Hebrews 2 - Sa Ugud Apudyus

Sa Mataguwan Da Tagu

¹ Pun ḵasapuḻane amo popotpotan taḵu ḵatuttuwaane dingngoḻ taḵu ta adi taḵu iwaḻang pammati taḵu'tte ḵatuttuwaane isun ni bangkae umadayu'tte ustu we ayana.

² Napanoḵnoḵane tuttuwa da bilinnae impaigammun da anghel si awe ya ngaimane adipun tummuttuwa, nilaḵ-amda dusae ustu baḵon nu mibagay.

³ Pun ngai inon taḵu we angiligsi'tte madusaan taḵu nu adi taḵu patgan sanae nakaskasdaawe inonae anagu ḵan ditaḵu? Aḵ Apu Jesus we mismu ummunae nangipaigammu si mipanggob atte mataguwan taḵu. Ḵad da nangngoḻ atta tuttuduna, dida nangipaigammu ḵan ditaḵu'tta dingngoḻdae ḵatuttuwaan.

⁴ Ḵad aḵ Apudyus we mismu pinanoḵnoḵana si tuttudunae tuttuwa gapu si nangittana si sinyal ni ḵabooḻana ya da nansabasabali ye miraculu. Ḵad innatodna'tta namati ḵabooḻane iwaḻas ni Ispiritu Santu sigun atte piniona.

Sa Anagu Ḵan Ditaḵu

⁵ Daḵampun atta anghel pinilin Apudyus aḵ angipangat si baru we antatagun da tagu we imbagabagani yaḵon sa tagu.

⁶ Te awad de impaigilin Apudyus we ḵanana, “Ngai ḵad ain ay da tagu we isisimoḵnu dida? Ngaipam ḵad ain aayyuwanan dida?

⁷ Ḵingwam tagu'ḵ nababa'tte sin-aḵitan nu da anghel pun amo pinadayawam ya pinatgam didae isun ni patog ni ari.

⁸ Ḵad dida ampangatom atta losane ḵingwam si annae lubung.” Sa annae ibagana impaipangat Apudyus atta tagu da losane awad, ḵad sa piona ḵanan ippun adida ipangatan. Yaḵon aditaḵupun yan mailae ipangatan da tagu da losane ḵingwana.

⁹ Inigammu taḵu we nituttuwa anna gapu ḵan Jesus. Te nipababaḵ sin-aḵitan nu da anghel ta mapadasana matoy para ḵan ditaḵu losan mipagapu si ḵinabaḻun Apudyus. Pun sinsadi gapu si nampaḵaḻamana ya natoyana, amo pinadayawam ya pinatgame isun ni patog ni ari.

¹⁰ Ustu'ḵ Apudyus we nangwa ḵan nangayyuwan atta losan ḵad ḵingwana'ḵ Jesus aḵ gattoḵe pangat mipagapu'tte nampaḵaḻamana te pionae adu da ambalin aḵ abengna ta midogada si ḵinangatuna. Te aḵ Jesus angidaḻan ḵan dida si mataguwanda.

¹¹ Aḵ Jesus we namapoḻḵas atta basuḻ taḵu ya ditaḵu we pinapoḻḵasna, ossaan Ama taḵu we aḵ Apudyus. Ḵad sadi gapunae adimpun Jesus ibaine angawag ḵan ditaḵu'ḵ susunudna.

¹² Ḵanan Jesus ḵan Apudyus, “Ipaigammuḵ siḵa'tta susunudḵu, ya idaydayawḵu siḵa si gimung.”

¹³ Ḵanana bos ḵasin, “Aḵ Apudyus abus aḵ antaḻgodaḵ.” Ḵad ḵanana bos, “Annaaḵ ya da abenge innatod Apudyus ḵan saḵon.”

¹⁴ Gapu ta tagu da annae abeng Apudyus we maḵwae matoy, nambalin aḵ Jesus aḵ tagu we isuda. Ḵingwana sana ta mipagapu si matoyana, oḻgona'ḵ Satan we anna ḵabooḻana si ḵatoy

¹⁵ ya ḵaḵna inonae namuḵay atta losane tagu we isudan musassu we nabaḻud si inggan ni nataguwanda gapu si ogyatda si ḵatoy.

¹⁶ Te nalawage daḵampun atta anghel binadangana yaḵon da ganaḵ Abraham.

¹⁷ Pun ḵasapuḻane miyiissu ḵinatataguna ḵan ditaḵu we susunudna. Ḵad sadi inonae ambalin aḵ ḵangatuwane padi ye ḵumadagu ya mataḻgodane anserserbi ḵan Apudyus ya nangidatun si mismu we biyagna si natoyana ta mapakawan da basuḻ da tagu.

¹⁸ Pun sinsadi, gapu ta napadasanae nampaḵaḻam ḵan nasulisug, maḵwae bumadang atta nasulisug ḵan Satan.