John 12 - Sa Ugud Apudyus

Sa Nangisigan Mary Atte Bangbanglu

¹ Anna ḵad onom aḻgaw ya asiyot Gayagayan da Judyu we ngannonda Nallausan, ummoy da Jesus ad Bethany ye sa ilin Lazarus we tinagun Jesus.

² Pun minangilida dida woḵ nallusnu'ḵ Martha. Aḵ Lazarus ḵad, nidoga ḵan da Jesus atte ḵaḵaḵḵanan.

³ Nangwa ḵad aḵ Mary, innaḻana gogwan di litro we napan-ige nard we sa ampatopatoge bangbanglu. Ḵingwana ḵad, inisigna'tta suḵin Jesus woḵ pinunasana'tte buuḵna. Pun nangalliwoḵ banguna si boḻoy.

⁴ Yaḵon aḵ Judas Iscariot we osa'tta disipulun Jesus we siya angituyuḵ ḵan siya

⁵ ḵanana, “Ngaipa adi ningina annae bangbanglu'ḵ tuḻun gasute palata ta maatod atta ḵapus?”

⁶ Yaḵon inugudna ḵatti ye daḵampun aḵ gapu ta madagu'tta ḵapus nu adi gapu ta aḵḵawan. Te siya nangdon si pilaḵda ḵad dam-on angaḻa si nauppun.

⁷ Pun ḵanan Jesus, “Sinnamaḻna te inggagappotna sanate bangbanglu'ḵ para si aḻgawe milibonaḵ.

⁸ Ḵad da ḵapus, pasigda anna ḵan diḵayu yaḵon saḵon ḵad, daḵampun aḵ pasigaḵ anna ḵan diḵayu.”

Sa Nantutuḻagan Da Judyu We Angongat Ḵan Lazarus

⁹ Dingngoḻ ḵad da aduadu we Judyu we dummatong aḵ Jesus ad Bethany, ummoyda sidi. Yaḵon daḵampune abus aḵ Jesus aḵ umoyda ilan nu adi pionda bos umoy ilan aḵ Lazarus we tinagun Jesus.

¹⁰ Nangwa ḵad da papangat da papadi, nantutuḻagandae gongaton os aḵ Lazarus.

¹¹ Te adu da Judyu we summina ḵan dida woḵ namatida ḵan Jesus mipagapu ḵan Lazarus we tinagun Jesus.

Sa Nanaydayawanda Ḵan Jesus Ad Jerusalem

¹² Mabigat ḵad, dingngoḻ da amoamode nandatdatong atte gayagaya'd Jerusalem we annat aḵ Jesus si daḻan.

¹³ Ḵingwada ḵad, nangaḻada'tta baing woḵ lummawada ta umoyda aboton. Ḵanandae nanugtug-uy, “Madaydayaw aḵ Apudyus! Madaydayaw oḵyan umali ye imbuun Apudyus we Ari taḵu we ganaḵ Israel!”

¹⁴ Aḵ Jesus ḵad, impaidatongna ubbun ni donkey woḵ angabayuwana te ḵanan ni nigili si Ugud Apudyus,

¹⁵ “Diḵayu we tagu'd Jerusalem, adi ḵayu maḵimut te annae umali Ariyu we nangabayu'tte ubbun ni donkey.”

¹⁶ Adimpun da disipulun Jesus naawatan da sadi ye naḵwa. Yaḵon nipauli ḵad aḵ Jesus ta midayaw ad langit, inḵagasmoḵdae da naḵwa ḵan siya dida da nituttuwaan ni nigili'tte Ugud Apudyus.

¹⁷ Da amode tagu we inninggaw ḵan Jesus we nangila si namaḻawaana ḵan Lazarus atte libonna woḵ tinaguna, tinaḵdoḻanda.

¹⁸ Sadi gapunae adu da tagu we ummoy niyabot ḵan siya te nandinongoḻe siya nangwa'tta annae nakaskasdaawe sinyal.

¹⁹ Pun ḵanan da Pharisee, “Ilanyu ḵad, ippun botlon taḵu te siya unudon da losane tagu si lubung.”

Da Gentil Pionda Ilan Aḵ Jesus

²⁰ Inninggaw os da udume Gentil we ummoy nandayaw ḵan Apudyus atte gayagaya'd Jerusalem.

²¹ Ummoyda ḵan Philip we iBethsaida we osae ili'tte probinsiya'd Galilee woḵ ḵananda, “Apu, pionni ye ilan aḵ Jesus.”

²² Ummoy Philip imbaga ḵan Andrew woḵ ummoydae duwa imbaga ḵan Jesus.

²³ Ḵanan Jesus, “Saḵone Abeng Di Tagu, dummatong timpu we midayawaḵ.

²⁴ Ibagaḵ ḵan diḵayu ḵatuttuwaan, sa ossaane buḵoḻ nu adi maottag si luta ya matoy, umoossaan. Yaḵon nu matoy, amunga'ḵ adu.

²⁵ Ngaimane angayat atte biyagna, taḻaḵona. Yaḵon ngaimane anasanga si biyagna si annae lubung, matagu'ḵ inggana.

²⁶ Ngaimane anserbi ḵan saḵon, ḵasapuḻane tun-udonaḵ ya dinumane inggawaḵ, siya bos inggawan ni sammiluḵ. Ngaimane anserbi ḵan saḵon, dayawon Amaḵ.”

