Hebrews 7 - Sa Ugud Apudyus

Sa Ḵinapadin Melchizedek

¹ Aḵ Melchizedek ḵad, siya ari'd Salem si awe ya osa'tta padin ni Ḵangatuwane Apudyus. Sa ummoy Abraham naḵagubatan, illogna da opate ari. Nangulin ḵad, inabot Melchizedek woḵ bindisyunana.

² Pune sadi, innatod Abraham ḵan Melchizedek da ḵasimpuḻun da losane sinamsamda. Sa pion ni ngadane Melchizedek ḵanan, “arin ni naun-unan” ya siya bos ngannonda “ari'd Salem” we sa piona ḵanan “arin ni lin-awa.”

³ Naippun nigili si mipanggob ḵan amana ya aḵ inana ya taḵon ay da danaḵḵoḻna. Ḵad naippun os nigili si niyanaḵana ya sa natoyana. Mipani'ḵ Melchizedek si Abeng Apudyus we sumisissiyae padi'ḵ inggana.

⁴ Ilan taḵu ḵad ḵinangatun Melchizedek taḵon ay aḵ Abraham naḻpuwan da Judyu, innatodna ḵan Melchizedek ḵasimpuḻun da sinamsamda.

⁵ Sa bilin ni lintog mipanggob atte ḵasimpuḻu, abus da ganaḵ Levi we padi'ḵ awad de ḵaḻabbongandae angaḻa'tte ḵasimpuḻu'tta susunuddae iyIsrael taḵon ay nu ganaḵ Abraham dida losan.

⁶ Yaḵon aḵ Melchizedek taḵon ay nu daḵampun aḵ ganaḵ Levi, inawatna ḵasimpuḻu ḵan Abraham ya binindisyunana te siya inkarina.

⁷ Igammu taḵu we nangatngatu ambindisyun nu sa mabindisyunan.

⁸ Da papadi ganaḵ Levi we nangaḻa'tte ḵasimpuḻun ni apit da tagu, tagudae matoy. Yaḵon aḵ Melchizedek we nangawat si ḵasimpuḻun ni apit ḵan Abraham, matattagu te siya imbagan ni Ugud Apudyus.

⁹ Ḵad maḵwae ḵanan taḵu we taḵon ay aḵ Levi we angaḻa'tte ḵasimpuḻu'tta tagu, ittona bos ḵasimpuḻuna gapu ḵan Abraham.

¹⁰ Te daampun miyanaḵ aḵ Levi si nangabotan Melchizedek ḵan Abraham, mibelange awad si long-ag apunae Abraham.

Sa Ḵinapadin Jesu Kristu Ya Aḵ Melchizedek

¹¹ Ḵad igammu taḵu we innatod Apudyus lintog atta ganaḵ Israel we nibatay atte nandutuḵana'tta ganaḵ Levi we papadi. Sa ḵinapadin Levi adinapun lamoge angwa si tagu'ḵ maun-unan, ḵasapuḻane awad osa'ḵ padi ye umali ye isun ni ḵinapadin Melchizedek, we daḵampun aḵ isun ni ḵinapadin Aaron we ganaḵ Levi.

¹² Te nu mapasantan ḵinapadina, ḵasapuḻane mapasantane ustu lintog.

¹³ Aḵ Apu taḵu siya nigili mipanggob si padi ye isun ni ḵinapadin Melchizedek. Yaḵon aḵ Jesus daḵampun aḵ naḻpu'tta ganaḵ Levi nu adi naḻpu'tta ganaḵ da nansabasabali ye abeng Israel ḵad adidapun paat nanserbi ye isun di padi si altar.

¹⁴ Te nalawage naḻpu Apu taḵu'tta ganaḵ Judah ḵad naippun imbagan Moses mipanggob atta ḵinapadin da ganaḵ Judah.

¹⁵ Pun napanoḵnoḵane sa ḵinapadin Levi ya sa lintoge inunudda napasantan te ummali sabali ye padi ye isun Melchizedek.

¹⁶ Nambalin aḵ padi mipagapu si ḵabooḻan ni biyage ippun patinggana, daḵampun aḵ gapu'tte lintoge mipanggob atte ḵapuun.

¹⁷ Te sa nigili ye Ugud Apudyus, ḵanana, “Padiḵa'ḵ ingganae isun ni ḵinapadin Melchizedek.”

¹⁸ Pun niwalin dadaane lintog te anḵuya ya naippun anuna.

¹⁹ Sa sanae lintog Moses ippun ḵabooḻanae ambalinona da tagu'ḵ maun-unan. Pun sinsadi, naatod ḵan ditaḵu nabaḻu we namnamae maḵwae umadaniyan taḵu ḵan Apudyus.

²⁰ Awad os inkarin Apudyus. Ippun ḵatti'ḵ inkarina si nampadi da udum.

²¹ Yaḵon nambalin ḵad aḵ Jesus aḵ padi, inkarin Apudyus ḵan siya ḵanane, “Saḵon Apu, ikariḵe siḵa padi'ḵ inggana. Ḵad ippun paat ambaliwan ni somsomoḵḵu.”

²² Gapu'tte annae inkarina, aḵ Jesus ambaline angitaḵdoḻ atte nabaḻu we tuḻag Apudyus atta tagu nu sa dadaan.

²³ Annaya nisabaliyana si damu, adu da nampasapasani nampadi, yaḵon nampatingga ḵinapadida te nanḵaḵatoyda.

²⁴ Yaḵon aḵ Jesus matattagu'ḵ inggana, ḵad sissiya ḵinapadina'ḵ inggana.

²⁵ Pun sadi gapunae maḵwae taguwona si losane timpu da umadani ḵan Apudyus mipagapu ḵan siya te siya matattagu'ḵ ingganae angiyugud ḵan ditaḵu si sinagung Apudyus.

²⁶ Ḵad aḵ Jesus ḵangatuwane padi taḵu we ustuustu we siya ḵasapuḻan taḵu. Te nasantuwan, ippun ḵadellawana ya ippun basuḻna. Nitotoḵḵon atta ḵabasbassuḻan woḵ nipangatu'd langit.

²⁷ Daḵampun aḵ isun da udume ḵangatuwane papadi ye inaḻgawe andatun ḵan Apudyus, gapu'tte basuḻna ya da basuḻ da tagu. Yaḵon aḵ Jesus, namingpingsane indatunnae mismu long-agna ḵad lamogna'ḵ bayad da basuḻ da tagu'ḵ inggana.

²⁸ Te sa lintog Moses, awad da tagu we madutuḵan aḵ ḵangatuwane padi, taḵon ay nu anḵuyada. Yaḵon mipagapu si inkarin Apudyus we umun-unud nu sa lintog, dinutuḵana Abengna we ḵangatuwane padi ye ippun basuḻna'ḵ inggainggana.