John 18 - Sa Ugud Apudyus

Sa Nanoḵmaanda Ḵan Jesus

¹ Nagangput ḵad nalluwaḻu'ḵ Jesus, ummoyonda'tta disipuluna woḵ dummoḻmangda'tte wail Kidron. Awad de mumuḻḻaan pun siya ummayanda.

² Igammun Judas we angituyuḵ ḵan Jesus sadi ye lugar te sidi dam-on da Jesus ya da disipuluna andaḵdaḵngan.

³ Pun impuyut Judas da suḻdadu we iRome ya da guwaḻdan ni templo we imbuun da papangat da papadi ya da Pharisee. Nampaḵ-odonda'ḵ silaw, pinatud ya aggom.

⁴ Gapu ta inigammun Jesus da losane maḵwa ḵan siya, inabotna dida woḵ ḵanana, “Ngai singtonyu?”

⁵ Ḵanandae summongbat, “Aḵ Jesus we iNazareth.” Ḵanan Jesus, “Saḵon.” Pun inninggaw aḵ Judas we angituyuḵ ḵan siyae sisiḵad si igawda.

⁶ Imbagan ḵad ay Jesus ḵatti, summunodda woḵ nampaklobda.

⁷ Pun ḵanan os Jesus we nan-imus, “Ngai singtonyu?” Ḵananda bos, “Aḵ Jesus we iNazareth.”

⁸ Ḵanan os Jesus, “Imbagaḵ ḵan diḵayu we saḵon. Ḵad nu saḵon singtonyu, iyunudyu we umoyon da disipuluḵ.”

⁹ Imbagana sana ta mituttuwa sadi ye inugudnae naippun ossaan aḵ tinaḻaḵḵu'tta innatod Apudyus ḵan saḵon.

¹⁰ Nangwa ḵad aḵ Simon Peter, inuḵputna ispadana woḵ binaḵagna madawinane ingan Malchus we musassun ni ḵangatuwane padi.

¹¹ Ḵanan Jesus ḵan Peter, “Ipaulim ispadam si bolbolloyna. Ḵanampun ḵamman nu adiḵ maanusan ampaḵaḻamane inḵoddong Amaḵ?”

Sa Nanumaḻyaanda Ḵan Jesus

¹² Pun da suḻdadu ya da kapitanda ya da guwaḻdan ni templon da Judyu dinoḵmaanda'ḵ Jesus woḵ binaḻudda da imana.

¹³ Inunada inniyoy ḵan Annas we ḵatugangan Caiaphas we ḵangatuwane padi si sadi ye tawon.

¹⁴ Binagbagaan Caiaphas da papangat da Judyu we unnoyna oḵyan ossaan aḵ matoy para'tta tagu.

Sa Namuḵlitan Peter Ḵan Jesus

¹⁵ Aḵ Simon Peter ya sa osae disipulu, nitun-udda ḵan Jesus. Gapu ta igammun ni ḵangatuwane padi osae disipulu, naḵaḻnoḵ ḵan Jesus atte paway ni boḻoyna.

¹⁶ Yaḵon aḵ Peter inninggaw si lasin ni lewangan ni paway. Sa osae disipulu we igammun ni ḵangatuwane padi, ummoy naḵaugud si bubai ye sammilu we guwaḻdan ni lewangan woḵ pinaḻnoḵna'ḵ Peter.

¹⁷ Ḵanan ni bubai ye inggaw si lewangan ḵan Peter, “Daḵampun ḵad ain aḵ osaḵa'tta disipulun Jesus?” Ḵanan Peter, “Daḵanaḵpun.”

¹⁸ Gapu ḵad ta antungnin, nan-apuy da sammilu ya da guwaḻda woḵ sisiḵaddae nan-anidu. Summisiḵad os aḵ Peter woḵ naḵaanidu.

Sa Nanumaḻyaan Ni Ḵangatuwane Padi Ḵan Jesus

¹⁹ Pun sinumaḻyan ni ḵangatuwane padi'ḵ Jesus mipanggob atta disipuluna ya sa tuttuduna.

²⁰ Ḵanan Jesus, “Patilayunaḵ antuttudu si maḻamaḻang atte sinagoga ya sa paway ni templo we andaḵdaḵngan da losane Judyu. Ḵad naippun imbagaḵ aḵ nitataḻu.

²¹ Ngaipa saḵon an-imusam? Maḵaimusḵa'tta tagu we nandongoḻ ḵan saḵon te igammuda da imbagaḵ.”

