James 3 - Sa Ugud Apudyus

Sa Tupod Ni Dela

¹ Susunudḵu ḵan Kristu, ambaḻu nu aḵit oḵyan ḵan diḵayu da ambalin aḵ angituttudu si Ugud Apudyus te igammuyu we nadagdagson maḵuwisan taḵu we angituttudu nu da udum.

² Losan ḵan ditaḵu, adu angkamaliyan taḵu. Yaḵon sa tagu we ippun angkamaliyana'tte an-uugudna, naangsan te lamogna tupodon long-agna.

³ Nu patingaḻan taḵu sungad ni ḵabayu ta tumuttuwa ḵan ditaḵu, maḵwae ipaoy taḵu si pion taḵu we angipaoyan.

⁴ Ilanyu ḵad os bapur, taḵon ay nu daḵodaḵoḻ ya isunusunun ni ampigsae bibbid, lamog ni angimanihu ipaoy si piona angipaoyan, gapu'tte banban-oge ḵaga si ubotana.

⁵ Ḵad isuna bos delan ni tagu we taḵon ay nu bamban-oge ḵamangay ni long-ag, lamognae ansoḵasoḵaḻ. Somsomḵon taḵu ḵad apuy, taḵon ay nu paḻatiḵ, dagadagona simbelegan.

⁶ Sa dela taḵu isunan apuye sumgob ya dumadail atta losane nampaliḵwos. Te nu an-ugud taḵu'ḵ lawweng, ipailanae amod de lawwenge awad ḵan ditaḵu, siya gapun ni angwaan taḵu'ḵ lawweng ya ansomsomḵan taḵu'ḵ lawweng ya lumawengan os da adu we tagu. Sa annae lawweng naḻpu ḵan Satan ḵad dadailona losane ḵinatatagu taḵu.

⁷ Lamog da tagu we ampaingsa ḵad paingsaonda da losane kalasin da tanane ayam, da tumayap, da ḵumayam ya da losane matattagu si baybay.

⁸ Yaḵon naippun paat tagu'ḵ maḵatupod atte delana. Isuna ḵodote umtoy. Lawweng ya adipun matupod.

⁹ Siya usaron taḵu we andayaw ḵan Apu taḵu ya Ama taḵu we Apudyus ya siya bos usaron taḵu we an-ugud aḵ lawweng atta asintatagu taḵu we naḵwa'ḵ ḵais-isun Apudyus.

¹⁰ An-isu we sungad maḻpuwan ni ugude anaydayaw ḵan Apudyus ya angamsew os atta asintatagu taḵu. Susunudḵu ḵan Kristu, daḵampun oḵyan aḵ ḵatti.

¹¹ Awad ḵamman bubun aḵ andisan pumusiḵ an-imlong ḵan anggigibuḵe danum?

¹² Susunudḵu ḵan Kristu, amunga ḵamman ḵayu we fig aḵ olives baḵon nu da de grape amungada ḵamman aḵ fig? Adipun os maḵwae sa danum ni baybaye an-aasin maḻpuwan ni mainume danum.

Sa Ḵinalainge Maḻpu Ḵan Apudyus

¹³ Ngai ḵan diḵayu nalaing ya maḵaawat? Nu awad, ḵasapuḻane ipailana ḵinalaingna si ambaḻu we antataguna ya ipakumbabana bos long-agna si angwaana'tta ambaḻu.

¹⁴ Yaḵon nu awad ḵan diḵayu amode apos ya ḵinnot, adiyu isḵaḻ ḵan sullagiyon ḵatuttuwaan.

¹⁵ Sa annae ḵinalaing, daḵampun aḵ naḻpu'd langit. Yaḵon nainlubungan, dinidimunyu ya daḵampun aḵ naispirituwan.

¹⁶ Te sa apos ḵan ḵinnot, dida maḻpuwan ni adimpun da tagu mauḻnusan ya da losane kalasin di ḵinalaweng.

¹⁷ Yaḵon sa ḵinalainge maḻpu'd langit, pasige ambaḻu, allin-awa, an-anggom, adinapun ipatut piona, pasig ḵumadagu, pasig ambaḻu ḵoona, ippun laḵlaḵsigona'tta buḻunna ya adipun ḵapappaila.

¹⁸ Pun sa tagu we allin-awa maḵabuḻbuḻunana'tta asintataguna, palin-awaona bos da udum aḵ amalin-awa'tta asintataguda. Sa ambanagana allin-awa losane mataguwanda si angunudanda'tte naun-unane antatagu.