Hebrews 8 - Sa Ugud Apudyus

Aḵ Jesus Ḵangatuwane Padi Taḵu

¹ Annaya pionni ye ibaga: Awad de ḵangatuwane padi taḵu we tutuḵdu si madawinan ni tronon Apudyus we ḵangatuwan ad langit ya maḵapangat ḵan siya.

² Ḵad anserbi ye ḵangatuwane padi ad langit si tuttuwae inggawan Apudyus we ḵingwana bose daḵampun si ngannonda Nasantuwane Kuwartu atte tuldae ḵingwan di tagu si awe.

³ Da nadutuḵan aḵ ḵangatuwane padi, dida angidatun atta atod ya da ayame midatun ḵan Apudyus. Gapu ta aḵ Jesu Kristu ḵangatuwane padi taḵu, ḵasapuḻane awad os idatunna ḵan Apudyus.

⁴ Nu awad aḵ Jesus atte annae luta sinsana, adipun maḵwae siya padi te annat da papadi ye angidatun atta atode nibatay atte lintog.

⁵ Sa ḵewaaḻ da papadi ḵais-isu ḵan aniniwan ni awad ad langit si igaw Apudyus. Te annapune ḵoon oḵyan Moses tuldae andaydayawanda, binagbagaan Apudyus woḵ ḵanana, “Ḵasapuḻane ummam unudon da losan sigun si ḵais-isun ni impailaḵ ḵan siḵa'tte inninggawam si beleg.”

⁶ Yaḵon sa ḵewaaḻe naatod ḵan Jesus, nangatngatu nu da ḵewaaḻ da ummunae papadi te siya angiyugud si nabaḻbaḻu we tuḻag Apudyus atta tagu. Nabaḻu Baru we Tuḻag Apudyus nu sa Dadaane Tuḻag te nibatay si nabaḻu we inkarina.

⁷ Te nu ippun angkurangan ni ummunae tuḻag Apudyus, adipun oḵyan masapuḻ ḵumagwae tuḻag.

⁸ Yaḵon igammun Apudyus we awad de nangkurangan da tagu te ḵanan ni nigili si Ugudna, “Ḵanan Apu we dumatong timpu we angwaaḵ aḵ baru we tuḻag atta ganaḵ Israel ya da iJudah.

⁹ Daḵampun aḵ isun ni intuḻagḵu'tta danaḵḵoḻda si timpu we nangitallayaḵ ḵan didae naḻpu'd Egypt. Te adidapun tinuttuwa intuḻagḵu pun nan-awidaḵ dida.

¹⁰ Annaya baru we tuḻagḵu'tta ganaḵ Israel si umali ye aḻgaw, imuḻaḵ lintogḵu'tta somsomoḵda ya igiliḵ atta pusuda. Ḵad saḵon Apudyusda ya dida bos da taguḵ.

¹¹ Ḵad daḵampun aḵ ḵasapuḻane an-asituttududa baḵon nu an-asibagada, ‘Igammuyu'ḵ Apu,’ te igammun da losane tagu saḵon, misaḻad si ḵababaan inggana si ḵangatuwan.

¹² Te pakawanoḵ da basuḻda ya adiḵpun ogon sosomḵon.”

¹³ Sa imbagan Apudyus mipanggob si Baru we Tuḻag, imbelangna ummunae tuḻag aḵ dadaan. Ḵad ngaimane dadaan ya ippun serbina mawawan.