James 5 - Sa Ugud Apudyus

Sa Bagbaga Atta Babaḵnang

¹ Pun sinsadi, diḵayu we babaḵnang, dongngonaḵ! Antuḵing ḵayu we umibil atta dumatonge ampaḵaḻamanyu!

² Mawawan da binaḵnangyu ya ḵanon da ḵimi da silupyu.

³ Naḻatiyan da buḻawan ḵan pilaḵyu ḵad sa latida angipanoḵnoḵe misullagi ḵan diḵayu ya isun di apuye soggona long-agyu. Nanonson ḵayu'ḵ binaḵnang si madam-an anungus ni aḻgaw.

⁴ Andongoḻ ḵayu, adiyupun tinangdanan da pinanguyu'tta payawyu. Dongngonyu da lilida! Niduum ḵan Apudyus we maḵabooḻ da ibil da pinanguyu.

⁵ Amod de lam-ay ḵan ganas ni biyagyu sina'd luta. Ḵad isuyun baḵae tummabae madam-an misid-ana.

⁶ Ḵinoddonganyu ḵan gingngatyu da tagu we naun-unane naippun ḵaḻabbongandae sumullagi ḵan diḵayu.

Sa Anus Ya Sa Luwaḻu

⁷ Pun diḵayu we susunudḵu ḵan Kristu, ḵasapuḻane anusanyu da losane ampaḵaḻamanyu inggana'tte umaliyan Apu. Sosomḵonyu ḵad da mammaumae anusanda uuwayon umudanana ta ammuḻada ya anusanda bos uwayon umudanana ta dumaḵoḻ da ampatoge immuḻada inggana'ḵ dumatong an-apitanda.

⁸ Anusanyu bos papigsaon da somsomoḵyu te madam-an umaliyan Apu.

⁹ Susunudḵu ḵan Kristu, adi ḵayu an-asingonot ta adin Apudyus diḵayu ḵuwison te madam-an dumaḵngan ni ḵangatuwane ḵuwis da losane tagu.

¹⁰ Susunudḵu ḵan Kristu, unudonyu da profeta we an-ugud si ngadan Apu. Amod de anusdae nangiyattom atta ampaḵaḻaman.

¹¹ Ḵanan taḵu we pian da tagu we nangiyattom. Dingngoḻyu ḵinaanus Job ya innilayu ambaḻu we panggob Apudyus ḵan siya si anungusna. Te aḵ Apudyus, impailana ḵan siya ummamdane ḵadaguna ya ḵinaanggomna.

¹² Susunudḵu ḵan Kristu, sa ḵapatogan atta losan, adi ḵayu ogon ansapata. Adiyu isapata'd langit baḵon nu ad luta baḵon nu ngaimane sapata. Yaḵon ḵananyu we “On” nu iyunudyu ya “Naid” nu umadiyu ta adi ambanag si anusaan Apudyus ḵan diḵayu.

¹³ Awad ḵamman osa ḵan diḵayu'ḵ ampaḵaḻam? Alluwaḻu oḵyan. Awad ḵamman os allaylayad? Anḵanta oḵyan atta pammadayaw ḵan Apudyus.

¹⁴ Awad ḵamman osa ḵan diḵayu'ḵ masaḵit? Paayagna oḵyan da angipangpangu'tta namati ye magimugimung ta iluwaḻuwanda ya appusanda si lanae usaronda ngadan Apu Jesus.

¹⁵ Ḵad nu alluwaḻudae mipagapu si pammatida ḵan Apu Jesus, ḵumosdoḻ te ḵaanon Apu saḵitna. Ḵad nu naḵabasuḻ, mapakawan.

¹⁶ Pun an-asibabagga ḵayu'tta basuḻyu ya an-asiluwaḻu ḵayu ta maḵaan da saḵityu. Te sa luwaḻun ni naun-unane tagu ampigsa ḵabooḻana ḵan ambanagana.

¹⁷ Somsomḵonyu ḵad aḵ Profeta Elijah we isu taḵu we tagu. Impapatina nalluwaḻu we adi oḵyan umudan, adipun ummudan ad luta'tte tuḻun tawon ya gogwa.

¹⁸ Pun ḵasin ḵad nalluwaḻu ta umudan, tuttuwae ummudan woḵ tummubu da muḻa.

¹⁹ Susunudḵu ḵan Kristu, nu awad osa ḵan diḵayu'ḵ an-awidana ḵatuttuwaan, ḵasapuḻane padasonyu ampauliyon.

²⁰ Sosomḵonyu we nu ipauliyu osae ḵabasbassuḻan, taguwonyu'tte ḵatoy ya mapakawan da adu we basuḻna.