Ephesians 6 - Sa Ugud Apudyus

Sa Bagbagan Paul Atta Abeng Ya Da Ama Ḵan Ina

¹ Diḵayu ḵade aabeng, tuttuwaonyu da amayu ḵan inayu gapu si niyossaananyu ḵan Apu te sana ustu we ḵoonyu.

² Te ḵanan ni bilin Apudyus, “Dayawom da amam ḵan inam.” Te sana ummunae bilin Apudyus we nadog-an atte karina,

³ “ta ambaḻu ḵan andu biyagnu'tte annae lubung.”

⁴ Diḵayu ḵad ose ama ḵan ina, adiyu pasang-on da abengyu. Siya ḵoonyu, bagbagaanyu ḵan tuttuduwanyu didae ustu ta siya oḵyan ḵoonda da pinion Apu.

Sa Bagbagan Paul Atta Musassu Ya Da Ap-apu

⁵ Ḵan diḵayu we musassu, tuttuwaonyu oḵyan da ap-apuwonyu sina'd luta. Patganyu ḵan dayawonyu oḵyan didae maḻpu'tta pusuyu ya ipapuutyu we angwa'tta paḵwada ḵan diḵayu we isun ni ḵoonyu nu aḵ Apu Jesu Kristu angibaga ḵan diḵayu.

⁶ Daḵampun ay aḵ asi ḵayu pumangog si annae antotollong da ap-apuwonyu ta piga gay nu maḻyadanda ḵan diḵayu yaḵon ibelangyu we sammilu ḵayu ḵan Kristu ya sipupusu ḵayu oḵyane angwa'tte pinion Apudyus.

⁷ Ḵad ummanyu ambaḻuwon da ḵewaaḻyu ya allaylayad ḵayu we isun di musassun Apu we daḵampun atte tagu.

⁸ Te igammuyu we gungunaan Apu da losane tagu'tta ambaḻu we ḵoonda taḵon ay nu musassu baḵon nu daḵampun.

⁹ Ḵan diḵayu bose ap-apuwonda, ḵasapuḻan ose ambaḻu ḵayu'tta musassuyu. Adiyu ḵoḻḵogon dida te igammuyu we sa antotollong Apuyu ad langit, an-iisu ḵayu'tta musassuyu ḵad ippun laḵsigona'ḵ tagu.

Sa Aggome Itton Apudyus

¹⁰ Annaya anungus ni ibagaḵ ḵan diḵayu. Pumigsa oḵyan da pammatiyu mipagapu si niyossaananyu ḵan Apu ya sa ummamdane ḵabooḻana.

¹¹ Iḵabotyu da losane aggome mausar aḵ saḻaḵnib da long-agyu we innatod Apudyus ta adi ḵayu paḵḵog si angallelaw Satan.

¹² Te daḵampun aḵ tagu da ḵabusuḻ taḵu yaḵon da losane kalasin di ispiritu we adipun mailae angipangat atta tagu sina'd lutae sissiya si pongot ya da udume awad ad langite lawweng.

¹³ Pun isun da suḻdadu we ansagsagana'tte gubate iḵabotda da aggomda ḵad ḵasapuḻan ose usaron taḵu da losane itton Apudyus ḵan ditaḵu ta anaḻaḵnib ḵan ditaḵu ḵan anullagi ḵan Satan we ḵabusuḻ taḵu'tte timpu we anuḵḵusana ḵan anulisugana ḵan ditaḵu. Te nu ḵoonyu ḵatti, anḵosdoḻ ḵayu we maḵagubat ḵan Satan inggana'ḵ magangput gubat ḵan adinapun paat ogon oḻgon diḵayu.

¹⁴ Pasig ḵayu maḵasagana ta itaḵdogyu sagangon ḵan sullagiyon da ḵabusuḻ atte amatiyanyu'tte ḵatuttuwaane maḻpu ḵan Apudyus. Sa ḵatuttuwaane maḻpu ḵan Apudyus isun di taḵyade iḵabot da suḻdadu si ansaganaandae umoy maḵagubat. Unudonyu bos maun-unane antatagu we maḻpu ḵan Apudyus. Sanat isun di taḵupaḻe anaḻaḵnib atta baḻuḵung da suḻdadu.

¹⁵ Ansagana ḵayu we angipaigammu si Ambaḻu we Damag mipanggob si inon ni allin-awae maḵabuḻbuḻunan ḵan Apudyus. Ḵatti isun di ḵapatuse iḵabot da suḻdadu si ansaganaandae anagang atta ḵabusuḻ.

¹⁶ Papigsaonyu taḻgodyu ḵan Apu si losane ḵasasaadyu ta masaḻaḵniban ḵayu'tta ngaimane ḵoon Satan. Sa taḻgodyu isun di ḵaḻasag da suḻdadu we patilayune awitonda ta ḵosponda da bumaḻabaḻae ipanan ni ḵabusuḻ.

¹⁷ Pasigyu sosomḵone tinagun Apudyus diḵayu. Sanat isun di helmet da suḻdadu we anaḻaḵnib si uḻuda. Ibagayu Ugud Apudyus we paiḵagasmoḵ ni Ispiritu Santu. Sanat isun di ispadan da suḻdadu we usarondae angiduḵḵus atta ḵabusuḻda.

¹⁸ Sa angiḵabotanyu'tta anna losan, pasigyu oḵyan iluwaḻu ḵan Apudyus da paipaspasmoḵ ni Ispiritu Santu ḵan diḵayu'tte ngaimane ḵasasaad. Ilanyu bos ta pasigyu iluwaḻuwan da losane tagun Apudyus.

¹⁹ Iluwaḻuwanaḵ ud os ta ituttudun Apudyus da ustu we ibagaḵ nu isaḻadḵu we an-ugud ya tumuḻodaḵe angipaigammu si Ambaḻu we Damag we adipun nipaigammu si awe.

²⁰ Te imbuun Kristu saḵon aḵ angiyugud ḵan siya ta ipaigammuḵ Ambaḻu we Damag we siya gapunae naḵawadanaḵ sinsadi. Pun iluwaḻuwanaḵ ud ta tumuḻodaḵe angiyugud ḵan siya te siya ustu we ḵooḵ oḵyan.

Sa Anungus Ni Annae Suḻat

²¹ Ibuunku'ḵ Tychicus ḵan diḵayu ta ipaigammuna da losane maḵmaḵwa ḵan saḵon. Siya osa'tta sunud taḵu ḵan Kristu we ay-ayatoḵ ya mataḻgodane sammilu ḵan Apu.

²² Siya ibuunni ḵan diḵayu ta ipaigammuna da maḵmaḵwa ḵan diḵani sina ya soḻgagona da somsomoḵyu.

²³ Susunudḵu ḵan Kristu, itton oḵyan Apudyus we Ama ya aḵ Apu Jesu Kristu ḵan diḵayu lin-awa ḵan ayate midoga pammati.

²⁴ Awad oḵyan ḵan diḵayu ḵinabaḻu we maḻpu ḵan Apudyus ya da losane angipapati'tte ayatna ḵan Jesu Kristu we Apu taḵu.