Hebrews 9 - Sa Ugud Apudyus

Sa Dadaan Ya Sa Baru We Andadayaw

¹ Sa ummunae tuḻag Apudyus, awad da tuttudu mipanggob si ustu we inondae andaydayaw ḵan siya. Ḵad awad os tuldae ḵingwada sina'd lutae andaydayawanda ḵan siya.

² Sa sadi ye tuldae ḵingwada, awad de duwae kuwartu. Sa umunae kuwartu, sadi ngannonda Nasantuwane Kuwartu we inggawan da sasap-aḻan da silaw, sa lamisaan ya da tinapaye midatun ḵan Apudyus.

³ Sa ḵumagwae kuwartu we naboḻdaḵ si kortina, sadi ngannonda Ḵasantuwane Kuwartu we para ḵan Apudyus.

⁴ Da awad si sanae kuwartu, sa buḻawane altar we sosoggoban ni incenso ya sa ḵasun ni tuḻage nadayusan atte buḻawan. Da awad ad daḻom si annae ḵasun sa buḻawane angange inggawan ni manna ya sa summimite suḻḵud Aaron ya da duwae nadabdabbi ye batu we nigiliyan ni tuḻag Apudyus.

⁵ Sa ngatuwon ni sanae ḵasun, awad da anghel we ngannonda Cherubim we angipaila si ḵinadayaw Apudyus. Inalidungan da payaḵda tangob ni ḵasune nawaḻagisan si daḻa si tinawon ta laḵḵobana da basuḻ da tagu. Yaḵon daḵampun aḵ sinsadi angipaḵaawataḵ atta sanae banag.

⁶ Nu nauḻnus da awad atte tulda, inaḻgawe lumnoḵ da papadi si umunae kuwartu ta ḵoonda da biyangda.

⁷ Yaḵon abus ḵangatuwane padi'ḵ maḵaḻnoḵ si uḵuḵ ni ḵumagwae kuwartu ḵad amingsane abus si sintawon lumnoḵ. Adipun os maḵwae lumnoḵ nu ippun daḻa'ḵ idatunna ḵan Apudyus gapu'tte basuḻna ya da basuḻ da tagu we adipun nigagaḻa.

⁸ Ḵad gapu'tte sana, impaigammun ni Ispiritu Santu we adipun maḵwae lumnoḵ tagu si Ḵasantuwane kuwartu we igaw Apudyus, nu sissiyae mausar umunae kuwartun ni tulda.

⁹ Losan atta sana, awad de mipaniyana'tta ḵingwan Kristu ḵan ditaḵu sinsana. Te da atod ya da ayame indatun da papadi, adidapun lamog papoḻḵason somsomoḵ da andaydayaw.

¹⁰ Yaḵon da annae tuttudu abuse mipanggob atta maḵan, mainum ya da kalasin da inon taḵu we amapoḻḵas si long-ag. Losan atta anna ḵasapuḻane mituttuwada inggana'ḵ dumatong timpu we baliwan Apudyus da losan.

Sa Daḻan Kristu

¹¹ Yaḵon ummali'ḵ Kristu we ḵangatuwane padi atte amo nabaḻbaḻu we Baru we Tuḻage inggangputna. Siya ḵad, sa anserbiyanae igaw sa tuttuwae igaw Apudyus ad langite nangatngatu ya simbumaḻu nu sa Ḵasantuwane Kuwartu si tulda si awe te sa anserbiyanae igaw daḵampun aḵ ḵingwan di tagu ya naippun si annae lubung.

¹² Namingsan nillumnoḵ aḵ Kristu si tuttuwae igaw Apudyus ad langit. Ḵad daḵampun aḵ daḻan da kalding ya da ubbun di baḵa ummoyna indatun yaḵon sa mismu we daḻana ta puḵayana ditaḵu si dusan da basuḻ taḵu ya taguwon ditaḵu'ḵ inggana.

¹³ Te da tagu we mibelang aḵ ḵaissaw, ḵasapuḻane mawaḻsiyanda'tte daḻan ni kalding ya sa daḻan ni laḵi ye baḵa ya sa dapuḻ ni masgobe bumalasange baḵa yaḵon da anna anserbidae abus aḵ amapoḻḵas atta long-ag da tagu we nibelang aḵ nambalin ḵaissaw ta maḵwae ḵasinda maḵadaydayaw ḵan Apudyus.

