Colossians 3 - Sa Ugud Apudyus

Sa Dadaan Ḵan Baru We Biyag

¹ Gapu ta nidoga ḵayu si ummuliyan Kristu, singtonyu da banage awad ad langit si igaw Kristu we tutuḵdu si madawinan Apudyus we maḵapangat ḵan siya.

² Siya oḵyan sosomḵonyu da banage awad ad langit, daḵampun atta awad si annae lubung.

³ Te isuyun natoy mipanggob atta gagangaye ḵinatataguyu yaḵon sinsadi tuttuwae natattagu ḵayu ḵan Apudyus mipagapu'tte niyossaananyu ḵan Kristu. Da tagu we adipun namati adidapun maawatan baru we biyagyu.

⁴ Aḵ Kristu siya mataguwanyu ḵad nu ampaila, midoga ḵayu bos ḵan siya si madayawana ḵan ḵinangatuna.

⁵ Pun ḵasapuḻane an-awidanyu da dadaane ḵasomsomḵanyu ya da ugaliyu we isun da maḵadagdagas ya da udume kalasin di ḵaissaw, da pipion ni long-ag ya sa ḵamommod te siya isun di anayawan atta sinan-apudyus.

⁶ Gapu'tta sana, dida allaḵ-am si ḵaog-ogyate sangan Apudyus atta adipun tumuttuwa gapu si adida amatiyan ḵan siya.

⁷ Ḵaḵnat isun ni nantataguyu si daanyu amatiyan.

⁸ Yaḵon sinsadi, ḵasapuḻane adiyu ḵoon da sana. Adi ḵayu ansasanga, adi ḵayu ansomsomoḵ aḵ ampaḵaḻaman da buḻunyu ya adiyu an-ugudan aḵ lawweng da udume tagu.

⁹ Adi ḵayu an-asituli te inabusyu ḵinaan dadaane ugaliyu,

¹⁰ ya awatonyu baru we ansosomsomoḵ ḵan ugali ye itton Apudyus ḵan diḵayu ḵad pagatupana pabaruwon ta miyisu ḵayu ḵan siya ya igammuwonyu we ustu.

¹¹ Gapu'tta sanae ḵingwan Apudyus, an-iisuwona da losan si antotollongna, Judyu man baḵon nu da Gentil, da naadaḻan ya da adipun naadaḻan, ḵaḵḵaili ya da maaḻmot, musassu ya daḵampun aḵ musassu te aḵ Kristu ḵapatogan atta losan ya awad os atta losane namati.

¹² Gapu ta diḵayu da pinilin Apudyus we taguna ya inay-ayatna, unudonyu oḵyan da sanae ug-ugali: Ḵumadagu ḵayu ya bumadang ḵayu, ipakumbabayu da somsomoḵyu ya somsomḵonyu oḵyan bumaḻuwan da udum ya pasig ḵayu oḵyan naanus.

¹³ Anusanyu oḵyan pakawanon da buḻunyu, nu awad ansosongbatanyu baḵon nu maḵabasuḻ osae tagu ḵan diḵayu, pakawanonyu we isun ni inon Apu we namakawan ḵan diḵayu.

¹⁴ Ḵad ḵasapuḻan ose idogayu ayat atta annae ambaḻu we ugali te nu an-asiayat ḵayu, siya gaḻut ni an-os-ossaanan da somsomoḵyu.

¹⁵ Pasig oḵyan lin-awa ya sa timpuyuge innatod Kristu angituray atta somsomoḵyu te sana gapun ni namiliyan Apudyus ḵan diḵayu ta an-os-ossaan ḵayu we long-ag Kristu. Ḵad pasig ḵayu anggappiya ḵan Apudyus.

¹⁶ Ḵad pasigyu oḵyan isisimoḵ mipanggob atta tuttudun Kristu. An-asituttudu ya an-asibagbaga ḵayu we usaronyu da losane ḵinalainge innatodna. Ḵantaonyu da ḵantae naḻpu'tta de Psalm, sa udume nigili'tte Ugud Apudyus ya da udume ḵantan da namati ye andayaw ḵan Apudyus ḵad pasig oḵyane anggappiya ḵayu ḵan Apudyus atta somsomoḵyu.

¹⁷ Ngaimane ḵoonyu ḵan ugudonyu, ḵoonyu mipagapu si ngadan Apu Jesus ḵad anggappiya ḵayu ḵan Apudyus we Ama mipagapu ḵan siya.

Sa Bagbaga Atte Baḻyan

¹⁸ Diḵayu ḵade bubbubai, paituray ḵayu'tta asawayu te ḵaḵna ḵasapuḻane ḵoon da amati ḵan Apu.

¹⁹ Diḵayu ḵad ose lallaḻaḵi, ḵasapuḻane ayatonyu da asawayu. Adiyu dida sangsang-an.

²⁰ Diḵayu ḵade aabeng, ḵasapuḻane pasigyu tuttuwaon da amayu ḵan inayu te sana mas-oman Apu.

²¹ Diḵayu ḵad ose aamma, adiyu paamdanane anangasanga'tta abengyu ta adida madismaya.

Sa Bagbaga Atta Musassu Ya Da Ap-apu

²² Diḵayu ḵad ose musassu, tuttuwaonyu da losane ibagan da ap-apuwonyu sina'd luta. Daḵampun aḵ abus angitotollonganda ḵan diḵayu'ḵ angwaanyu'tte ḵewaaḻyu ta mas-omda ḵan diḵayu. Yaḵon maḻpu pagay oḵyan atte somsomoḵyu da ḵoonyu we anuttuwa ḵan dida te isipogyu'ḵ Apu.

²³ Ngaimane ḵoonyu, iggayu ḵabooḻanyu we angwae isun di aḵ Apu anserbiyanyu we daḵampun atta tagu.

²⁴ Te igammuyu we itton Apu ḵan diḵayu gungunae inkarina'tta taguna te nanserbi ḵayu ḵan Kristu we Apu.

²⁵ Ngaimane angwa'ḵ lawweng, subalitan Apudyus si ustu we ḵadusaana te naippun tagu'ḵ laḵsigon Apudyus nu anḵuwis.