John 10 - Sa Ugud Apudyus

Sa Mataḻgodane Antangḵon

¹ Pune sadi ḵanan Jesus we nangipani, “Ibagaḵ ḵan diḵayu ḵatuttuwaan, ngaimane adi lumnoḵ atte lewangan ni puḵuḵan da karnero yaḵon ḵumaḻab si osae maoy, sanat aḵḵawan ḵan tulisan.

² Yaḵon sa angoy si lewangan, siya gattoḵe antangḵon atta karnero.

³ Buḵatan ni guwaḻda onob ni lewangan nu angoy antangḵon atta karnero. Dongngon da karnero gingana nu poḵawana da ngadanda ḵad ipuyutna dida'ḵ lasin.

⁴ Illawana ḵad da karnerona, ummun-una ya mitun-udda ḵan siya te immatunanda gingana.

⁵ Adidapun mitun-ud atte ḵaili yaḵon umawidda te adidapun immatunan gingana.”

⁶ Sa annae pani, inug-uggud Jesus ḵan dida yaḵon adidapun maawatan piona ḵanan.

⁷ Pun ḵanan os Jesus we nangipani, “Ibagaḵ ḵan diḵayu ḵatuttuwaan, saḵon lewangane ayon da karnero.

⁸ Losan atta ummun-una nu saḵon, aḵḵawanda ḵan tulisanda. Yaḵon adimpun da karneroḵ tinuttuwa dida.

⁹ Saḵon lewangan ḵad ngaimane angoy ḵan saḵon, matagu. Isuna karnero we maḵwae lumnoḵ ḵan lumawa ya umoy anggaḻab.

¹⁰ “Umali aḵḵawan ta umoy an-aḵaw, pumatoy ḵan dumadail. Yaḵon ḵan saḵon, ummaliyaḵ ta ittaḵ da tagu si biyag aḵ inggana, sa biyage ippun angkurangana.”

¹¹ Ḵanan os Jesus, “Saḵon ambaḻu we antangḵon atta karnero. Sa ambaḻu we antangḵon ittona long-agna'ḵ matoy para'tta tangḵonna.

¹² Sa matangdanane antangḵon, nu awad ilana'ḵ atape asu aḵ angiduḵḵus atta karnero, tenana dida ya umawid te daḵampun aḵ siya gattoḵe antangḵon ya sinḵuwa'tta karnero. Ḵad sa atape asu, iduḵḵusna doḵmaan dida ya umasbuḵda.

¹³ Umawid sadi ye tagu te abuse matangdanan ya adinapun biyangan da karnero.

¹⁴ Saḵon ambaḻu we antangḵon atta karnero. Igammuḵ da karneroḵ ya igammuda bos saḵon.

¹⁵ Igammun Amaḵ saḵon ḵad igammuḵ os aḵ Amaḵ. Ḵad naḵasaganaaḵe angitod atte long-agḵu'ḵ matoy gapu'tta karneroḵ.

¹⁶ Awad da udume karneroḵe naippun atte annae puḵuḵan. Ḵasapuḻane ayagaḵ dida ta dongngonda gingaḵ. Ḵade sadi ambalinda'ḵ ossaane grupu ya ossaan antangḵon.

¹⁷ “Gapu'tte sana ayaton Amaḵ saḵon te ittoḵ long-agḵu'ḵ matoy ta asiḵ os pauliyon.

¹⁸ Naippun paat maḵaaḻa'tte biyagḵu yaḵon sipupusuwaḵe angitod. Anna ḵabooḻaḵe angitod atte biyagḵu ya anna bos ḵabooḻaḵe amauli. Sa imbilin Amaḵ, ḵasapuḻane ḵooḵ.”

¹⁹ Imbagan ḵad ay Jesus anna, nanggogwa bos ḵasin da Judyu gapu'tte imbagana.

²⁰ Adu da ḵananda, “Naaḻanan ya naḻapang. Ngaipayu dongngon?”