¹⁴ Sindumallu we pummoḻḵas taḵu si daḻan Kristu si nangidatunana si long-agna mipagapu'tte annanayune Ispiritu Santu. Ippun basuḻna ya mipagapu'tte natoyana pummoḻḵas somsomoḵ taḵu'tta ippun anunae ḵoon taḵu ta anserbi taḵu si matattagu we Apudyus.

¹⁵ Pun sadi gapunae aḵ Kristu angiyugud si Baru we Tuḻag Apudyus atta tagu ta da pinilin Apudyus awatonda annanayune tawide inkarina. Gapu'tte natoyana, sinubutna dida ta mapuḵayan da naḵabasuḻ si ummunae tuḻag.

¹⁶ Nu awad inggilin ni osae tagu'ḵ ḵasuḻatan mipanggob atta tawid, naippun maḵaaḻa si tawidna inggana'ḵ mapanoḵnoḵane natoy nangwa si sadi ye ḵasuḻatan.

¹⁷ Te ippun maḵwaan ni ḵasuḻatan nu sissiyae matattagu tagu we nangwa. Awad de maḵwaana nu natoy tagu we nangwa.

¹⁸ Sana gapunae taḵon ay ummunae tuḻag ippun maḵwaana nu ippun daḻa'ḵ amanoḵnoḵ.

¹⁹ Te ginangput ḵad Moses impaigammu da bilin ni Lintog Apudyus atta tagu, nangaḻa'tte daḻan ni ubbun di baḵa ya sa daḻan ni kalding woḵ inḵamosna si danum. Pun nangaḻa'tte pangan ni hyssop woḵ intaḵodna dilaage dutdut ni karnero woḵ niwaḻsiyana iblun ni lintog ya da losane tagu.

²⁰ Pune sadi, ḵanana, “Sa annae daḻa siya amanoḵnoḵ si intuḻag Apudyus ḵan diḵayu we imbilinnae ḵasapuḻane tuttuwaonyu.”

²¹ Pun niwaḻsiyan os Moses si daḻa tulda ya da losane mausar si andaydayawanda.

²² Sa ḵatuttuwaan, ḵanan ni lintoge tigangay ta losane banag ḵasapuḻane papoḻḵason ni daḻa, ḵad nu ippun pumoy-as aḵ daḻa, ippun os mapakawan aḵ basuḻ.

Sa Nangidatunan Kristu Si Long-agna

²³ Ḵad losan atta sanae banag isun di iglatun da awad ad langit, ḵad ḵasapuḻane pumoḻḵasda gapu'tte ḵatti ye datun. Yaḵon da awad ad langit, ḵasapuḻane pumoḻḵasdae nabaḻbaḻu we midatun nu da anna.

²⁴ Te adipun nillumnoḵ aḵ Kristu si Ḵasantuwane Kuwartu we ḵingwan di tagu ḵan abuse ladawan ni tuttuwae igaw Apudyus. Yaḵon siyae mismu nillumnoḵ ad langit ya awad sinsadi ye angitaḵdoḻ ḵan ditaḵu si sinagung Apudyus.

²⁵ Daḵampun aḵ nillumnoḵ ad langit ta iḵasiḵasinna idatun long-agnae isun ni ḵangatuwane padin da Judyu we tinawone lumnoḵ si Ḵasantuwane Kuwartu we umoy angidatun atte daḻan da ayam.

²⁶ Te nu ḵatti ḵingwana, iḵasiḵasinna ampaḵaḻam inggan ni naḵwaan ni lubung. Yaḵon sa anungus ni timpu namingsan ummali'ḵ Kristu si annae lubung ta ḵaanona da basuḻ da tagu si nangidatunana si mismu we long-agna.

²⁷ Niḵoddonge amingsan tagu matoy, magangput ḵad, maḵuwis ḵan Apudyus.

²⁸ Isuna bos ḵan Kristu, namingpingsane indatunna long-agna ta ḵaanona da basuḻ da adu we tagu. Ḵad nu umali ḵasin, daḵampun aḵ gapu'tta basuḻ yaḵon taguwona da anguuway ḵan siya.