John 1 - Sa Ugud Apudyus

Sa Ugud Nambalin Aḵ Tagu

¹ Sa daan ni lubung maḵwaan, gagangaye inninggaw Ugud. Sa Ugud inninggaw ḵan Apudyus ya siya Apudyus.

² Inninggaw Ugud ḵan Apudyus atte daan ni lubung maḵwaan.

³ Mipagapu ḵan siya ḵingwan Apudyus da losan. Naippun naḵwa nu adi gapu ḵan siya.

⁴ Siya naḻpuwan ni biyag ya sa sanae biyag siya anilaw atta somsomoḵ da tagu.

⁵ Sa sadi ye silaw, silawana pongot ḵad sa pongot adinapun paat oḻgon sadi ye silaw.

⁶ Inninggaw tagu we imbuun Apudyus we nangngadan aḵ John.

⁷ Ummali ta taḵdoḻana mipanggob si sadi ye silaw ta mipagapu ḵan siya amati oḵyan da losane tagu.

⁸ Daḵampun aḵ siya mismu we silaw yaḵon ummali ta taḵdoḻana mipanggob atte silaw.

⁹ Sa tuttuwae silaw, ummali si annae lubung ta silawana somsomoḵ da losane tagu.

¹⁰ Inninggaw si lubung ya mipagapu ḵan siya, naḵwa lubung yaḵon adimpun da tagu immatunan nu ngai'ḵ siya.

¹¹ Ummoy si mismu we ilina yaḵon adimpun da ḵailiyana inawat.

¹² Yaḵon da losane nangawat ya namati ḵan siya, innatodna ḵan dida ḵaḻabbongane ambalin aḵ abeng Apudyus.

¹³ Sa nambalinanda'ḵ abeng Apudyus, daḵampun aḵ isuna miyanaḵ atte tagu ḵan pion da an-asawa yaḵon naḻpu si ḵabooḻan Apudyus.

¹⁴ Sa Ugud, nambalin aḵ tagu woḵ inninggaw ḵan ditaḵu. Amod de ḵinabaḻuna ya ḵatuttuwaan da losane imbagabagana. Innilani ḵan siya nakaskasdaawe ugalin Apudyus te siya abus aḵ Abeng we naḻpu ḵan Amana.

¹⁵ Pinanoḵnoḵan John mipanggob ḵan siya woḵ ḵananae nangiyipḵaw, “Sana imbagabagaḵ ḵan diḵayu we awad de umun-unud ḵan saḵone nangatngatu te inggaw atte daanḵu mibuḵnagan.”

¹⁶ Ḵad gapu'tte ummamdane ḵinabaḻuna, binbindisyunana ditaḵu losane namati.

¹⁷ Innatod Apudyus lintog mipagapu ḵan Moses yaḵon mipagapu ḵan Jesu Kristu we pinilin Apudyus aḵ Anagu ya An-ari, impailana ḵinabaḻu ḵan ḵatuttuwaan mipanggob ḵan siya.

¹⁸ Naippun tagu'ḵ nangila ḵan Apudyus yaḵon aḵ Jesu Kristu we os-ossaane Abengna we mibuḻubuḻun ḵan Amana, siyae mismu nangipaigammu ḵan siya.

Sa Panoḵnoḵ John We Ambobonyag

¹⁹ Annaya tinaḵdoḻan John. Sin-aḻgawan ḵad, imbuun da papangat da Judyu ad Jerusalem da udume papadi ya da udume ganaḵ Levi ta umoyda imuson ḵan John nu ngai'ḵ siya.

²⁰ Adimpun John insilib yaḵon imbabaggana ḵatuttuwaan woḵ ḵanana, “Daḵampun aḵ saḵon Kristu.”

²¹ Pun ḵanandae nangimus, “Ḵad ngaiḵa nu? Siḵa'ḵ Profeta Elijah?” Ḵanana, “Naid! Daḵanaḵpun.” Pun ḵananda bos, “Siḵa ḵad ain profeta we an-uuggudon Apudyus we uuwayonni?” Ḵanan os John, “Naid! Daḵanaḵpun.”

²² Pune sadi ḵananda, “Ngaiḵa nu? Ibagam ḵappos te ḵasapuḻane awad ibagani'tta nangibuun ḵan diḵani. Ngai ḵad ain ḵanam ḵan siḵa?”

²³ Ḵanan John, “Saḵon inninggaw si bumbummaawe ḵanaḵe angiwaḻagawag, ‘Pagodongonyu daḻan si umaliyan Apu.’ ” Aḵ John nituttuwaan ni inggilin Profeta Isaiah si awe.

²⁴ Imbuun da Pharisee da tagu we maḵaim-imus ḵan John.

²⁵ Ḵanandae nangimus ḵan siya, “Ḵad nu daḵanḵapun aḵ Kristu baḵon nu aḵ Profeta Elijah baḵon nu sa profeta we uuwayonni, ngaipaḵa dam-on ambonyag nu?”

²⁶ Ḵanan John we summongbat, “Ambonyagaḵ si danume abus yaḵon annat ḵan diḵayu tataḵdoge ippun igammuyu.

²⁷ Siya umun-unud ḵan saḵon ḵad gapu'tte ḵinangatuna, ippun labbongḵu we anguḵas atte sandalna.”

²⁸ Naḵwa da anna'd Bethany atte biiḵ ni tawwang Jordan we sa nambonyagan John atta tagu.

