḵ Jesus atte kros, innaḻada silupna woḵ nanḵapatonda nambisbisaḵan. Innaḻada bos taḵḵop ni silupnae ippun nandaubana.

²⁴ Pun ḵananda, “Umadi taḵu pissayon ta ambubbunut taḵu nu ngai anginḵuwa.” Naḵwa da anna ta mituttuwa nigili ye Ugud Apudyus we ḵanana, “Nambisbisaḵanda silupḵu ya nambubbunutda nu ngai anginḵuwa si osae silupḵu.” Ḵaḵna ḵingwan da suḻdadu.

²⁵ Da summisiḵad ḵad si adanin ni de kros Jesus aḵ inana, sa sunud ni inana, aḵ Mary ye asawan Clopas ya aḵ Mary Magdalene.

²⁶ Innilan ḵad Jesus inana ya sa ay-ayatonae disipulu we summisiḵad si adani, ḵanana'tte inana, “Ina, annaya ibelangnu'ḵ abengnu.”

²⁷ Pun ḵanana bos atte sanae disipuluna, “Annaya ibelangnu'ḵ inam.” Pun inggan ni sadi ye timpu, intallay ni disipulu inan Jesus woḵ paigawona'ḵ ḵuwada.

Sa Natoyan Jesus

²⁸ Inigammun ḵad Jesus we ginanggangputna da losan ḵanana, “Nauwawaḵ,” ta mituttuwa nigili ye Ugud Apudyus.

²⁹ Inninggaw angange napnu'tte naḵilome bayase sasaad. Pun illinong da suḻdadu impaḵawdae isunan ḵapos atte pangan ni hyssop woḵ indawdawda'tte sungad Jesus.

³⁰ Sinusup ḵad Jesus ḵilom ḵanana, “Naganggangput.” Pun nayyung-ut woḵ natoy.

³¹ Gapu ta ansaganaan da Judyu para'tte umillongan atte mabigat, adimpun da Judyu pione matenan da ladag atte kros si umillongane ampatoge aḻgaw. Pun ḵindawda ḵan Pilate we maptod da suḵin da nipattoḻ atte kros ya maopas da ladagda.

³² Pun iyyunud Pilate woḵ ummoy da suḻdadu pintod da suḵin da duwae buḻun Jesus we nipattoḻ atta krosda.

³³ Yaḵon niduumda ḵad ḵan Jesus, inniladae nagangput natoy woḵ adidapun pintod da suḵina.

³⁴ Yaḵon sa osa'tta suḻdadu, dinuy-uḵna si tubay butiḵ Jesus woḵ daguse pummoy-as daḻa ḵan danum.

³⁵ Sa nangila'tte sanae naḵwa, tinaḵdoḻana ḵatuttuwaan ḵan igammunae imbagana ḵatuttuwaan ta amati ḵayu bos.

³⁶ Ḵad naḵwa da sana ta mituttuwa nigili ye Ugud Apudyus we ḵanana, “Naippun ossaan aḵ maptod atta tung-aḻna.”

³⁷ Ḵad awad os Ugud Apudyus we ḵanana, “Asida ilan dinuy-uḵda.”

Sa Nilibonan Jesus

³⁸ Naabus ḵad sadi, ummoy ḵan Pilate aḵ Joseph we iyArimathea we osa'tta disipulun Jesus yaḵon illimodna te maḵimut atta Judyu. Pun ḵindawna ḵan Pilate nu maḵwae opasona ladag Jesus atte kros ta itallayna. Iyyunud Pilate woḵ ummoyna impas ladag Jesus woḵ intallayna.

³⁹ Aḵ Nicodemus we ummoy ḵan Jesus si sillabiyan. Nangawit aḵ bangbanglu we myrrh ya da aloe we batug di tuḻumpuḻu we kilo.

⁴⁰ Pun innaḻada ladag Jesus woḵ pinutiputanda'tte itaḵe sinnune nabangbangluwan te siya ugalin da Judyu.

⁴¹ Sa lugar we nipattoḻana inggaw mumuḻḻaan ya sa sadi ye mumuḻḻaan inggaw ḵaḵḵopyae libone ippun nilibon.

⁴² Pun gapu ta ansaganaan da Judyu para'tte umillongan atte mabigat ya adani libon, illibonda'ḵ Jesus sidi.