Hebrews 11 - Sa Ugud Apudyus

Sa Pammati

¹ Ngai pammati nu? Sa pammati ḵad aaddi ye mituttuwa da namnamaon taḵu ḵad antaḻgod taḵu we awad da banage aditaḵupun ilan.

² Gapu si pammatin da danaḵḵoḻ taḵu si awe, inawatdae inon-onan Apudyus dida.

³ Gapu si pammati, maawatan taḵu we naḵwa lubung mipagapu si Ugud Apudyus, ta da maila naḻpuda si adipun maila.

⁴ Mipagapu si pammatin Abel, naḵaay-ayu indatunnae datun ḵan Apudyus nu sa datun Cain. Gapu si pammatina, imbelang Apudyus aḵ naun-unan te inawatna indatun Abel. Ḵad taḵon ay nu natoy sissiyae an-ugud gapu si pammatina.

⁵ Mipagapu si pammatin Enoch, adinapun napadasan ḵatoy te innaḻan Apudyus si sissiyae matattagu woḵ adipun naodasan. Ḵanan ni nigili ye Ugud Apudyus, sa daan Apudyus angaḻ-an ḵan Enoch, pinanoḵnoḵanae ḵingwana mas-oman Apudyus.

⁶ Ḵad nu ippun pammatin ni osae tagu, adipun paat mas-om aḵ Apudyus ḵan siya. Te ngaimane umadani ḵan Apudyus, ḵasapuḻane patiyonae gungunaana da angngit ḵan siya.

⁷ Mipagapu si pammatin Noah, nandongoḻ atta imbagan Apudyus mipanggob atta banage maḵwa si umali ye aḻgawe daannapun yan ilan. Tinuttuwana'ḵ Apudyus woḵ nangwa'ḵ daḵoḻe bapur ta matagudae simbaḻyan. Gapu si pammatina, impailanae nankamali da tagu'tte lubunge adidapun amati ḵan Apudyus ya dusaon Apudyus oḵyan dida. Pun imbelang Apudyus aḵ naun-unan mipagapu si pammatina.

⁸ Gapu si pammatin Abraham, tinuttuwana'ḵ Apudyus si nangayagana ḵan siyae umoy si ili ye inkarin Apudyus ḵan siyae tawidona. Tinenana mismu we ilina taḵon ay nu adinapun igammu nu dinu ayana.

⁹ Pun gapu si pammati, inninggaw aḵ Abraham si sadi ye ili ye inkarin Apudyus ḵan siyae isun di mangili. Inninggaw si sigaye tulda, nidoga da Isaac we abengna ya aḵ Jacob we apunae maḵatawid ḵan siya si inkarin Apudyus.

¹⁰ Te ninamnamana siyudade annanayun nisaadanae implanun Apudyus ya tinaḵadna.

¹¹ Gapu si pammatin Sarah, inawatna ḵabooḻane naḵwae naganaḵ taḵon ay nu mummammad-an te imbelangnae mataḻgodan aḵ Apudyus we intuttuwana inkarina.

¹² Taḵon ay nu nibelange natoy aḵ Abraham te naḻaḵay, siya naḻpuwan da amoamode ganaḵe isuda ḵaadun da bituwon ad langit ya da gallis atte taḻantag ni baybaye adipun maiyap.

¹³ Namati losan da sanae tagu ḵan Apudyus inggana'ḵ natoyda. Ḵad taḵon ay nu adidapun inawat da inkarin Apudyus si matattaguwanda, isun di oottapondae abus nu ngai maatod ḵan dida si umali ye aḻgaw taḵon ay nu manunnuwan mituttuwaanda. Binigbigdae mangilidae abuse naippun ustu'ḵ ilida sina'd luta.

¹⁴ Da tagu we angugud atte ḵaḵna, nalawage angngitda'ḵ mismu we ilida.

¹⁵ Nu siya insisimoḵda ili ye tinenanda, nawayada oḵyane nipauli.

¹⁶ Yaḵon siya amaamayonda nabaḻu we ili ye siya'd langit. Pun sadi gapunae adipun mabain aḵ Apudyus si awaganda'ḵ Apudyusda te insaganaana dida'ḵ siyudad ad langit.

¹⁷ Gapu'tte pammatin Abraham, indatunna'ḵ Isaac we abengna si namappadasan Apudyus ḵan siya. Inawatna inkarin Apudyus woḵ naḵasaganae angidatun si ossaane abengna,

¹⁸ taḵon ay nu imbagan Apudyus ḵan siya ḵanane, “Da abeng Isaac mibelang aḵ ganaḵnu.”

¹⁹ Te inigammun Abraham we lamog Apudyus taguwon da matoy. Pun tuttuwae isun di natoy aḵ Isaac te gongaton oḵyan Abraham yaḵon inggimaun Apudyus.

²⁰ Gapu'tte pammatin Isaac, imbagana ḵan da Jacob ḵan Esau we bindisyunan Apudyus dida si umali ye aḻgaw.