Sa Karneron Apudyus

²⁹ Mabigat ḵad, innilan John aḵ Jesus we annate umali woḵ ḵanana, “Ilanyu! Annaya Karneron Apudyus we innatodna'ḵ midatun ta angaan atta basuḻ da tagu'tte lubung.

³⁰ Siya imbagabagaḵ ḵanane, ‘Awad de umun-unud ḵan saḵone nangatngatu te inggaw atte daanḵu mibuḵnagan.’

³¹ Taḵon ay saḵon, naippun igammuḵ nu ngai sanae umun-unud. Yaḵon ummaliyaḵ ta bonyagaḵ da tagu si danum ta mipaigammu'tta ganaḵ Israel.”

^32-33 Annaya panoḵnoḵ John si mipanggob ḵan Jesus. Ḵanana, “Naippun tuwa igammuḵ si annae umun-unud ḵan saḵon. Yaḵon sa nangibuun ḵan saḵon aḵ umoy ambonyag si danum ḵanana, ‘Sa ilame ansimpaan ni Ispiritu Santu ya inninggaw ḵan siya, siya angibonyag si Ispiritu Santu atta tagu.’ Ḵad innilaḵ Ispiritu we dummoḻae naḻpu'd langite isun di kalapati woḵ iinggaw ḵan siya.

³⁴ Innilaḵe mismu, pun panoḵnoḵaḵe siya tuttuwae Abeng Apudyus.”

Da Ummunae Disipulun Jesus

³⁵ Mabigat ḵad, inninggaw da John ya da duwae disipuluna'tte biiḵ ni tawwang Jordan.

³⁶ Innilana ḵad aḵ Jesus we lumaus ḵanana, “Ilanyu, annayat Karneron Apudyus we innatodna'ḵ midatun.”

³⁷ Dingngoḻ ḵad ay da duwae disipulu imbagan John, nitun-udda ḵan Jesus.

³⁸ Nantawili ḵad aḵ Jesus, innilana didae mituntun-ud woḵ ḵanana, “Ngai singtonyu?” Ḵananda, “Rabbi” sa piona ḵanan mistulu, “dinu inggawam?”

³⁹ Ḵanan Jesus, “Umali ḵayu ta ilanyu.” Pun ummoyda innila igawna woḵ naḵaigawda ḵan siya. Annae madam-an mipisong init inggana'ḵ labi.

⁴⁰ Sa osae nangngoḻ si imbagan John we nitun-ud ḵan Jesus, aḵ Andrew we sunud Simon Peter.

⁴¹ Ḵingwan ḵad Andrew, daguse ummoyna singngit sunudnae aḵ Simon woḵ ḵanana ḵan siya, “Indasanni Messiah.” Sa pion ni Messiah ugudon Kristu.

⁴² Pun inniyoyna'ḵ Simon woḵ ummoyda si igaw Jesus. Intollong ḵad Jesus ḵanana, “Siḵa'ḵ Simon we abeng John. Sinsadi ngadanaḵ siḵa'ḵ Cephas.” Sa ngadane Cephas atte Hinebrew, Peter atte Greek. Ḵad sa piona ḵanan batu.

Da Philip Ḵan Nathanael

⁴³ Mabigat ḵad, simsimmoḵ Jesus we umoy atte probinsiya'd Galilee. Indasana'ḵ Philip woḵ ḵanana ḵan siya, “Tun-udonaḵ ta ambalinoḵ siḵa'ḵ disipuluḵ.”

⁴⁴ Aḵ Philip ḵad iBethsaida we sa ilin da Andrew ḵan Peter.

⁴⁵ Pune sadi, indasan Philip aḵ Nathanael woḵ ḵanana ḵan siya, “Indasanni tagu we inggilin Moses si lintog ya da profetan Apudyus atte awe. Siya'ḵ Jesus we abeng Joseph we iNazareth.”

⁴⁶ Pun ḵanan Nathanael, “Awad ḵamman ambaḻu'ḵ naḻpu'd Nazareth?” Ḵanan Philip, “Awwaynu ta inta ilan.”

⁴⁷ Innilan ḵad ay Jesus aḵ Nathanael we umadani, imbagana mipanggob ḵan siya woḵ ḵanana, “Annaya tuttuwae ganaḵ Israel we adipun nasiḵap.”

⁴⁸ Ḵanan Nathanael we nan-imus, “Ngai inome nangigammu ḵan saḵon?” Ḵanan Jesus, “Taḵon ay daan Philip ḵan siḵa angayagan, innilaḵ siḵa si puun ni ḵayu we fig.”

⁴⁹ Pun ḵanan Nathanael, “Mistulu, siḵa Abeng Apudyus! Siḵa Ari'd Israel!”

⁵⁰ Ḵanan os Jesus, “Gapu'tte imbagaḵe innilaḵ siḵa si puun ni de fig, amatiḵa ḵamman? Asim ilan da sindumallu we nakaskasdaaw nu sa anna.”

⁵¹ Pun ḵanana bos ḵan dida, “Ibagaḵ ḵan diḵayu ḵatuttuwaan, sa umali ye aḻgaw asiyu ilane mabuḵatan ad langit ḵad ilanyu da anghel Apudyus we ngumatu ḵan dumoḻa ḵan saḵone Abeng Di Tagu we naḻpu'd langite niyanaḵ sina'd luta.”