Hebrews 1 - Sa Ugud Apudyus

Sa Abeng Apudyus Nangipaigammu Si Ugud Apudyus

¹ Sa awe adu we timpu ḵan nansabasabali inon Apudyus we nan-ugud atta danaḵḵoḻ taḵu mipagapu'tta profetanae an-uuggudona.

² Yaḵon sa sanae anungus ni aḻgaw, nan-ugud aḵ Apudyus ḵan ditaḵu mipagapu si Abengna. Siya dinutuḵan Apudyus aḵ anawid atta losane anna si lubung ya mipagapu si Abengna ḵingwana lubung.

³ Sa Abeng angil-an taḵu si ḵadayawan Apudyus ya miyiissu ḵinaapudyusna. Ḵad siya amagatup atta losane mipagapu si ḵabooḻan ni ugudna. Ginangputna ḵad pinapoḻḵas da tagu'tta basuḻda, nipauli'd langit woḵ tutuḵdu si madawinan Apudyus we ḵangatuwan ya maḵapangat ḵan siya.

Sa Abeng Apudyus Nangatngatu Nu Da Anghel

⁴ Nu tumuḵdu Abeng Apudyus atte madawinannae ampangat, sana amanoḵnoḵe nangatngatu nu da anghel ya madaydayaw ngadanna nu dida.

⁵ Te naippun paat nangibag-an Apudyus atta ngaimane anghelna'tte isun ni imbagana'tte Abengna we ḵanana, “Siḵa we Abengḵu, inggana sinsadi saḵon Amam.” Naippun os anghel aḵ nangibag-an Apudyus we ḵanana, “Saḵon Amam ya siḵa Abengḵu.”

⁶ Anna ḵade madam-an angibuunan Apudyus si annae lubung atte Abengna we anna saadna'tta losane isun di panguḻu, ḵanana, “Ḵasapuḻane losan atta anghel Apudyus analluḵudae andayaw ḵan siya.”

⁷ Annaya ḵanan Apudyus si mipanggob atta anghel, “Da anghel we bubuḵ-unoḵ maḵwae ambalinoḵ dida'ḵ bibbid ya gumilagilabe apuy.”

⁸ Yaḵon ḵanana si mipanggob si Abengna, “Siḵa Apudyus, ampangatḵa'ḵ inggana! Ḵad naun-unan inome ampangat.

⁹ Allaylayadḵa nu ilam da tagu we ḵoonda da naun-unan ya andadauyḵa nu ilam didae angwa'ḵ lawweng. Pun sa Apudyusnu, dinutuḵana siḵa'ḵ maittan aḵ dayaw ḵan amode layad nu da buḻunnu.”

¹⁰ Ḵanana bos, “Inggan ni laplapuna, siḵa Apu we nangwa si annae lubung ya da losane awad ad langit.

¹¹ Ḵad taḵon ay nu mawawan da losane ḵingwam, iinggawḵa'ḵ inggainggana. Yaḵon da ḵingwam madinosdae isun di silup.

¹² Tipliyom didae isun di langgoyode silup ḵad pasantam dida. Yaḵon ḵan siḵa, naippun paat ambalbaliwam, ya sa mataguwam ippun ampatinggaana.”

¹³ Ḵad naippun nangibag-an Apudyus atta anghelna'tte isun ni annae imbagana'tte Abengna we ḵanana, “Tumuḵduḵa'tte madawinanḵu we ampangat inggana'ḵ oḻgoḵ da ḵabusuḻnu.”

¹⁴ Ngai da anghel nu? Dida da Ispiritu we anserbi ḵan Apudyus ḵad imbuunna dida'ḵ bumadang atta tagu we umawat si mataguwan.