²² Imbagan ḵad ay Jesus anna, nilipaḵ ni osae guwaḻda bosaḻna woḵ ḵanana, “Ngaipa ḵaḵnat ansosongbatnu si ḵangatuwane padi?”

²³ Summongbat aḵ Jesus ḵan siya woḵ ḵanana, “Nu nankamali imbagaḵ, ibagam ḵan saḵon inugudḵu we nankamali. Yaḵon nu ustu da imbagaḵ, ngaipam saḵon lipaḵon?”

²⁴ Pun impaiyoy Annas aḵ Jesus we nabaḻud da imana ḵan Caiaphas we ḵangatuwane padi.

Sa Namuḵlitan Os Peter Ḵan Jesus

²⁵ Sisiḵad ḵad aḵ Simon Peter we an-anidu ḵananda, “Daḵampun ḵad ain aḵ siḵa osa'tta disipulun Jesus?” Pinuḵlitan os Peter woḵ ḵanana, “Daḵanaḵpun.”

²⁶ Pune sadi, sa osa'tta sammilun ni ḵangatuwane padi ye agin ni binaḵag Peter ingana ḵanana, “Daḵampun ḵad ain aḵ siḵa innilaḵe buḻunna si mumuḻḻaan?”

²⁷ Inḵasin Peter pinuḵlitan. Pun daguse nanullaḵuḵ ḵawitan.

Sa Nipuḻangan Jesus Ḵan Pilate

²⁸ Wiḵwiḵis ḵad, illawada'ḵ Jesus atte boḻoy Caiaphas woḵ inniyoyda'tte palas Gobernor Pilate. Yaḵon adipun nillumnoḵ da Judyu ta adida mibelang aḵ ḵaissaw yaḵon maḵaḵanda'tte Gayagayae ngannonda Nallausan.

²⁹ Pun lummawa'ḵ Pilate woḵ ḵananae nan-imus ḵan dida, “Ngai ipabasuḻyu si annae tagu?”

³⁰ Ḵanan da Judyu, “Nu daḵampun aḵ lawweng da ḵingwan ni annae tagu, adinipun oḵyan impuḻang ḵan siḵa.”

³¹ Ḵanan Pilate, “Aḻanyu gay ta ḵuwisonyu sigun si ḵuwayu we lintog.” Ḵanan da Judyu, “Yaḵon adipun miyunude ḵoddonganni ye mapatoy tagu.”

³² Naḵwa da anna ta mituttuwa imbagan Jesus si mipanggob atte inonae matoy.

³³ Pune sadi, nillumnoḵ os aḵ Pilate si palasna woḵ impaayagna'ḵ Jesus. Ḵanana, “Siḵa ḵamman Arin da Judyu?”

³⁴ Ḵanan Jesus, “Naḻpu ḵamman si somsomoḵnu sanate imusom baḵon nu awad udum aḵ nangibaga si mipanggob ḵan saḵon?”

³⁵ Summongbat aḵ Pilate woḵ ḵanana, “Judyuwaḵ ḵamman? Da ḵailiyam ya da papangat da papadi impuḻangda siḵa ḵan saḵon. Ngai ḵad ain ḵingwam?”

³⁶ Ḵanan Jesus, “Sa ḵaḻabbongaḵe ampangat daḵampun aḵ maḻpu si annae lubung. Nu maḻpu si annae lubung ḵaḻabbongaḵe ampangat, aaddi ye naḵagubat da disipuluḵ ta adiyaḵ oḵyan mipuḻang atta Judyu.”

³⁷ Ḵanan os Pilate, “Pun siḵa Ari?” Summongbat aḵ Jesus woḵ ḵanana, “Tuttuwa sadi ye ḵanam. Te niyanaḵaḵ ya ummaliyaḵ si annae lubung ta taḵdoḻaḵ ḵatuttuwaan. Ḵad da ngaimane angipatog atte ḵatuttuwaan, tuttuwaonda da ibagaḵ.”

³⁸ Ḵanan Pilate, “Ngai ḵatuttuwaan?” Imbagana ḵad sadi, lummawa ḵasin woḵ ḵanana'tta Judyu, “Naippun indasaḵ aḵ basuḻ ni annae tagu.

³⁹ Yaḵon awad de ugaliyu we ḵasapuḻane puḵayaḵ osa'tta baḻud si Gayagayae ngannonyu Nallausan. Pun pionyu we puḵayaḵ annae Arin da Judyu?”

⁴⁰ Ḵanandae nangiyipḵaw, “Adim aḵ Jesus puḵayan! Yaḵon aḵ Barabbas puḵayam!” Aḵ Barabbas ḵad tulisan.