James 4 - Sa Ugud Apudyus

Sa Gapun Ni Susubog

¹ Annaya ud imusoḵ, ngai gapun ni ampapatoyanyu ḵan ansusuboganyu? Daḵampun ḵamman aḵ sa amaamayonyu gumulu si ambaḻu we somsomoḵyu?

² Awad da amaamayonyu aḻane adiḵayupun maḵaaḻa, pun siya gumongatanyu. Pionyu ḵuwaon da ḵuḵuwan da udum yaḵon adiḵayupun maḵaaḻa, pun siya ampapatoyanyu ḵan ansusuboganyu. Naippun ḵan diḵayu da pionyu te adiyupun ḵodawon ḵan Apudyus.

³ Ḵad taḵon ay nu anḵodaw ḵayu, adinapun os itton te lawweng panggobyu we anḵodaw. Te abus gangganason da long-agyu'ḵ ḵodawonyu.

⁴ Diḵayu we adipun mataḻgodan da pammatiyu ḵan Apudyus. Adiyupun ḵamman igammu we nu siya ayatonyu da gangganason da tagu we adipun amati, ḵabusuḻ diḵayu ḵan Apudyus? Pun ngaimane angunud atta ugali ye misullagi'tta pinion Apudyus, ambalinona long-agna'ḵ ḵabusuḻ Apudyus.

⁵ Adiyu oḵyan ḵanane ippun patog ni nigili ye Ugud Apudyus we ḵanana: Angimun aḵ Apudyus ḵad adinapun pione awad ḵapuḻpuḻos ni Ispiritu we imbuunnae iinggaw ḵan ditaḵu.

⁶ Sa ḵatuttuwaan, ummamdan ḵinabaḻun Apudyus ḵan ditaḵu, isuna nibaga si nigili ye Ugudnae ḵanana, “Sullagiyon Apudyus da ngaimane ampasindayaw, yaḵon ipailana ḵinabaḻuna'tta ngaimane napakumbaba.”

⁷ Pun paipangat ḵayu ḵan Apudyus ya sagangonyu'ḵ Satan woḵ umawid.

⁸ Umadani ḵayu ḵan Apudyus woḵ umadani bos ḵan diḵayu. Diḵayu we ḵabasbassuḻan, papoḻḵasonyu da antataguyu ya diḵayu bose anduwaduwa, isisimoḵyu we angunud ḵan Apudyus.

⁹ Andomdom ḵayu ya umibil ḵayu. Da emesyu ambalinda oḵyan aḵ ibil ya da gangganasyu ambalin aḵ dadauy.

¹⁰ Ipakumbabayu da long-agyu si sinagung Apudyus woḵ itaḻayagna diḵayu.

Sa Adiyu An-asiamsewan

¹¹ Susunudḵu ḵan Kristu, adi ḵayu an-asiamsew. Nu amsewonyu asintataguyu baḵon nu ḵuwisonyu dida, amsewonyu ya ḵuwisonyu lintog. Nu ḵuwisonyu, adiyupun ogon tuttuwaon lintog yaḵon nambalin ḵayu'ḵ ḵuwis.

¹² Abus aḵ Apudyus aḵ nangitod atte lintog ḵan siya abus aḵ ḵuwis. Siya abus aḵ ḵallamoge anagu ḵan anadail. Pun ngaiḵa ḵammane anguwis si asintatagum?

Sa Bagbaga Mipanggob Si Soḵaḻ

¹³ Dongngonyu annae ibagaḵ, diḵayu we angibaga ḵanane, “Sinsadi baḵon nu appigat, ambaat ḵani si sadi ye ili ya inggaw ḵani'ḵ sintawon sidi ya allaḵu ḵani ta bumaḵnang ḵani.”

¹⁴ Adiyupun igammu nu ngai inon ni antataguyu appigat! Te sa annae biyag taḵu, mipani'tte nopnope annaḵunaḵ aḵ sin-aḵitan ya naumas.

¹⁵ Pun ḵananyu oḵyane, “Nu siya pion Apu, matagu ḵani ya ḵaḵna ḵan ḵatti da ḵoonni.”

¹⁶ Yaḵon ansoḵaḻ ḵayu ya indaddayaw ḵayu. Losane isḵaḻ da tagu we isun da sana, lawweng.

¹⁷ Pun sa tagu we igammuna ustu we maḵwa yaḵon adinapun ḵoon, maḵabasuḻ.