Galatians 1 - Sa Ugud Apudyus

Sa Laplapun Ni Suḻat

¹ Saḵon aḵ Paul we nadutuḵan aḵ apostol we daḵampun aḵ dinutuḵanaḵ si tagu ya daḵampun aḵ naḻpu si tagu yaḵon aḵ Jesu Kristu ya aḵ Apudyus we Ama we nanagu ḵan siya.

² Annaya suḻatḵu ḵan diḵayu'tta gimung da namati'tta ili'd Galatia. Da losane susunudḵu ḵan Kristu sinae namati, pakumustaonda bos diḵayu.

³ Awad oḵyan ḵan diḵayu ḵinabaḻu ḵan lin-awae maḻpu ḵan Apudyus we Ama taḵu ya aḵ Jesu Kristu we Apu taḵu

⁴ we nangitod si long-agna'tte natoyana ta mapakawan da basuḻ taḵu. Ḵingwana sadi ye mibatay si pinion Apudyus we Ama taḵu ta matagu taḵu ḵan mapuḵayan taḵu ta adi taḵu igunay ya adi taḵu ansomsomoḵ atta isun da ḵoḵoḵḵon da tagu si sanae timpu.

⁵ Madayaw aḵ Apudyus aḵ inggainggana. Amen.

Sa Ossaane Ambaḻu We Damag

⁶ Nataagaḵ si daguse nan-awidanyu'ḵ Apudyus we namili ḵan diḵayu mipagapu si ḵinabaḻun Kristu ḵad siya unudonyu sabali ye tuttudu we ḵanan da udume ambaḻu we damag.

⁷ Sa ḵatuttuwaan, ippun udum aḵ Ambaḻu we Damag yaḵon ibagaḵ anna te awad da udume angulu'tta somsomoḵyu ya padpadasonda baliḵtadon Ambaḻu we Damag mipanggob ḵan Kristu.

⁸ Yaḵon taḵon ay nu diḵani ye mismu baḵon nu sa anghel we maḻpu'd langit angiwaḻagawag si Ambaḻu we Damag we misullagi'tte iwwaḻagawagni si awe, madusa'ḵ inggana.

⁹ Sana imbagani ḵan diḵayu si awe yaḵon iḵasinḵu bos ibaga, ngaimane angiwaḻagawag si nisabali si Ambaḻu we Damag we inawatyu si damu, madusa'ḵ inggana.

¹⁰ Gamgamaḵ ḵad aine dayawonaḵ atta tagu si ḵaḵnae an-uugudḵu? Daḵampun! Sa madayawan Apudyus singsingtoḵ. Nu siya panggobḵu awisoḵ da tagu, adipun maḵwae mibelangaḵ aḵ anserbi ḵan Kristu.

Sa Ḵinaapostol Paul

¹¹ Susunudḵu ḵan Kristu, pioḵe amo maawatanyu Ambaḻu we Damag we iwwaḻagawagḵu ḵan diḵayu, daḵampun aḵ naḻpu si somsomoḵ di tagu.

¹² Te daḵampun aḵ tagu nangigammuwaḵ si annae Ambaḻu we Damag. Naippun os udum aḵ nangituttudu yaḵon aḵ Jesu Kristu we mismu nangipaigammu ḵan saḵon.

¹³ Dingngoḻyu nantataguḵ si nangunudaḵ atta ugalin da Judyu nu ngai inoḵe namaḵaḻam atta magimugimunge namati ḵan Apudyus ḵad inniggaḵ ḵabooḻaḵe nanadail ḵan dida.

¹⁴ Mipanggob ḵad os atte pammatini ye Judyu, intutuḻ-ayḵu'ḵ adayu'tta dogwasḵu te saḵon ḵapangogane nangunud ya nangitataḵdoḻ atta ugali ye tinawidni'tta daḵdaḵoḻni.

¹⁵ Yaḵon aḵ Apudyus, sabali panggobna ḵan saḵon te ingallapuna dinutuḵan saḵon atte daanḵu miyanaḵan ḵad gapu si ḵinabaḻuna, pinilina saḵon aḵ anserbi ḵan siya.

¹⁶ Pun impailana ḵan saḵon abengna ta iwaḻagawagḵu mipanggob ḵan siya'tta Gentil. Naippun tagu'ḵ ummoyḵu nampatuttuduwan.

¹⁷ Adiyaḵpun os ummoy ad Jerusalem naḵaug-uggud atta apostol we ummun-una nu saḵon yaḵon ummoyaḵ ad Arabia. Unipun nampauliyaḵ ḵasin ad Damascus.

¹⁸ Naḻaḵpus ḵad de tuḻun tawon, ummoyḵu binisita'ḵ Cephas ad Jerusalem woḵ inninggawaḵ ḵan siya'ḵ nasawaḻan aḵ limae aḻgaw.

¹⁹ Yaḵon da innilaḵe apostol, abus aḵ Peter ya aḵ James we sunud Apu.

²⁰ Igammun Apudyus we daḵampun aḵ tuli da sanae insuḻatḵu ḵan diḵayu.

²¹ Naabus ḵad de sadi, ummoyaḵ atta ili'd Syria ya ad Cilicia.

²² Sa sadi ye timpu, ippun yan nangigammu ḵan saḵon atta gimung da namati ḵan Kristu atte probinsiya'd Judea.

²³ Siya abus aḵ dingngoḻda de sa namaḵaḻamaḵ ḵan dida si awe ta naippun ogon ossaan aḵ amati ḵan Jesu Kristu, siya sanae iwaḻagawagna'tta tagu nu ngai inon da amati.

²⁴ Pun indaydayawda'ḵ Apudyus gapu ḵan saḵon.