Galatians 6 - Sa Ugud Apudyus

Sa An-asibadanganyu

¹ Susunudḵu ḵan Kristu, nu awad maigammu'ḵ buḻunyu'ḵ naḵabasuḻ, ilanyu ude idaḻan ni Ispiritu Santu ta badanganyu ya ampauliyonyu ta ḵoona da ustu we banag. Ambaḻuwonyu we bumadang ḵan siya ya ummanyu ta adi ḵayu masulisug os aḵ bumasuḻ.

² An-asibadang ḵayu nu awad andagson aḵ problemayu te nu ḵatti ḵoonyu, tinuttuwayu lintog Kristu.

³ Nu awad angibelang aḵ awad de ḵabooḻana baḵon nu nangatu ḵasasaadna yaḵon daḵampun aḵ tuttuwa, allelawonae mismu long-agna.

⁴ Pun ḵasapuḻane sa sin-ossaossa usigona nu ustu pagay da ḵoona. Te nu ustu, maḵwae isḵaḻna long-agnae mismu we adinapun iyis-isu'tta ḵoon da buḻunna.

⁵ Te sa sin-ossaossa, ḵasapuḻane ḵoona biyangna.

⁶ Sa matuttuduwan atte Ugud Apudyus, ḵasapuḻan oḵyane ibillayana antuttudu ḵan siya'tta losane ambaḻu we awad ḵan siya.

⁷ Adiyu allelawon da long-agyu te aḵ Apudyus adipun maḵwae maang-angyag. Nu ngai imuḻan ni tagu, siya bos apitona.

⁸ Inigammuyu we ngaimane imuḻayu, sanat apitonyu. Pun sa tagu we siya imuḻamuḻana unudon da pipion ni long-agna, apitona madadailana'ḵ ingganae maḻpu'tte pipion ni long-agna. Yaḵon sa angimuḻamuḻa si pinion ni Ispiritu Santu, apitona biyag aḵ ingganae itton ni Ispiritu Santu.

⁹ Pun siya gapunae aditaḵu oḵyan mappoge angwa'tta ambaḻu te dumatong ustu we timpu we angittan Apudyus ḵan ditaḵu'tta gunguna nu adi taḵu mappoge anguuway.

¹⁰ Pun nu mawayaan taḵu pagatupan taḵu we angwa si ambaḻu'tta losane tagu, amod ay da susunud taḵu we namati.

Sa Anungus Ni Annae Suḻat

¹¹ Saḵone mismu nangigili si annae anungus ni suḻat. Ilanyu ḵadanaḵḵoḻ ni giliḵ!

¹² Da angipatute ampasogyat ḵayu, dida da maḻyad angipaila si ḵinabaḻuda'tte antotollong da tagu. Ipatutda sadi te adidapun pione ampaḵaḻamda. Te igammudae nu ituttududae umanay natoyan Kristu'tte kros, ampaḵaḻamon da buḻunda dida.

¹³ Te taḵon ay didae nasogyatan, adidapun tuttuwaon da lintog Moses yaḵon piondae ampasogyat ḵayu ta awad isḵaḻdae nampasogyat ḵayu'tte gapu ḵan dida.

¹⁴ Yaḵon ḵan saḵon, ippun udum aḵ isḵaḻḵu, abus natoyan Jesu Kristu we Apu taḵu'tte kros te gapu si sanate natoyana, da patpatgon da tagu we adipun amati ippun patogda ḵan saḵon ya ippun os patogḵu ḵan dida.

¹⁵ Ippun nansabaliyan ni nampasogyat baḵon nu adipun, sa ampatog ḵad sa ambalin taḵu'ḵ baru we tagu.

¹⁶ Awad oḵyan atta losane angunud si annae imbagaḵ lin-awa ḵan ḵadagu ya awad os atta losane tuttuwae tagun Apudyus.

¹⁷ Inggana sinsadi, ippun oḵyan pos ogon amaḵaḻam ḵan saḵon gapu'tte nangituttuduwaḵ si mipanggob atte kros te sa long-agḵu we napillapillatan, sana angipailae tuttuwae nanserbiyaḵ ḵan Jesus.

¹⁸ Susunudḵu ḵan Kristu, awad oḵyan ḵan diḵayu ḵinabaḻu we maḻpu ḵan Apu taḵu we Jesu Kristu. Amen.