Hebrews 10 - Sa Ugud Apudyus

Sa Nangidatunan Kristu We Mismu Si Long-agna

¹ Sa Lintog ḵad Moses aniniwan da ambaḻu we banage dumatong, daḵampun aḵ tuttuwae ḵais-isun da annae ḵatuttuwaan. Pun taḵon ay tinawone pagapagatupan da andaydayaw ḵan Apudyus we angidatun si imbilin ni lintog, adipun maḵwae ambalin da tagu'ḵ ippun angkuranganda mipagapu'tta datun.

² Te nu tuttuwae namingpingsane pummoḻḵas da basuḻ da andaydayaw ḵan Apudyus, ippun oḵyan giḵnada'ḵ naḵabasuḻda ya agayda oḵyane andatun.

³ Yaḵon sa ḵatuttuwaan, da indatunda'tte tinawon nangipaspasmoḵ atta naḵabasuḻanda.

⁴ Te adimpun ni daḻan ni laḵi ye baḵa ḵan kalding lamog ḵaanon basuḻ.

⁵ Annaya gapuna, anna ḵade madam-an umaliyan Kristu si annae lubung, ḵanana ḵan Apudyus, “Daḵampun aḵ siya piom da midatun ya da datun, yaḵon insaganam long-age para ḵan saḵon.

⁶ Adiḵapun mas-om atta soggondae midatun, ya da udume midatun aḵ para'tta basuḻ.

⁷ Pun ḵanaḵ, ‘Annaaḵ Apudyus we angwa'tta ngaimane piniom, we nigili si iblu mipanggob ḵan saḵon.’ ”

⁸ Ummunae ḵanana, “Adinapun pion ya mas-oman da nankalakalasi ye datune nidatun ḵan siya.” Imbagana sana taḵon ay nu losan da annae datun nibatay si imbilin ni Lintog.

⁹ Pun ḵanana, “Annaaḵ, Apudyus, ummaliyaḵ ta ḵooḵ da piniom.” Pun iwwalin Apudyus ummunae datun woḵ impasanina nidatunan Kristu.

¹⁰ Pun gapu ta nituttuwa pinion Apudyus, pummoḻḵas taḵu'tta basuḻ taḵu mipagapu si namingpingsane nangidatunan Jesu Kristu si long-agna.

¹¹ Inaḻgawe osa'tta papadi intaḵdogna ḵingwa ḵewaaḻna ḵad iḵasiḵasinna idatun da isunae datun. Yaḵon adipun paat da datun maḵaḵaan atta basuḻ da tagu.

¹² Yaḵon aḵ Kristu, namingpingsane indatunna long-agna para'tta basuḻ taḵu'ḵ inggana. Nagangput ḵad, tummuḵdu si madawinan Apudyus.

¹³ Pun an-uuwway inggana'ḵ oḻgon Apudyus da ḵabusuḻna.

¹⁴ Ḵad gapu'tte namingsane nangidatunan Apu Jesus si long-agna, nambalinona'ḵ maun-unan aḵ inggana da tagun Apudyus we pinapoḻḵasna.

¹⁵ Ḵad sa Ispiritu Santu tinaḵdoḻana ditaḵu. Ummunae ḵanana,

¹⁶ “Annaya tuḻage ḵooḵ ḵan dida'tte umali ye aḻgaw. Imuḻaḵ da lintogḵu'tta somsomoḵda ya igiliḵ atta pusuda.

¹⁷ Ḵad adiḵpun ogon sosomḵon da basuḻda ya da ḵingwada.”

¹⁸ Gapu ta pinakawan Apudyus da basuḻ da tagu, adipun ḵasapuḻane awad os midatun para'tta basuḻ.

Sa Antaḻgodan Taḵu We Umadani Ḵan Apudyus

¹⁹ Pun susunudḵu ḵan Kristu, napuḵayan taḵu we lumnoḵ si tuttuwae igaw Apudyus we isun ni Ḵasantuwane Kuwartu atte tulda si awe te napakawan da basuḻ taḵu mipagapu ḵan Jesu Kristu we natoy para ḵan ditaḵu si pummoy-asan ni daḻana.

²⁰ Inggan ni nangidatunana si long-agna, imbuḵatna ḵan ditaḵu baru we daḻane lumnoḵ si igaw Apudyus we angidatong ḵan ditaḵu si biyag aḵ inggana. Sa natoyana isun ni napissayan ni kortinae nangibuḵat si daḻane lumnoḵ si Ḵasantuwane Kuwartu.