²¹ Gapu'tte pammatin Jacob, binindisyunana da abeng Joseph atte daanna matoyan. Pune sadi nanumuḵ aḵ Jacob atte suḻḵudna woḵ nandayaw ḵan Apudyus.

²² Gapu'tte pammatin Joseph si daanna matoyan, imbagana mipanggob si ayonan da ganaḵ Israel we maḻpu'd Egypt. Ḵad imbilinna bos ḵoonda mipanggob si tung-aḻna.

²³ Mipagapu'tte pammatin da sin-abeng ḵan Moses, adidapun iyyogyat bilin ni ari. Pun intaḻuda abeng aḵ tuḻun buḻan inggan ni niyanaḵana gapu ta inniladae ambaḻu sanae abeng.

²⁴ Gapu'tte pammatin Moses si dummaḵoḻ, adinapun pione mibelang aḵ abeng ni bubai ye abeng Pharaoh.

²⁵ Siya piona midoga ampaḵaḻam atta tagun Apudyus nu sa maḵagangganas si sin-aḵitane gangganase maḵabasuḻan.

²⁶ Imbelangnae napatpatog aḵ adayu ampaḵaḻam gapu ḵan Kristu nu sa losane ḵinabaḵnang ad Egypt te siya sosomḵona gunguna si umali ye aḻgaw.

²⁷ Gapu si pammati, tinenan Moses ad Egypt we adinapun iyyogyat sangan ni ari. Inanusanae nampaḵaḻam te isun di innilana'ḵ Apudyus we adipun maila.

²⁸ Gapu'tte pammatina, insaḻadna Gayagayae ngannonda Nallausan. Pun binilinna da buḻunnae Judyu we waḻsiyanda si daḻan ni karnero da ngatun da onob da boḻoyda ta lumaus ḵad anghel ni ḵatoy adinapun gongaton da panguḻu we abenge laḻaḵi.

²⁹ Gapu'tte pammatin da iyIsrael, dinoḻmangda Dilaage Baybaye isudan nanaddaḻan atte ammamagae luta. Yaḵon pinadas ḵad da iyEgypt we dummoḻmang, naaminda naumbuḻ.

³⁰ Gapu bos atte pammati, niḵuḻ-ub ḵabiti si ili'd Jericho si pitun aḻgawe niliḵwos da ganaḵ Israel.

³¹ Gapu'tte pammatin Rahab, minangilina da Iyisrael we ummoy nansiput atte sadi ye ilina. Pun adipun nidoga nagongat aḵ Rahab we puta atta ḵailiyanae adipun tummuttuwa gapu si adidapun namatiyan ḵan Apudyus.

³² Adu oḵyan da ibagaḵ yaḵon umanay sadi. Te kurang timpuḵe angug-uggud atte mipanggob ḵan da Gideon, Barak, Samson, Jephthah, Ari David, Samuel ya da profetan Apudyus.

³³ Mipagapu si pammatida, illogda da ḵagubatdae sabali ye ili, ustu inondae nampangat ya inawatda inkarin Apudyus, pinaginoḵda da lion ta adida ḵotban dida.

³⁴ Adidapun nasgob si intop-aḻda dida si gumilgillayabe apuy, niligsi da udum atte ispadae angongatda oḵyan ḵan dida ya da udum anḵuyada yaḵon gapu'tte pammatida pinapigsan Apudyus dida. Da udum ḵad, nambalindae ampigsa'tte gubat woḵ illogda da suḻdadun da udume ili.

³⁵ Gapu'tte pammatin da udume bubai, inawatda da ummuli ye ḵabagiyandae nanḵaḵatoy. Da udum, adidapun pione mapuḵayan atte ampaḵaḻamanda. Minangnuda nampaḵaḻamda inggana'ḵ natoyda ta umulida si nabaḻbaḻu we biyag.

³⁶ Da udum, naam-amsewda ya naap-aplitda, naḵawadanda ya nibaḻudda.

³⁷ Nabatubatu da udum inggana'ḵ natoyda, nalagadi da udume nanḵagwada. Natoy da udum si ispada. Nansilupda'tta ḵublit da karnero ḵan kalding. Ḵapusda, nampaḵapaḵaḻamda ya naam-amesda.

³⁸ Nalliḵliḵwosda si bumbummaaw ya da bebbeleg ya da lilliyang ya da abut. Ḵad da tagu si annae lubung ippun labbongdae mibuḻun ḵan dida.

³⁹ Losan atta sanae tagu, gapu'tte pammatida ambaḻu ḵaugudanda. Yaḵon adidapun inawat inkarin Apudyus.

⁴⁰ Te awad de nabaḻu we planun Apudyus para ḵan ditaḵu losan. Sa planuna, buḻun taḵu didae angawat si inkarina ta ambalinona dida'ḵ ippun angkuranganda.