Hebrews 12 - Sa Ugud Apudyus

Sa Tuttudun Apudyus

¹ Ditaḵu ḵad, naliḵwos taḵu'tta aduadu we anaḵdoḻ atte pammatida. Pun ḵasapuḻane ḵaanon taḵu da losane maḵatupod atte amatiyan taḵu amod ay basuḻe allaḵod ḵan ditaḵu, we isun di maḵatodtoddaḵe iggana ḵabooḻanae anoddaḵ.

² Isisimoḵ taḵu'ḵ Jesus te siya puun ḵan magangputan ni pammati taḵu. Ḵad adinapun imbaine natoy atte kros para ḵan ditaḵu gapu si gangganase anguuway ḵan siya. Pun sinsadi, awade tutuḵdu si madawinan Apudyus we maḵapangat ḵan siya.

³ Sosomḵon taḵu inon Jesus we nanganuanus si ummamdane ampaḵaḻamane ḵingwan da ḵabasbassuḻan ḵan siya ta adi taḵu madismaya ḵan ḵumuya.

⁴ Te naippun pummoy-as daḻana ḵan diḵayu si nangipapattiyanyu ta adi ḵayu maḵabasuḻ.

⁵ Naliwatanyu ḵamman Ugud Apudyus we anoḻgag ḵan diḵayu we imbelangna'ḵ abengna? Ḵanana, “Abengḵu, andongoḻḵa nu disiplinaon Apu siḵa'tta maḵabasuḻam, adiḵa madismaya nu suppaḵana siḵa.

⁶ Te disiplinaon Apudyus da ay-ayatona ya saplitana da losane ibelangna'ḵ abengna.”

⁷ Anusanyu da ampaḵaḻamanyu si anisiplinaan Apudyus ḵan diḵayu te sadi angigammuwanyu we ibelangna diḵayu'ḵ abengna. Te awad ḵamman abeng aḵ adimpun ni amana disiplinaon?

⁸ Nu adin Apudyus diḵayu disiplinaone isun ni andidisiplinana'tta losane abengna, daḵanḵayupun aḵ tuttuwae abengna yaḵon sabali sin-abeng ḵan diḵayu.

⁹ Isun da aamma taḵu sina'd luta, dinisiplinaan ditaḵu woḵ pinatgan taḵu bos dida. Pun amo dallu oḵyan ose paipangat taḵu ḵan Apudyus we Ama taḵu we awad ad langit ta matagu taḵu'ḵ inggana.

¹⁰ Te da aamma taḵu sina'd luta, dinisiplinaanda ditaḵu si sin-aḵitan para'tte simsimmoḵdae ambaḻu. Yaḵon aḵ Apudyus, disiplinaona ditaḵu para'tta bumaḻuwan taḵu ta bumaḻu da ugali taḵu we miyisu ḵan siya.

¹¹ Sa timpu we disiplinaon Apudyus ditaḵu, aditaḵupun allaylayad te ansigab. Yaḵon nu paḻaḵpuson taḵu da sana, siya ibungana lumin-awa somsomoḵ ḵan naun-unane biyag ḵan ditaḵu we namadas.

Da Bagbaga

¹² Diḵayu we naayong atte ampaḵaḻamane isun di naayong da imayu ya anḵuya da puwogyu, papigsaonyu da somsomoḵyu.

¹³ Pasigyu ayon nanggodonge daḻan ta da ḵummuya da pammatida awad ambaḻu'ḵ ampaniyanda unudon ya adi amo ambalin ḵumuya pammatida yaḵon amo pumigsa ḵasin.

¹⁴ Pangganyu allin-awae maḵabuḻbuḻunanyu'tta losane tagu ya mitotoḵḵon ḵayu'ḵ taguna ta bumaḻu ugaliyu te nu adi tagu ḵaḵnat adinapun ilan aḵ Apu.

¹⁵ Ḵasapuḻane ilanyu ta naippun oḵyan osa ḵan diḵayu'ḵ an-awidana ḵinabaḻun Apudyus gapu'tte angiyagayanae amati ḵan siya. Te ngaimane angwa ḵan diḵayu'tte ḵaḵnat isuna ampaite muḻae tumubu'ḵ madadailan da adu.

¹⁶ Ḵasapuḻane naippun oḵyan osa ḵan diḵayu'ḵ angwa'tte ḵababbain ya miyisu ḵan Esau we adinapun pinatgan da nasantuwane banag woḵ ingnginana ḵalintoganae panguḻu we abeng gapu si sinḵaḵanan.

¹⁷ Inigammuyu we naabus ḵad sadi, piona pagaye tawidon bindisyun amana yaḵon indiyan amana. Te adipun maḵwae pasantan nagagangpute naḵwa, taḵon ay ummibil si piona oḵyan tawidon bindisyun.

¹⁸ Sa ummadaniyanyu ḵan Apudyus, daḵampun aḵ isun ni ummadaniyan da iyIsrael si beleg ad Sinai we inggawan ni gumilgillayabe apuy, giḵbot ḵan bali.

¹⁹ Dingngoḻda gingan ni tangguyub ya sa ḵaog-ogyate gingan Apudyus. Pun nandagdaguda ta guminoḵ oḵyan.

²⁰ Te adidapun lamog ituttuwa biline ḵanana, “Ngaimane gumdos atte annae beleg, tagu man baḵon nu ayam, ḵasapuḻane batubatuwonyu inggana'ḵ matoy.”

²¹ Ḵad gapu ta ampaḵimut innilada taḵon ay aḵ Moses ḵanana, “Amilpilaḵ atte ḵimutḵu.”

²² Yaḵon ummadani ḵani si beleg Zion ya sa siyudad ni matattagu we Apudyus ya sa baru we Jerusalem we awad ad langite madagudagupan da ḵalibulibu we anghel we andayaw ḵan siya.

²³ Umadani ḵani'tta losane namati ḵan Apudyus we mibelang aḵ panguḻu we abengnae andatdatong. Da nigili da ngadanda'd langit. Ḵad umadani ḵani ḵan Apudyus we anguwis atta losane tagu ya umadani ḵani'tta ḵalidodwan da naun-unane natoye da nambalinona'ḵ ippun angkuranganda.

²⁴ Pun ummadani taḵu ḵan Jesus we angiyugud si Baru we Tuḻag ḵan Apudyus ya pummoy-as daḻanae angipaigammu si nabaḻbaḻu we banag nu sa daḻan Abel.

²⁵ Ilanyu ta adiyu idiyan aḵ Apudyus we an-ugud. Te nu adipun niligsi da adipun nandongoḻ atta bagbagana sina'd luta, ngai inon taḵu we angiligsi si dusa nu idiyan taḵu namagbaga ḵan didae naḻpu'd langit?

²⁶ Gumminga ḵad aḵ Apudyus, niyugayug annae luta. Yaḵon sinsadi awad de inkarinae ḵanana, “Iḵasinḵu iyugayuge daḵampun aḵ abus annae luta yaḵon ad langit os.”

²⁷ Sa piona ḵanan, maḵaan da losane ḵingwanae mayugayug ḵad iinggaw da adipun mayugayug.

²⁸ Pun anggappiya taḵu ḵan Apudyus te midoga taḵu si ampangatanae adipun mayugayug. Ḵad dayawon taḵu'tte mas-omana ya patgan taḵu ḵan isipog taḵu.

²⁹ Te aḵ Apudyus we daydayawon taḵu, nu dusaona da tagu isun ni apuye dagadagona losan.