Ephesians 4 - Sa Ugud Apudyus

Sa An-ossaanan Taḵu We Long-ag Kristu

¹ Pun ḵan saḵone nibabaḻud gapu si anserbiyaḵ ḵan Apu, ḵodawoḵ ud ḵan diḵayu ta ibagayyu antataguyu si planun Apudyus we namili ḵan ditaḵu'ḵ taguna.

² Patilayun oḵyane napakumbaba ḵayu, naanus ḵayu ya an-anggom ḵayu'tta buḻunyu we mipagapu si ayat.

³ Ipapatiyu an-ossaanon ansosomsomoḵyu we maḻpu'tte Ispiritu Santu mipagapu si pagapagatupanyu allin-awae maḵabuḻbuḻunanyu.

⁴ Losan taḵu we niyossaan ḵan Kristu, isu taḵun os-ossaane long-ag ya ossaane Ispiritu. Os-ossaan os namnama taḵu gapu si namiliyan Apudyus ḵan ditaḵu.

⁵ Os-ossaan Apu taḵu, os-ossaan pammati taḵu ya os-ossaan nabonyagan taḵu.

⁶ Os-ossaan os Apudyus we losan taḵu Ama. Siya angipangat ḵan ditaḵu losan, anḵewaaḻ mipagapu ḵan ditaḵu losan ta mituttuwa da piniona ya iinggaw ḵan ditaḵu losan.

⁷ Yaḵon impailan Apudyus ḵinabaḻuna si nangittana si sin-ossaossa ḵan ditaḵu'tta kalasin di ḵabooḻan sigun si simsimmoḵ Kristu we itton.

⁸ Annaya impaigilin Apudyus si mipanggob ḵan Kristu we ḵanana, “Nipangatu ḵad ad langit, intallayna da aduadu we baḻud ya innatodna da ḵabooḻan atta taguna.”

⁹ Ngai ḵad ain piona ḵanan nu naugude nipangatu'd langit? Ḵaḵna piona ḵanan, aḵ Jesus ummunae nan-osoge naḻpu'd langit woḵ ummoy si ḵadoḻaane partin ni luta.

¹⁰ Ḵad sa sanae nan-osoge naḻpu'd langit, siya bos nipangatu'tte ḵangatuwane lugar ta siya inggaw atta ngaimane lugar we angipangat atta losan.

¹¹ Ḵad siya bos nangitod atta nankalakalasi ye ḵabooḻan atte gimung da namati. Dinutuḵana da udum aḵ apostol ya da udum aḵ profetana. Da udum dinutuḵana'ḵ angiwaḻagawag si Ambaḻu we Damag atta ḵinailin di ili ya da udum aḵ pastor ya da udum aḵ mimistulu.

¹² Ḵingwana ḵatti ta ansagana taḵu we tagun Apudyus we anserbi ḵan Kristu ta pumigsa taḵu we isun di long-agna,

¹³ inggana'ḵ an-ossaan pammati taḵu ya madog-an an-aawat taḵu ḵan ambubuḻunan taḵu ḵan Kristu we Abeng Apudyus. Ḵad ambalin taḵu'ḵ naangsan si pammati ya sa ugali taḵu miyisu si ḵabaḻun ni ugalin Kristu we naippun nangkurangana.

¹⁴ Ḵad nu miyisu taḵu ḵan siya, aditaḵupun ogon isun di abenge allasu mabaliwan ni somsomoḵna ya maallelaw atta tinutuli ye ituttudun da tuliyan.

¹⁵ Yaḵon ngaimane ugudon taḵu baḵon nu ḵoon taḵu, ḵasapuḻane ipapati taḵu ḵatuttuwaane midoga ayat inggana'ḵ gumodogodong antatagu taḵu we miyisu ḵan Kristu we isun di uḻun da losane gimung da namati.

