Ephesians 2 - Sa Ugud Apudyus

Sa Baru We Biyag Ḵan Kristu

¹ Sa daanyu amatiyan, isuyun nanattoy atte mipanggob ḵan Apudyus gapu'tta basuḻyu.

² Te siya inunudyu da antatagun da tagu we adipun amati ya tinuttuwayu gapu si namatiyanyu'tte pangat da ispiritu we adipun mailae siya angidaḻan atta tagu we adipun amati.

³ Ḵatti losan antatagu taḵu si awe ye siya ḵooḵoon taḵu da pipion ni long-ag taḵu. Ngaimane amaamayon ni long-ag taḵu ḵan somsomoḵ taḵu, dida da unudon taḵu. Pun sa gagangaye antatagu taḵu labbongnae nidoga taḵu'tta tagu we dusaon Apudyus.

⁴ Yaḵon ummamdan ḵadagu ḵan ayat Apudyus ḵan ditaḵu.

⁵ Taḵon ay nu isun di natoy taḵu gapu'tta basuḻ taḵu, innatodna baru we biyag gapu si niyossaanan taḵu ḵan Kristu. Pun sa ḵinabaḻun Apudyus gapun ni nataguwan taḵu'tte madusaan si basuḻ.

⁶ Ḵad gapu ta niyossaan taḵu ḵan Jesu Kristu we natagu ḵasin, impangatuna bos ditaḵu ta midoga taḵu maḵapangat ḵan Kristu'd langit.

⁷ Ḵingwan Apudyus da sana ta ipailana'tte losane timpu ummamdane ḵinabaḻuna ya an-anggom ḵan ditaḵu mipagapu ḵan Jesu Kristu.

⁸ Gapu'tte ḵinabaḻun Apudyus natagu taḵu mipagapu si pammati taḵu ḵan Kristu. Daḵampun atta ḵingwa taḵu yaḵon sa atod Apudyus.

⁹ Pun ippun isḵaḻ taḵu te daḵampun aḵ da ambaḻu we ḵingwa taḵu nataguwan taḵu.

¹⁰ Te planun Apudyus we pabaruwon da biyag taḵu mipagapu si niyossaanan taḵu ḵan Jesu Kristu ta siya oḵyan ḵoon taḵu da ambaḻu we implanuna si awe ye ḵoon taḵu.

Sa Nan-ossaanan Da Judyu Atta Gentil

¹¹ Pun diḵayu we niyanaḵe Gentil, sosomḵonyu oḵyane sa awe, potogon da Judyu diḵayu te adiyupun inunud ugalida mipanggob si sogyat. Isḵaḻdae dida da tagun Apudyus gapu'tte sanae ugali mipanggob si sogyat. Yaḵon sa ḵatuttuwaan, sa sogyat abuse ḵoon da tagu'tta long-agda.

¹² Sosomḵonyu we sa awe, nisisina ḵayu ḵan Kristu. Nanaḻsin ḵayu'tta ganaḵ Israel we pinilin Apudyus aḵ taguna. Adiḵayupun os nidoga si intuḻag Apudyus we inkarina'tta tagunae awad de umali ye anagu ḵan dida ya diḵayu we tagu we adipun amati ippun namnamayu ḵan ippun Apudyusyu.

¹³ Yaḵon sinsadi ḵad, gapu si niyossaananyu ḵan Jesu Kristu, diḵayu we adayu si awe, niyadani ḵayu ḵan Apudyus mipagapu si pummoy-asan ni daḻan Kristu si natoyana.

¹⁴ Aḵ Kristu we mismu nangipaḻ-og si lin-awa'tta Judyu ḵan Gentil. Nan-os-ossaanona somsomoḵ taḵu te ḵinaanna gapun ni nallaḵlaḵsigan taḵu.

¹⁵ Te natoy ḵad atte kros, ḵinaanna da ḵasapuḻane maunud atte lintog Moses we adu nigili ye biline para'tta Judyu. Pun sa ambanagan ni ḵingwana'tta duwae grupu we da Judyu ḵan Gentil an-ossaanda mipagapu'tte nangipaḻ-ogana si allin-awaanda.

¹⁶ Nan-ossaanon Apudyus da Judyu ya da Gentil we isun di ossaane long-ag ta sa miyossaananda ipaḻ-og Apudyus maḵabuḻbuḻunanda ḵan siya mipagapu'tte natoyan Jesus atte kros woḵ adinapun ogon ḵoon dida'ḵ bumusuḻ ḵan siya ya da udum.

¹⁷ Ḵad ummali'ḵ Kristu si annae lubung woḵ iwwaḻagawagna'tta Gentil we adayu ḵan Apudyus si awe ya da Judyu we adani ḵan Apudyus mipanggob atte inon da tagu we allin-awa maḵabuḻbuḻunanda ḵan Apudyus.

¹⁸ Ḵad mipagapu ḵan Kristu, maḵwae umadani taḵu losan ḵan Apudyus we Ama taḵu te ossaan Ispiritu we iinggaw ḵan ditaḵu.

¹⁹ Pun diḵayu we Gentil, daḵanḵayupun ogon aḵ mangili ya ḵaili yaḵon nambalin ḵayu'ḵ tagun Apudyus ya nidoga ḵayu bos atte baḻyanna.

²⁰ Pun maḵwae mipani ḵayu'tte partin ni templo we boḻoy Apudyus we taḵadona. Da apostol ya da profeta we an-uuggudon Apudyus mipanidae nisaadan ni sanae templo ya aḵ Apu Jesu Kristu ḵapatogane batu'tte sanae nisaadana.

^21-22 Siya aangdon ḵan amapagdot si losane partin ni templo ta magagaaman ḵopyana. Ḵad gapu si niyossaananyu ḵan Apu, nibelang ḵayu'tta losane namati ye usaron Apudyus aḵ antaḵad si templo we inggawana mipagapu'tte Ispiritu Santu.