James 2 - Sa Ugud Apudyus

Sa Adiyu Allaḵsigan Atta Asintataguyu

¹ Susunudḵu ḵan Kristu, adiyu laḵlaḵsigon da tagu nu amati ḵayu ḵan Apu Jesu Kristu we madaydayaw ḵan ḵangatuwane Apu.

² Awatna, nu dumatong da duwae tagu si magimunganyu, sa osa baḵnange nansingsing aḵ buḻawan ya nansilup aḵ ambaḻu, sa osa ḵapuse nansilup atte pallos.

³ Ḵad siya tinungaguyu baḵnang ya ḵananyu we, “Awwaynu ta tumuḵduḵa si annae ambaḻubaḻu we tugaw.” Yaḵon ḵananyu si ḵapus, “Sumisiḵadḵa si andi,” baḵon nu “Tumuḵduḵa'tte pad-ing.”

⁴ Adiyupun ḵamman nilaḵsig da buḻunyu si imbelangyu we nangatu da udum ḵan diḵayu ya nambalin ḵayu'ḵ ḵuwis atta somsomoḵyu?

⁵ Andongoḻ ḵayu ay-ayatoḵe susunud ḵan Kristu. Daḵampun ḵamman ḵan Apudyus namili'tta ḵapus si annae lubung aḵ bumaḵnang si pammati ya gangganasonda da laḵsunda si midog-anda si ampangatan Apudyus we inkarina'tta angay-ayat ḵan siya?

⁶ Yaḵon diḵayu ḵad, ibabbainyu da ḵapus. Daḵampun ḵamman atta babaḵnang da amaḵaḻam ḵan angidaḻum ḵan diḵayu?

⁷ Daḵampun ḵamman aḵ dida da an-ugud atta misullagi si madaydayawe ngadan Jesus we nidog-an taḵu?

⁸ Nu tuttuwaonyu da ḵapatogane Ugud Apudyus we impaigilina si awe ye ḵanana, “Ḵasapuḻane ayatom da asintatagume isun ni an-aayatnu'tte long-agnu.” Nu pasigyu unudon annae ugud, ambaḻu da ḵoonyu.

⁹ Yaḵon nu laḵlaḵsigonyu da tagu we mibatay si ḵasasaadda, naḵabasuḻ ḵayu te nilisalisyu da sadi ye lintog.

¹⁰ Taḵon ay nu inunudyu da udume lintog ya nilisalisyu ossaan, sissiyae nilisalisyu da losane lintog.

¹¹ Te aḵ Apudyus ḵananae nangibilin, “Adiḵa maḵadagdagas,” imbilinna bos ḵanane, “Adiḵa pumatoy.” Pun taḵon ay nu adiḵayupun naḵadagdagas yaḵon pummatoy ḵayu, isunae nilisalisyu da losane lintog.

¹² Pun ummanyu'tta ugudonyu ya da ḵoonyu te aḵ Apudyus ḵuwisona diḵayu si umali ye aḻgaw mibatay atte lintoge amuḵay atta tagu'tta basuḻda.

¹³ Te nu anḵuwis aḵ Apudyus, adinapun ḵadaguwan da adipun ḵumadagu. Yaḵon ḵadaguwana da ḵumadagu ta adida umogyat nu anḵuwis.

Sa Pammati Ḵan Ambaḻu We Gunay

¹⁴ Susunudḵu ḵan Kristu, ngai maganab ni tagu we angibagae awad de pammatina yaḵon adipun mipaila si gunayna? Taguwon ḵamman ni pammatina?

¹⁵ Awatna, nu awad sunud taḵu ḵan Kristu ya angkurang aḵ silup ḵan maḵan,

¹⁶ ya awad angibaga ḵan siya ḵanane, “Inḵan lumin-awa somsomoḵnu, adiḵa maḵumog ya mamassugḵa oḵyan.” Yaḵon adinapun itton da ḵasapuḻana, awad ḵamman anun ni imbagana?

¹⁷ Ḵatti isun ni pammati ye abus, nu adipun mipaila si ambaḻu we gunay, ippun anuna.

¹⁸ Yaḵon ḵanan ni osa, “Awad de pammatim ḵad awad os ambaḻu we gunayḵu.” Annaya isongbatḵu, “Ipailam ḵan saḵon pammatime naippun gunay ḵad ipailaḵ os pammatiḵ mipagapu si ambaḻu we gunayḵu.”

¹⁹ Patiyom ḵammane os-ossaan Apudyus? Sanat ambaḻubaḻu! Yaḵon taḵon ay da aḻan, amatida bos ya amilpilda'tte ogyatda.

²⁰ Siḵae nadongdong-ogane tagu, piome panoḵnoḵane sa pammati ye naippun gunay ippun anuna?

²¹ Daḵampun ḵamman ḵan Apudyus nangwa si naun-unan Abraham we daḵdaḵoḻ taḵu si nangiggaana ḵan Isaac we abengna si altar ta idatunna ḵan Apudyus?

²² Ilam nantoḵom pammatina ḵan gunayna woḵ napanoḵnoḵane gattoḵ pammatina.

²³ Pun nituttuwa nigili ye Ugud Apudyus we ḵanana, “Pinatin Abraham aḵ Apudyus, pun imbelangna'ḵ naun-unan” woḵ nangngadan aḵ buḻbuḻun Apudyus.

²⁴ Pun igammu taḵu we aḵ Apudyus angwa si maun-unan da tagu gapu'tta gunayda, daḵampun atte pammatidae abus.

²⁵ Isun Rahab we puta. Aḵ Apudyus nangwa si naun-unana gapu si ambaḻu we ḵingwana'tta ganaḵ Israel we imbuun Joshua aḵ ummoy nansiput si ilina. Te minangilina dida woḵ impaoyna dida si sabali ye daḻane ummawid.

²⁶ Te igammu taḵu we sa long-age naippun angosna natoy ḵad sa pammati ye naippun gunay, natoy os.