¹⁶ Ḵad gapu ta siya mipani ye uḻu taḵu, siya bos asi ḵigade angiyuḻnus ḵan ditaḵu we namati ye isun di ḵamangay ni sanae long-agna ta mibagaydae ustu. Pun nu ḵoon ni sin-ossaossae ḵamangay ni sanae long-ag naatode ḵewaaḻna, pumigsapigsa ya dumaḵodaḵoḻ sanae long-ag mipagapu si ayat.

Sa Baru We Antatagun Da Namati

¹⁷ Pun gapu si ḵaḻabbongane innatod Apu ḵan saḵon, ipatutḵu we adi taḵu oḵyan mabiyage isun da tagu we adipun amati ḵan Apudyus te ippun anun da somsomoḵda.

¹⁸ Ḵad sissiyae anggiḵbot da an-aawatda ya naippun ḵan dida biyage itton Apudyus te naippun igammuda ḵan tummungitong da somsomoḵda.

¹⁹ Ippun ogon igammudae bumain te ngaimane pion ni long-agdae ḵaissaw ya ḵababbain, adidapun agaye angwa.

²⁰ Yaḵon ḵan diḵayu, daḵampun aḵ sana da inadaadaḻyu si mipanggob ḵan Kristu,

²¹ te dingngoḻyu mipanggob ḵan siya ya nituttudu ḵan diḵayu ḵatuttuwaane maḻpu ḵan Jesu Kristu.

²² Pun ḵasapuḻane ḵaanonyu da dadaane ugaliyu we nangidaḻan atte biyagyu we angwa'tte pinion ni long-ag. Sanat dadaane ugaliyu we angallelaw ya anadail ḵan diḵayu.

²³ Ḵad ḵasapuḻane mapabaru we ustu somsomoḵyu,

²⁴ ya awatonyu baru we ansosomsomoḵ ya sa ugali ye maḻpu ḵan Apudyus we isun ni ansosomsomoḵna ḵan ugalina. Mipaila sana si antataguyu si tuttuwae naun-unan atte ambaḻu we ugali.

²⁵ Pun adi ḵayu ogon antultulli, abus ḵatuttuwaan aḵ ibagayu'tta buḻunyu te nidoga taḵu losan atte long-ag Kristu.

²⁶ Nu sumanga ḵayu, adiyu iyunude siya bumasuḻanyu. Ḵad adiyu iyaḻ-aḻgawe sumanga,

²⁷ ta naippun gundaway Satan we anubsub ḵan diḵayu.

²⁸ Nu awad aḵḵawan ḵan diḵayu, iginoḵna oḵyan yaḵon ipapuutnae anḵewaaḻ aḵ iḵataguna ta awad ibadangna'tta anḵasapuḻ.

²⁹ Adi ḵayu oḵyane namati an-ugud aḵ lawweng. Siya oḵyan abus aḵ ugudonyu da bumadang ḵan pumigsaan da somsomoḵ da andongoḻ sigun atte ḵasapuḻan ni sin-ossaossa'tte bumaḻuwana.

³⁰ Ḵad adi ḵayu oḵyan angwa'ḵ lawweng aḵ adin ni Ispiritu Santu andadauyan te sanat innatod Apudyus we isun di maḻḵae taguna diḵayu. Ḵad sadi angipaigammu we subutona diḵayu si umali ye aḻgaw.

³¹ Pun ḵasapuḻane ḵaanonyu da losane lawweng atta somsomoḵyu, busut ya sanga'tta buḻunyu. Adi ḵayu bos maḵasubog ya maḵasossongbat ya an-ugud aḵ lawweng atta asintataguyu. Naippun oḵyan somsomoḵyu'ḵ amaḵaḻam atta buḻunyu,

³² yaḵon an-asianggom ḵayu, an-asibadang ḵayu, an-asiḵadagu ḵayu ḵan an-asipakawan ḵayu we isun ni namakawanan Apudyus ḵan diḵayu gapu ḵan Kristu.