²¹ Yaḵon ḵanan da udum, “Daḵampun aḵ ḵaḵnat an-uugud ni maaḻanan. Lamog ḵamman ni aḻan diyaton da atan ni naḵuḻap?”

Sa Adimpun Da Judyu Amatiyan Ḵan Jesus

²² Ageled ḵad, sadi timpu we Gayagayan da Judyu we ngannonda Midatunan ni Templo ad Jerusalem.

²³ Aḵ Jesus ḵad anadtaddaḻan si Sawang Solomon atte templo.

²⁴ Pun inaligummun da papangat da Judyu woḵ ḵananda, “Atoman os ay angisilisilibam ḵan siḵa? Ibabaggam ḵan diḵani nu siḵa Kristu.”

²⁵ Ḵanan Jesus, “Ginangputḵu imbaga ḵan diḵayu yaḵon adiḵayupun amati. Da ḵewaaḻe ḵooḵ atte ḵaḻabbongan Amaḵ, dida anaḵdoḻ nu ngaiyaḵ.

²⁶ Yaḵon adiḵayupun amati te adiḵayupun nidoga'tta karneroḵ.

²⁷ Te da karneroḵ dongngonda gingaḵ. Ḵad igammuḵ dida ya tun-udonda saḵon.

²⁸ Ittoḵ ḵan dida biyag aḵ inggana ta adidapun misina ḵan Apudyus aḵ inggana ya naippun paat maḵapuḻos ḵan dida ḵan saḵon.

²⁹ Aḵ Amaḵ we nangitod ḵan dida ḵan saḵon, siya ḵangatuwan atta losan. Pun naippun ḵallamog maḵapuḻos ḵan dida ḵan Amaḵ.

³⁰ Saḵon ya aḵ Amaḵ, ossaan ḵani.”

³¹ Pune sadi, nangaḻa ḵasin da Judyu'ḵ batu ta batuwonda'ḵ Jesus inggana'ḵ matoy.

³² Yaḵon ḵanan Jesus, “Impailaḵ da adu we ambaḻu ḵan diḵayu we impaḵwan Amaḵ. Ngai'tta anna gapunae batuwonaḵ?”

³³ Ḵanan da Judyu we summongbat, “Daḵampun atta ambaḻu we ḵingwam amatuwanni ḵan siḵa nu adi sa nangiyisuwam si long-agnu ḵan Apudyus te taguḵae abus ya nambalinom long-agnu'ḵ Apudyus.”

³⁴ Ḵanan Jesus, “Daḵampun ḵamman aḵ sa nigili si lintogyu, ‘Imbagaḵe Apudyus ḵayu?’

³⁵ Nu ngannon Apudyus dida'ḵ Apudyus, ngai naḻpuwan ni Ugud Apudyus we ippun ambaliwana'ḵ inggana?

³⁶ Ngaipayu ḵanan ḵan saḵone intotoḵḵon ni Ama ya imbuunna si annae lubung, ‘Nan-ugud ḵayu'ḵ lawweng ḵan Apudyus,’ te sa imbagaḵ, ‘Saḵon Abeng Apudyus’?

³⁷ Nu adiḵ ḵoon da ḵewaaḻ Amaḵ, adiyu saḵon patiyon.

³⁸ Yaḵon nu ḵooḵ dida, taḵon ay nu adiyu saḵon patiyon, patiyonyu oḵyan da ḵooḵ ta igammuwonyu ya maawatanyu we sa Ama awad ḵan saḵon ya awadaḵ os ḵan siya.”

³⁹ Pun pinadasda ḵasin doḵmaan aḵ Jesus yaḵon adidapun te nallibas ḵan dida.

⁴⁰ Pune sadi, dummoḻmang ḵasin aḵ Jesus atte tawwang Jordan si lugar we nambonyagan John atte awe woḵ inninggaw sina.

⁴¹ Adu da tagu we umoy ḵan siya. Ḵananda, “Naippun ḵingwan John aḵ nakaskasdaawe sinyal yaḵon tuttuwa da losane imbagana si mipanggob ḵan siya.”

⁴² Pun adu da namati ḵan Jesus sidi.