Hebrews 4 - Sa Ugud Apudyus

Sa Umillongan Da Tagun Apudyus

¹ Pun gapu ta sissiya sanae inkarin Apudyus we umillongan, ḵasapuḻane umman taḵu ta ippun oḵyan osa ḵan ditaḵu'ḵ adi maḵaḻnoḵ si sanate umillongan.

² Dingngoḻ taḵu Ambaḻu we Damag we niwaḻagawage isun os ni dingngoḻ da danaḵḵoḻ taḵu si awe. Yaḵon ippun anun ni dingngoḻda te adidapun nan-ossaane namati'tta udume nandongoḻ.

³ Ditaḵu we namati maḵwae lumnoḵ maḵaillong ḵan siya te siya imbagan Apudyus. Ḵanana'tta adipun namati, “Summangaaḵ ḵan dida woḵ inkariḵe, ‘Adiḵpun paat dida paḻonḵone maḵaillong ḵan saḵon.’ ” Ḵaḵnat sadi ye imbagana taḵon ay nu ginangputna insagana sadi ye umillongan inggan ni laplapun ni lubung.

⁴ Te awad os nigili ye Ugud Apudyus mipanggob si miḵapitu we aḻgaw. Ḵanana, “Sa miḵapitu we aḻgaw, ummillong aḵ Apudyus si ginangputna da losane ḵingwana.”

⁵ Ḵanana bos ḵasin, “Adiḵpun paat dida paḻonḵone maḵaillong ḵan saḵon.”

⁶ Ḵad da ummunae nangngoḻ atte Ambaḻu we Damag we niwaḻagawag ḵan dida, adidapun midoga maḵaillong te adidapun namati. Yaḵon taḵon ay nu ḵatti, awad da udume maḵwae maḵaḻnoḵ.

⁷ Pun nangiḵoddong aḵ Apudyus aḵ osae aḻgawe lumnoḵan da tagu we maḵaillong ḵan siyae ngadanona, “Sinsadi.” Te sa awe adipun da danaḵḵoḻ taḵu nillumnoḵ. Imbagan os Apudyus ḵan Ari David si nigili ye ugudna ḵanane, “Sinsadi, nu dongngonyu Ugudna, adiyu patungitongon da somsomoḵyu.”

⁸ Te nu impuyut Joshua da danaḵḵoḻ taḵu si sadi ye umillongane inkarin Apudyus, adimpun oḵyan Apudyus imbagae awad de sabali ye umillongan.

⁹ Pun sissiyae awad de maḵaillongan da tagun Apudyus we isun ni ummillongana'tte miḵapitu we aḻgaw.

¹⁰ Te ngaimane maḵaillong ḵan Apudyus, umillongda bos si ḵewaaḻdae isun ni ummillongan Apudyus si ḵewaaḻna.

¹¹ Igga taḵu ḵabooḻan taḵu we maḵaḻnoḵ atte sadi ye umillongan ta ippun osa ḵan ditaḵu'ḵ adi maḵaḻnoḵ gapu si adi taḵu tumuttuwaan.

¹² Te sa Ugud Apudyus matattagu te maḵabooḻe awad da ambanaganda. Natadtadom nu sa ispadae nansupang ngaḻabnae lamogna sillauton da um-um ya da utoḵ te sa Ugud Apudyus lonḵona daḻome ḵamangay da tagu taḵon ay da ḵalidodwada ya da ispirituda ḵad lamogna bos usigon somsomoḵ da tagu ya imatunana da migagaḻae somsomoḵ.

¹³ Naippun mitaḻu ḵan Apudyus te losane ḵingwana ampataḵda si antotollongna. Ḵad songbatan taḵu ḵan siya da losane ḵingwa taḵu.

Aḵ Jesus Ḵangatuwane Padi

¹⁴ Pun gogomgoman taḵu pammati taḵu te aḵ Jesus we Abeng Apudyus siya maḵabooḻe ḵangatuwane padi taḵu we ummoy ḵan Apudyus ad langit.

¹⁵ Te sa ḵangatuwane padi taḵu maawatana da losane anḵuyaan taḵu te pinadasna da nankalakalasi ye sulisuge isu taḵu bos. Yaḵon adipun naḵabasuḻ.

¹⁶ Ḵad antaḻgod taḵu we umadani alluwaḻu ḵan Apudyus we ampangat ad langit gapu'tte ḵinabaḻuna ta awaton taḵu ḵadagu ḵan ḵinabaḻu ḵan siyae bumadang ḵan ditaḵu si timpu we anḵasapuḻ taḵu.