Sa Nangipaigammuwan Jesus Si Matoyana

²⁷ Pinagatupan Jesus woḵ ḵanana, “Sinsadi, an-aalimuunaḵ. Ngai nin ay ibagaḵ? Ama, iligsiyaḵ sinsadi ye oras. Naid te siya ummaliyaḵ ḵasapuḻane ampaḵaḻamaḵ sinsadi ye oras.”

²⁸ Pun ḵanana ḵan Apudyus, “Ama, ipailam ḵinadayawnu.” Pun inninggaw gingae naḻpu'd langite ḵanana, “Impailaḵ ḵinadayawḵu ḵad asiḵ os ipaila ḵasin.”

²⁹ Dingngoḻ os da aduadu we tagu we sisiḵad de gingae naḻpu'd langit woḵ ḵanandae ḵummiduḻ. Ḵanan os da udum, “Naḵaugud osan anghel ḵan siya.”

³⁰ Pun ḵanan os Jesus ḵan dida, “Sa gingae dingngoḻyu, bumaḻuwanyu, daḵampun aḵ bumaḻuwaḵ.

³¹ Sinsadi ḵuwison Apudyus da tagu si annae lubung ya sinsadi aḵ Satan we pangat da tagu we adipun amati, maabaḵ.

³² Yaḵon nu mipangatuwaḵ atte annae luta, paadaniyoḵ da losane tagu ḵan saḵon.”

³³ Imbagana ḵaḵna ta ipailana inonae matoy.

³⁴ Pun ḵanan da amode tagu, “Sa igammuni'tte lintog taḵu, aḵ Kristu matagu'ḵ inggana. Pun ngai inonae ḵaname ḵasapuḻane mipangatu Abeng Di Tagu? Ngai ḵad ain annae Abeng Di Tagu?”

³⁵ Ḵanan Jesus we nangipani, “Sin-aḵitan inggawan ni silaw ḵan diḵayu. Pun ummanyu we anaddaḻan si annaan ni silaw ḵan diḵayu ta adi ḵayu magiḵbotan. Te sa anoḻwap, ippun igammuna'tte ḵapnona.

³⁶ Sa annaan ni silaw ḵan diḵayu, amati ḵayu atte silaw ta ambalin ḵayu'ḵ tagun ni silaw.” Naabus ḵade imbagan Jesus anna, tinenana dida woḵ adipun ogon nampappaila.

Sa Adimpun Da Judyu Amatiyan Ḵan Jesus

³⁷ Taḵon ay nu adu da nakaskasdaawe sinyale impailan Jesus ḵan dida, sissiyae adidapun amati ḵan siya,

³⁸ ta mituttuwa imbagan Profeta Isaiah we ḵanana, “Apu, ngai namati'tta imbagani? Ḵad ngai nangipail-an Apu si ḵabooḻana?”

³⁹ Sa gapunae adidapun namati, ḵanan os Profeta Isaiah,

⁴⁰ “Ḵinuḻap Apudyus dida ya tummungitong da pusuda ta adida maḵaimatun ḵan maawatan ya ansagungda ḵan saḵon ta pakawanoḵ dida.”

⁴¹ Imbagan Profeta Isaiah da anna te innilana ḵinadayaw Jesus woḵ inugudna bos mipanggob ḵan siya.

⁴² Yaḵon taḵon ay nu ḵatti, namati da adu we papangat da Judyu ḵan Jesus. Yaḵon insilibda te maḵimutda'tta Pharisee. Ta adida mapaḻyaw atte sinagoga.

⁴³ Te pipionda anayawan da tagu ḵan dida nu sa anayawan Apudyus ḵan dida.

Sa Anguwisan Jesus Atte Lubung

⁴⁴ Ḵanan Jesus we nangidangsoḻ, “Ngaimane amati ḵan saḵon, daḵampun aḵ abusaḵ aḵ patiyona yaḵon patiyona bos nangibuun ḵan saḵon.

⁴⁵ Ḵad ngaimane nangila ḵan saḵon, innilana bos nangibuun ḵan saḵon.

⁴⁶ Ummaliyaḵ atte annae lubung aḵ isun di silaw ta ngaimane amati ḵan saḵon, adidapun iinggaw atte giḵbot.

⁴⁷ “Ḵad ngaimane angngoḻ atta ugudḵu ya adinapun tuttuwaon, adiḵpun ḵuwison te daḵampun aḵ ummaliyaḵ ta ḵuwisoḵ lubung yaḵon ummaliyaḵ ta taguwoḵ.

⁴⁸ Sa angidiyan ḵan saḵon ya adipun anuttuwa'tte ugudḵu awad de anguwis. Sa inugudḵu siya anguwis ḵan siya si anungus ni aḻgaw.

⁴⁹ Te daḵampun aḵ nan-ugudaḵ aḵ naḻpu si ḵaḻabbongaḵ yaḵon aḵ Amaḵ we nangibuun ḵan saḵon, imbilinna nu ngai da ibagaḵ ḵan ugudoḵ.

⁵⁰ Ḵad da igammuḵe imbilinna, siya angitod si biyag aḵ inggana. Pun da ibagaḵ, siya da paibagan Amaḵ.”