Hebrews 5 - Sa Ugud Apudyus

¹ Te sa ḵangatuwane padi napili'tta asintataguna, ḵad siya nadutuḵan aḵ anserbi ḵan Apudyus gapu ḵan dida. Siya angidatun atta losane nansabasabali ye midatun ya da ayame midatun ḵan Apudyus gapu'tta basuḻda.

² Siya ḵad anna bos anḵuyaana ḵad maanusana da ḵabasbassuḻane adidapun igammu we lawweng da ḵooḵoonda.

³ Gapu'tte ḵinaḵuyana, ḵasapuḻane andatun ḵan Apudyus ḵad daḵampun aḵ abus basuḻ da tagu nu adi gapu bos atte basuḻnae mismu.

⁴ Ḵad naippun tagu'ḵ itanungna dutuḵan long-agna'ḵ madayawana'ḵ ambalin aḵ ḵangatuwane padi. Te abus aḵ Apudyus aḵ maḵwae amili ye isun ni nampipilina ḵan Aaron.

⁵ Isuna bos ḵan Kristu we daḵampun aḵ intaḻayagna long-agna'ḵ ambalin aḵ ḵangatuwane padi. Yaḵon aḵ Apudyus dinutuḵanae mismu ya siya bos nangibaga ḵan siya ḵanane, “Siḵa Abengḵu, inggana sinsadi saḵon Amam.”

⁶ Awad os nigili ye Ugud Apudyus we ḵanana, “Padiḵae ippun anungusnae isun ni ḵinapadin Melchizedek.”

⁷ Sa inninggawan Jesus si annae lubung, indangsoḻna iyyibile nalluwaḻu ḵan nanḵodaw ḵan Apudyus we ḵallamog anagu ḵan siya si ḵatoy. Pun dingngoḻ Apudyus luwaḻuna te tummuttuwa ya impakumbabana long-agna.

⁸ Taḵon ay nu Abeng Apudyus aḵ Jesus, inadaḻnae tummuttuwa ḵan Apudyus mipagapu'tta nampaḵaḻamana.

⁹ Ḵingwana ḵad da losane ḵasapuḻane ḵoona, nambaline siya anagu'tta losane tagu we anuttuwa ḵan siya'tte angittana ḵan dida si biyag aḵ inggana.

¹⁰ Siya dinutuḵan Apudyus aḵ ḵangatuwane padi ye isun ni ḵinapadin Melchizedek.

Sa Bagbaga Atta Nangiwaḻang Atta Pammatida

¹¹ Adu da pioḵe ibaga mipanggob atta annae banag yaḵon ansigab aḵ ipaḵaawatḵu ḵan diḵayu te adiḵayupun maḵaawat.

¹² Nabayage namati ḵayu ya labbongyu oḵyane antuttudu'tta udum yaḵon inggana sinsadi ḵasapuḻanyu bos ḵasin angituttudu ḵan diḵayu si ummunae tuttudu mipanggob si Ugud Apudyus. Isuyu da abenge ḵasapuḻan da gatas ya adidapun lamog ḵanon anḵosdoḻ.

¹³ Te ngaimane sissiyae iḵataguna gatase sa ummunae tuttudu si Ugud Apudyus, adinapun igammu da tuttudu mipanggob si angunudan si naun-unane antatagu.

¹⁴ Yaḵon da namati ye maḵaawat atte naadaḻome tuttudu'tte Ugud Apudyus, isuda da nanaḵmane tagu we ḵanonda anḵosdoḻ. Te lamogda imatunan ambaḻu ḵan lawweng.