John 13 - Sa Ugud Apudyus

Sa Namaḻbaḻan Jesus Atta Suḵin Da Disipuluna

¹ Madam-an ḵad Gayagayan da Judyu we ngannonda Nallausan, iniiggammun Jesus we dummatong timpu we tenana lubung ya mipauli ḵan Amana. Gapu'tte ayatna'tta taguna si lubung, ay-ayatona dida inggana'ḵ anungus.

² Angan ḵad da Jesus si sadi ye labi, impaspasmoḵ Satan ḵan Judas Iscariot we abeng Simon we ituyuḵna'ḵ Jesus.

³ Yaḵon inigammun Jesus we impuḻang Amana ḵan siya da losan ya inigammuna bose naḻpu ḵan Apudyus ḵad mipauli bos ḵan siya.

⁴ Pun summiḵad aḵ Jesus woḵ ḵinaanna taḵḵop ni silupna. Naabus ḵad, innaḻana tuwalya woḵ nanḵainna.

⁵ Pun imbuḵbuḵna danum si palanggan woḵ insaḻadnae amaḻbaḻ atta suḵin da disipuluna ya pinunasana si tuwalyae nanḵainna.

⁶ Niduum ḵad ḵan Simon Peter, ḵanan Peter ḵan siya, “Apu, baḻbaḻam ḵamman da suḵiḵ?”

⁷ Summongbat aḵ Jesus woḵ ḵanana, “Da annae ḵooḵ sinsadi adimpun maawatan yaḵon asim maawatan aḵ uni.”

⁸ Ḵanan Peter, “Adim paat baḻbaḻan da suḵiḵ.” Ḵanan os Jesus we summongbat, “Nu adiḵ baḻbaḻan da suḵim, adiḵapun midoga ḵan saḵon.”

⁹ Ḵanan Simon Peter, “Nu ḵaḵnat Apu, daḵampun aḵ abus da suḵiḵ aḵ baḻbaḻam yaḵon idogam os da imaḵ ya sa uḻuḵ.”

¹⁰ Ḵanan Jesus ḵan siya, “Sa tagu we nan-amos, adipun ḵasapuḻane ambaḻbaḻ te ampoḻḵas long-agna. Abus da suḵina'ḵ ḵasapuḻane mabaḻbaḻan. Ampoḻḵas ḵayu yaḵon daḵampun aḵ losan ḵayu.”

¹¹ Te iniiggammuna angituyuḵ ḵan siya. Sadi gapunae ḵanana, “Daḵampun aḵ losan ḵayu ampoḻḵas.”

¹² Inabusna ḵad binaḻbaḻan da suḵida, inniggana taḵḵop ni silupna woḵ nipauli si igawna. Ḵanana ḵan dida, “Igammuyu ḵamman ḵingwaḵ ḵan diḵayu?

¹³ Ngannonyu saḵon Mistulu ya Apu ḵad tuttuwa sanate imbagayu.

¹⁴ Pun nu saḵone Apuyu ḵan Mistuluyu namaḻbaḻ atta suḵiyu, ḵasapuḻane an-asibaḻbaḻ ḵayu.

¹⁵ Ḵingwaḵ anna ta awad ampaniyanyu. Ta ḵoonyu oḵyan os da ḵingwaḵ ḵan diḵayu.

¹⁶ Ibagaḵ ḵan diḵayu ḵatuttuwaan, naippun sammilu'ḵ nangatngatu nu sa apuna. Ḵad naippun mibuun aḵ nangatngatu nu sa nangibuun ḵan siya.

¹⁷ Nu igammuyu da anna, pian ḵayu nu ḵoonyu dida.

¹⁸ “Daḵampun aḵ ugudoḵe diḵayu losan te igammuḵ da piniliḵ. Yaḵon ḵasapuḻane mituttuwa Ugud Apudyus we ḵanana, ‘Sa ḵaubungḵu, siya angituyuḵ ḵan saḵon.’