²¹ Awad de ḵangatuwane padi taḵu we angayyuwan ḵan ditaḵu we tagun Apudyus.

²² Umadani taḵu ḵan Apudyus we sipupusu ya antaḻgod pammati taḵu ḵan siya, ḵad pummoḻḵas da somsomoḵ taḵu'tta lawweng te isun di nawaḻsiyan taḵu si daḻan Kristu ya nadaḻusan da long-ag taḵu si an-imlonge danum.

²³ Popotpotan taḵu namnama taḵu we adi taḵu anduwaduwa te mataḻgodan aḵ Apudyus we angituttuwa'tta inkarina.

²⁴ Sosomḵon taḵu inon taḵu we amapigsa si an-aayat taḵu ḵan ḵoon taḵu da ambaḻu.

²⁵ Adi taḵu oḵyan iwaḻange magimugimung atta buḻun taḵu we namati ye isun ni ḵoḵoḵḵon da udum yaḵon sa ḵoon taḵu amo an-asisoḻgag taḵu, dallu gay sinsadi ye madam-an mipauliyan Apu Jesus.

²⁶ Te nu gagaḻ-on taḵu we bumasuḻ si nagangpute inigammu taḵu mipanggob si ḵatuttuwaan, naippun ogon midatun aḵ amapoḻḵas atta basuḻ.

²⁷ Naippun udum aḵ uuwayon taḵu nu adi sa ampaḵimute anguwisan Apudyus ya sa gumilagilabe apuye angamin atta losane ḵabusuḻ Apudyus.

²⁸ Ngaimane adi tumuttuwa si lintog Moses, aaddi ye magongate ippun ḵadagu nu awad duwa baḵon nu tuḻu we tagu'ḵ anaḵdoḻ.

²⁹ Maguḻa magay madusaan ni tagu we angam-amsew si Abeng Apudyus ya ibelangnae naippun patog ni daḻae angipanoḵnoḵ si tuḻag Apudyus we siya amapoḻḵas atta basuḻ ḵan an-ugud aḵ lawweng atte Ispiritu Santu we siya angipail-an Apudyus atte ḵinabaḻuna.

³⁰ Susunudḵu we ay-ayatoḵ, nu awad angwa'ḵ lawweng ḵan diḵayu, adi ḵayu bumaḻos yaḵon itaḻgodyu ḵan Apudyus ta siya asi ḵigade angibaḻos. Te ḵanan ni nigili ye Ugud Apudyus, “Saḵone Apudyus ḵambiyang si baḻos te dusaoḵ da maḵabasuḻ.” Siya bos nangibaga ḵanane, “Saḵon aḵ Apu we anguwis atta taguḵ.”

³¹ Ampaḵimut madusa'tte matattagu we Apudyus.

³² Yaḵon iḵagasmoḵyu ḵasasaadyu'tte ḵesane timpu si nasilawan da somsomoḵyu'tte ḵatuttuwaan mipanggob ḵan Kristu, inaattomanyu ummamdane nampaḵaḻamanyu yaḵon adiyupun iyyunude paḵḵog ḵayu.

³³ Udumna ḵad insultuwonda ḵan ampaḵaḻamonda diḵayu'tte sinagung da adu we tagu. Sillaḻabi ḵad os, midoga ḵayu ampaḵaḻam atta buḻunyu.

³⁴ Te ḵinadaguwanyu da buḻunyu we nibabaḻud. Ḵad taḵon ay nu sinamsamda da ḵuḵuwayu, inan-anusanyu ginangganas te mismu we igammuyu we awad de nabaḻbaḻu ya annanayune ḵuḵuwayu'd langit.

³⁵ Pun adiyu taḻaḵon namnamayu ya taḻgodyu te idatongna daḵoḻe gunguna.

³⁶ Ḵasapuḻane anusanyu we angwa'tta pinion Apudyus, ḵad awatonyu inkarina.

³⁷ Te ḵanan ni Ugud Apudyus, “Sin-aḵitane abus ya sa awade umali, dumatonge adipun mitantan.

³⁸ Sa taguḵe naun-unan, matagu mipagapu'tte pammati, yaḵon nu an-awidana saḵon, adiyaḵpun mas-om ḵan siya.”

³⁹ Yaḵon adi taḵu miyisu'tta nangiwaḻang atta pammatida ya nadusada ḵan Apudyus aḵ inggana. Yaḵon ditaḵu da namati ya matagu'ḵ inggana.