James 1 - Sa Ugud Apudyus

Sa Laplapun Ni Suḻat

¹ Kumusta ḵayu? Saḵon aḵ James we sammilun Apudyus ya aḵ Apu Jesu Kristu. Annaya suḻatḵu'tta Judyu we namati ye naas-asipaḻaḵ atta udume ili.

Sa Padas Ni Pammati

² Susunudḵu ḵan Kristu, ibelangyu we allaylayad ḵayu nu mapadasyu da nansabasabali ye padas atte biyagyu,

³ te igammuyu we nu amballigi pammatiyu we allaḵ-am atta adu we padas, ambanag si pumigsaan ni pammatiyu ta anusanyu we angiyattom atta losan.

⁴ Ḵad ḵasapuḻane pagatupanyu papigsaon pammatiyu inggana si anungus ta maangsan ḵayu ḵan bumaḻubaḻu ugaliyu inggana'ḵ ippun ogon kurangna.

⁵ Nu awad osa ḵan diḵayu'ḵ angkurang atte ḵinalaing, alluwaḻu oḵyan ḵan Apudyus woḵ aaddi ye maatod. Te aḵ Apudyus allaay atta losane tagu ya adinapun dida pabainan nu anḵodawda.

⁶ Yaḵon nu alluwaḻu ḵayu, ḵasapuḻane amati ḵayu ḵan adi ḵayu anduwaduwa te ngaimane anduwaduwa isuna tupiyaḵ atte baybaye ipappaulin ni bibbid.

^7-8 Da ḵassadi ye tagu maoboobos somsomoḵda ya anduwaduwada'tte ngaimane ḵoonda. Pun adida oḵyan namnamaone awad awatonda ḵan Apu.

Sa Ḵapus Ya Sa Baḵnang

⁹ Diḵayu ḵad ose susunud ḵan Kristu we ḵaḵapus, amo allaylayad ḵayu oḵyan si angitaḻayagan Apudyus ḵan diḵayu.

¹⁰ Sa baḵnang, allaylayad oḵyan nu nababa saadna te amungtu we isun di tabbaḵ atte puḻag.

¹¹ Ḵad nu sumellet init, maḻ-uy muḻa ya nayaḵayaḵ tabbaḵna ḵad ippun ogon binaḻuna. Ḵaḵna bos maḵwa'tte baḵnange maḵaḵtooy si angamgamana ḵan analtalliḵunana si binaḵnangna.

Sa Ampaḵaḻaman Ya Sa Masulisugan

¹² Pian tagu we ampaḵaḻame angipapati angunud ḵan Apudyus te nu napanoḵnoḵane ampigsa pammatina, awatona gungunae inkarin Apudyus we sa biyag aḵ inggana'tta angayat ḵan siya.

¹³ Nu masulisug tagu, adina oḵyan ḵanane aḵ Apudyus nanulisug ḵan siya. Te aḵ Apudyus, adipun masulisuge angwa'ḵ lawweng ya amo daḵampun aḵ siya anulisug atta ngaimane tagu.

¹⁴ Yaḵon masulisug sin-ossaossae tagu nu maawis atta amaamayona.

¹⁵ Ḵad nu lumamut ya tumubu sanate amaamayona, siya ibungana basuḻ. Ḵad nu dumaḵodaḵoḻ sanate basuḻ, siya ibungana ḵatoy.

¹⁶ Pun susunudḵu ḵan Kristu we ay-ayatoḵ, adi ḵayu maallelaw.

¹⁷ Aḵ Apudyus ad langit naḻpuwan da losane ambaḻu ḵan gattoḵe atod. Siya bos nangwa'tta losane sumilaw ad langit. Ḵad taḵon ay nu ambaliw ḵatollongan da sana, adipun paat ambaliw aḵ Apudyus.

¹⁸ Mismu we piniona nambalinon ditaḵu'ḵ abengna gapu si ugude ḵatuttuwaan ta ditaḵu ḵapatogan atta losane ḵingwana.

Sa Andongoḻan Ḵan Anuttuwaan Si Ugud Apudyus

¹⁹ Ay-ayatoḵe susunud ḵan Kristu sosomḵonyu annae ibagaḵ, pion taḵu pasig taḵu andongoḻ yaḵon noan taḵu oḵyane an-ugud ya adi allasu sumang-an taḵu.

²⁰ Te sa sangan ni tagu adinapun paat idaḻan ditaḵu si naun-unane biyage pinion Apudyus.

²¹ Pun an-awidanyu da losane ḵababbaine ugaliyu ya da amode ḵoḵoḵḵonyu. Ḵad ampakumbaba ḵayu ya awatonyu Ugude immuḻana'tta somsomoḵyu we maḵwae anagu ḵan diḵayu.

²² Ḵasapuḻane tuttuwaonyu ibagan ni Ugud Apudyus ya adiyu dongngone abus. Te nu abus dongngonyu ya adiyupun ḵoon, allelawonyu da long-agyu.

²³ Te da andongoḻ atte Ugud Apudyus yaḵon adidapun tuttuwaon ḵan igunay, isuda da tagu we alladawan.

²⁴ Ḵad nu nagangpute nalladawan, nan-awid ya daguse naliwatana nu ngai ḵatollongana.

²⁵ Yaḵon sa tagu we singsingtona ustuustu we lintoge amuḵay atta tagu ya pagapagatupana ḵoon, bindisyunan Apudyus atta losane ḵoona. Siya kalasin ni tagu we daḵampun aḵ abuse andongoḻ ya naliwatana dingngoḻna yaḵon ḵoona da dingngoḻna.

²⁶ Nu awad osa'ḵ ḵananae angapudyus yaḵon adinapun tupodon delana, allelawona long-agna ḵad ippun anun ni angapudyusana.

²⁷ Te sa gattoḵ ḵan ippun ḵadellawanae angapudyus si antotollong Apudyus we Ama, bumadang atta ulila ḵan da baḻu atta ampaḵaḻamanda. Ḵad ḵasapuḻane adipun maalisan atta ugalin da tagu we adipun namati.