Hebrews 3 - Sa Ugud Apudyus

Aḵ Jesus Nangatngatu Nu Aḵ Moses

¹ Pun susunudḵu ḵan Kristu we da tagun Apudyus we da pinilinae midoga ḵan siya'd langit, sosomḵon taḵu we aḵ Jesus imbuun Apudyus ḵan ditaḵu ya siya ḵangatuwane padi taḵu sigun si pinati taḵu.

² Aḵ Jesus mataḻgodane angwa'tta losane ipaḵwan Apudyus we nandutuḵ ḵan siya. Isuna bos ḵan Moses si awe ye mataḻgodane anserbi'tta losane tagu we namati ḵan Apudyus.

³ Yaḵon nangatngatu'ḵ Jesus nu aḵ Moses. Isun ni nanaḵad atte boḻoye siya madayaw nu sa boḻoye tinaḵadna.

⁴ Te sa boḻoy awad pagay nanaḵad yaḵon aḵ Apudyus nangwa'tta losan.

⁵ Aḵ Moses tuttuwae mataḻgodane sammilu we nanserbi'tta losane tagu we namati ḵan Apudyus. Ḵad taḵdoḻana da banage ipaigammun Apudyus we maḵwa si umali ye aḻgaw.

⁶ Yaḵon aḵ Jesu Kristu, mataḻgodane Abeng we angayyuwan atta tagun Apudyus. Ḵad ditaḵu da tagun Apudyus nu pagatupan taḵu tuḻod taḵu ḵan sissiyae antaḻgod taḵu si namnama taḵu ḵan Kristu.

Da An-awidanda Aḵ Apudyus

⁷ Pun ḵanan ni Ispiritu Santu, “Sinsadi ye aḻgaw, nu dongngonyu Ugudna,

⁸ adiyu patungitongon da somsomoḵyu we isun da danaḵḵoḻyu we summullagida ḵan Apudyus, pinappadasda'ḵ Apudyus si timpu we inninggawanda si bumbummaaw.

⁹ Ḵanan Apudyus, ‘Da danaḵḵoḻyu ḵad, pinappadasda saḵon, taḵon ay nu intotollongda da ḵingwaḵ atte opatpuḻu we tawon.

¹⁰ Pun sadi gapun ni summang-aḵ atta danaḵḵoḻyu woḵ ḵanaḵ, Nan-awidanaḵ ya adiyupun os tinuttuwa da bilinḵu.

¹¹ Pun summangaaḵ ḵan dida woḵ inkariḵe adiḵpun paat dida paḻonḵone maḵaillong ḵan saḵon.’ ”

¹² Susunudḵu ḵan Kristu, ummanyu ta ippun ambalin aḵ lawweng ḵan diḵayu ya adipun namati ta adiyu an-awidan matattagu we Apudyus.

¹³ Yaḵon sa ḵoonyu, inaḻgaw oḵyane an-asisoḻgag ḵayu si awad timpuyu ta ippun maallelaw ḵan diḵayu'ḵ maḵabasuḻ ya tumungitong da somsomoḵyu.

¹⁴ Te buḻun taḵu'ḵ Kristu nu gogomgoman taḵu pammati taḵu si inggan ni namatiyan taḵu inggana si anungus ni timpu.

¹⁵ Ḵaḵna ḵanan ni Ugud Apudyus, “Sinsadi ye aḻgaw, nu dongngonyu Ugudna, adiyu patungitongon da somsomoḵyu we isun da danaḵḵoḻyu we summullagida ḵan Apudyus.”

¹⁶ Ngai da nangngoḻ si imbagan Apudyus yaḵon summullagida? Daḵampun ḵamman atta danaḵḵoḻ taḵu we impangatan Moses we intallayna'd Egypt?

¹⁷ Ngai da summang-an Apudyus si unog di opatpuḻu we tawon? Daḵampun ḵamman atta tagu we naḵabasuḻ ya nanḵaḵatoy si bumbummaaw?

¹⁸ Ḵad ngai da nangikariyan Apudyus we adinapun paat paḻonḵone maḵaillong ḵan siya? Daḵampun ḵamman atta adipun tummuttuwa gapu si adidapun amatiyan ḵan siya?

¹⁹ Ḵad inigammu taḵu we adidapun maḵaḻnoḵ atte lugar we umillongane insaganan Apudyus gapu ta adidapun namati.