¹⁹ Ibagaḵ ḵan diḵayu sinsadi si daanna maḵwaan ta maḵwa ḵad, amati ḵayu we saḵon.

²⁰ Ibagaḵ ḵan diḵayu ḵatuttuwaan, ngaimane angawat atta ibuunḵu, saḵon awatona. Ḵad sa angawat ḵan saḵon, awatona bos nangibuun ḵan saḵon.”

Sa Nangipaigammuwan Jesus Atte Angituyuḵ Ḵan Siya

²¹ Inabus ḵad Jesus imbaga da anna, an-aalimuun woḵ panoḵnoḵana'tta disipuluna ḵanane, “Ibagaḵ ḵan diḵayu ḵatuttuwaan, osa ḵan diḵayu angituyuḵ ḵan saḵon.”

²² Nan-asitollong da disipuluna te naippun igammuda nu ngai ḵan dida.

²³ Sa osa'tta disipulu we ay-ayatona, ansasaḻay si daḻnigna.

²⁴ Pun sininyasan Simon Peter ta imusona ḵan Jesus nu ngai ḵan dida inugudna.

²⁵ Pun nansaḻay sadi ye disipulu ḵan Jesus woḵ ḵanana, “Apu, ngai ḵan diḵani angituyuḵ ḵan siḵa?”

²⁶ Ḵanan Jesus, “Sa angittaḵ atte isawsawḵu we tinapay, siya.” Pun insawsawna ḵad innatodna ḵan Judas Iscariot we abeng Simon.

²⁷ Innaḻan ḵad ay Judas tinapay, nillumnoḵ aḵ Satan ḵan siya. Pun ḵanan Jesus ḵan siya, “Angganasome angwa si piom ḵoon.”

²⁸ Naippun nangigammu'tta inggaw atte lamisaan nu ngaipana imbaga sadi ḵan siya.

²⁹ Gapu ta aḵ Judas nangdon si pilaḵda, ḵanampun da udum nu imbagan Jesus we umoy ngumina'tta masapuḻda si gayagaya baḵon nu angitod atte pilaḵ atta ḵapus.

³⁰ Innaḻan ḵad ay Judas tinapay, nampiwot. Labi sadi.

Sa Baru We Bilin

³¹ Nalismud ḵad aḵ Judas, ḵanan Jesus, “Sinsadi midayaw Abeng Di Tagu ya mipagapu ḵan siya midayaw aḵ Apudyus.

³² Ḵad nu midayaw aḵ Apudyus mipagapu ḵan siya, idayaw os Apudyus we mismu ya idayawnae dagus.

³³ “Aabengḵu, sin-aḵitan inggawaḵ ḵan diḵayu. Ḵad singtonyu saḵon ya sa imbagaḵ atta Judyu, sinsadi annae ibagaḵ ḵan diḵayu we sa annae ayaḵ, adiḵayupun maḵaali.

³⁴ Ittoḵ ḵan diḵayu baru we bilin. Ḵasapuḻane an-asiayat ḵayu we isun ni an-aayatḵu ḵan diḵayu.

³⁵ Siya angigammuwan da losane tagu we disipuluḵ diḵayu nu an-asiayat ḵayu.”

Sa Nangibag-an Jesus Si Amuḵlitan Peter Ḵan Siya

³⁶ Ḵanan Simon Peter ḵan siya, “Apu, dinu ayam?” Ḵanan Jesus we summongbat, “Sa ayaḵ, adipun maḵwae mitun-udḵa sinsadi yaḵon asiḵa umun-unud.”

³⁷ Ḵanan Peter ḵan siya, “Apu, ngaipa adi maḵwae mitun-udaḵ sinsadi? Ittoḵ long-agḵu'ḵ matoy gapu ḵan siḵa.”

³⁸ Ḵanan Jesus we summongbat, “Tuttuwa ḵammane ittom long-agnu'ḵ matoy gapu ḵan saḵon? Ibagaḵ ḵan siḵa ḵatuttuwaan, daampun anullaḵuḵ ḵawitan, amiḵluwom saḵon puḵlitan.”